Samuel I, 15

Saul kɛ Amalek bi hwu ta

1 ⓣ Samuel de Saul ke, “Imi lɛ Yawɛ tsɔ nɛ i ba pɔ mo nu kɛ wo mo tsɛ ngɛ Israel ɔ nɛ.

2 ⓤ Yawɛ maa gbla Amalek bi ɔmɛ a tue, ejakaa a nɛmɛ ɔmɛ ya po Israel bi ɔmɛ blɔ benɛ a je Egipt kɛ ma a.

3 Yaa nɛ o ya tua Amalek bi ɔmɛ, nɛ o kpata a nɔ́ tsuaa nɔ́ hɛ mi. Ko si nɔ́ ko nɔ́ ko; se mohu o gbe nyumuhi kɛ yihi, jokuɛwi kɛ bimwɔwi, nahi kɛ tohi, kɛ afukpɔngɔhi kɛ tejihi tsuo pɛpɛɛpɛ.”

4 Saul bua e ta buli ɔmɛ a nya ngɛ Telem, nɛ benɛ a kane mɛ ɔ, a ná nihi akpe lafa enyɔ nɛ je Israel, kɛ akpe nyɔngma nɛ je Yuda.

5 Kɛkɛ nɛ Saul ba Amalek ma a mi, nɛ e ba wo ka ngɛ kɔ̃ ɔ mi.

6 Saul tsɔ ya de Ken bi ɔmɛ nɛ ji ni komɛ nɛ a nɛmɛ na Israel bi ɔmɛ mɔbɔ benɛ a je Egipt kɛ ma a ke, “Nyɛɛ je Amalek bi ɔmɛ a kpɛti, konɛ ma ko kpata nyɛɛ kɛ mɛ tsuo nyɛ hɛ mi.” Kɛkɛ nɛ Ken bi ɔmɛ je Amalek bi ɔmɛ a he.

7 Saul gbe Amalek bi ɔmɛ kɛ je Havila kɛ ya si Shur ngɛ Egipt beleku je.

8 Saul nu Amalek matsɛ, Agag hɛ ngmengmle; se ma a lɛɛ e kpata nɔ tsuaa nɔ hɛ mi.

9 Saul kɛ e we bi ɔmɛ baa Agag yi, nɛ na kɛ na bi, jijɔ kɛ jijɔ bi kpakpa amɛ, kɛ nɔ́ tsuaa nɔ́ nɛ hi ɔ, a kpataa we a hɛ mi; se níhi nɛ a hiee, kɛ níhi nɛ a he be se nami ɔ lɛɛ a kpata lɛ tsuo pɛpɛɛpɛ hɛ mi.

Mawu kua Saul

10 Yawɛ de Samuel ke,

11 “I pia ye he kaa i wo Saul matsɛ; ejakaa e je ye se nɛ e yi ye mlaa amɛ a nɔ.” Nɔ́ nɛ ɔ dɔ Samuel, nɛ e fa kue ha Yawɛ nyɔ ɔ mi tsuo.

12 E nɔ jena mɔtu mla a, Samuel te si, konɛ e ya hla Saul. Se a de lɛ ke Saul ho Karmel, he nɛ e ma manye yemi kaimi nɔ́ kɛ ha lɛ nitsɛ e he ngɛ ɔ ya, nɛ e se kpalemi mi ɔ, e po mi kɛ ho Gilgal ya.

13 Benɛ Samuel ba su Saul ngɔ ɔ, Saul fɔ lɛ nɛ e de lɛ ke, “Yawɛ nɛ e gbaa mo! I ye Yawɛ fami ɔ nɔ.”

14 Samuel bi ke, “Kɛ peeɔ kɛɛ nɛ i ngɛ jijɔhi, kɛ nahi a pɛmi he nue nɛ ɔ mɔ?”

15 Saul he nɔ ke, “Ye we bi ɔmɛ kpɔ mɛ kɛ je Amalek bi ɔmɛ a dɛ. A baa jijɔ, kɛ na kpakpa amɛ a yi, konɛ a kɛ mɛ ba sã bɔ ha Yawɛ, o Mawu ɔ; se ní nɛmɛ nɛ piɛ ɔ lɛɛ wa kpata mɛ tsuo a hɛ mi.”

16 Kɛkɛ nɛ Samuel de Saul ke, “Da si nɛ ma bɔ mo nɔ́ nɛ Yawɛ de mi nyɔ nɛ ɔ mi.” Saul de lɛ ke, “Yaa o nya nɔ.”

17 Samuel de lɛ ke, “E ngɛ mi kaa o peeɔ o he humi mohu, se Israel wɛtso ɔmɛ a nyatsɛ ji mo. Yawɛ wo mo matsɛ ngɛ Israel.

18 E tsɔ mo, nɛ e de mo ke, ‘Yaa nɛ o kɛ Amalek yayami peeli ɔmɛ ya hwu nɛ o kpata a hɛ mi, nɛ e ko piɛ a ti nɔ kake po.’

19 Mɛni he je nɛ o bui Yawɛ tue? Mɛni he je nɛ o he ya sɔ kɛ ha ta yibu ní, nɛ o pee yayami kɛ si Yawɛ ɔ?”

20 Saul de Samuel ke, “I bu Yawɛ tue; tsɔmi nɛ e tsɔ mi ɔ, i ya. I kɛ Amalek matsɛ, Agag ɔ ba, nɛ i gbe Amalek bi ɔmɛ tsuo.

21 Se ta yibu ní ɔmɛ a kpɛti jijɔ, kɛ na kpakpa amɛ nɛ a ke a kpata a hɛ mi ɔ, mɛɛ lɛɛ ma a muɔ mɛ kɛ ba Gilgal, konɛ a kɛ ba sã bɔ ha Yawɛ, o Mawu ɔ.”

22 Samuel bi ke, “Anɛ Yawɛ nyaa sami bɔ, kɛ bɔ kpahi a he pe e munyu ɔ tue bumi lo? O nɛ, tue bumi hi pe bɔ sami, nɛ munyu ngɔmi hi pe jijɔhi a zɔ.

23 Atuã tsɔmi ɔ, e ji yayami; e ngɛ kaa klaami, nɛ tue wami hu ngɛ kaa wɔ jami. Akɛnɛ o bui Yawɛ fami ɔ tue he je ɔ, lɛ hu e kua mo kaa matsɛ.”

24 Saul de Samuel ke, “Niinɛ, i pee yayami; ejakaa i bui Yawɛ fami ɔ, kɛ mo hu o munyu ɔmɛ tue. I ya ye ma a gbeye, nɛ i bu mɛ tue.

25 Lɔ ɔ he ɔ, i kpa mo pɛɛ, ngɔɔ ye he yayami kɛ pa mi, nɛ o kɛ mi nɛ kpale kɛ ya Gilgal nɛ ma ya ja Yawɛ.”

26 Se Samuel de Saul ke, “I kɛ mo be yae; o bui Yawɛ fami ɔ tue, lɔ ɔ he ɔ, lɛ hu e kua mo kaa matsɛ ngɛ Israel.”

27 ⓥ Benɛ Samuel plɛ nɛ e yaa a, Saul nu e bo ɔ nya; nɛ bo ɔ hía.

28 Nɛ Samuel de lɛ ke, “Yawɛ hía Israel matsɛ yemi ɔ kɛ je o he mwɔnɛ ɔ, nɛ e ngɔ kɛ ha o nyɛmi ko nɛ hi pe mo.

29 Mawu nɛ ji Israel hɛ mi nyami ɔ, e yi lakpa, nɛ e tsakee we e yi mi tomi hulɔ; ejakaa tsa pi nɔmlɔ ji lɛ nɛ e ma tsake e yi mi tomi.”

30 Saul de ke, “I pee yayami; se kɛ̃, moo wo ye hɛ mi nyami ngɛ ye ma nimeli, kɛ Israel tsuo a hɛ mi, nɛ o kɛ mi nɛ ya nɛ ma ya ja Yawɛ, o Mawu ɔ.”

31 Lɔ ɔ he ɔ, Samuel kpale e se nɛ e kɛ lɛ ho Gilgal ya, nɛ Saul ya ja Yawɛ.

32 Jehanɛ Samuel de ke, “Nyɛɛ ngɔ Amalek matsɛ, Agag ɔ kɛ ba hiɛ ɔ.” Agag ba kɛ bua jɔmi, nɛ e de ke, “Niinɛ, gbenɔ doomi ɔ be.”

33 Se Samuel de lɛ ke, “Kaa bɔ nɛ o klaate ɔ ha binyɛmɛ kpatu plɛ pee nihi nɛ be bimɛ ɔ, ja nɔuu o nyɛ hu ma plɛ pee yosa ngɛ yihi a kpɛti.” Nɛ Samuel poo Agag mi kpɔ nya kpɔ nya ngɛ Yawɛ bɔ sami la tɛ ɔ hɛ mi ngɛ Gilgal.

34 Enɛ ɔ se ɔ, Samuel pue nɔ kɛ ho Rama ya, nɛ Matsɛ Saul hu kpale kɛ ho e we mi ya ngɛ Gibea.

35 Samuel nɛ́ Saul hu kɛ ya si e gbenɔ ligbi; se daa nɛ ɔ, e yeɔ e he kɔmɔ. Nɛ Yawɛ pia e he kaa e wo Saul matsɛ ngɛ Israel.