Rut 1

Elimelek kɛ e yo kɛ a bimɛ hia kɛ ho Moab ya

1 Manyadali ɔmɛ a yi nɔ, benɛ matsɛmɛ na we nɛ a bɔni Israel ma a nɔ yemi lolo ɔ, hwɔ ba zugba a nɔ. Lɔ ɔ he ɔ, nyumu ko nɛ a tsɛɛ lɛ Elimelek, nɛ je Efrat weku ɔ mi, kɛ e yo Naomi, kɛ a bimɛ nihewi enyɔ, Malon kɛ Kilion, hia kɛ je Betlehem ngɛ Yuda zugba a nɔ kɛ ya to nubwɔ ngɛ Moab zugba a nɔ. Benɛ a ngɛ lejɛ ɔ,

2

3 Elimelek ba gbo, nɛ e piɛ e yo Naomi kɛ e binyumu enyɔ ɔmɛ.

4 Elimelek binyumu ɔmɛ ngɔ Moab yihi: nɔ kake biɛ ji Orpa, nɛ nɔ kake hu biɛ ji Rut. Benɛ a hi lejɛ ɔ maa pee jeha nyɔngma se ɔ,

5 Malon kɛ Kilion hu ba gbo, nɛ e ba piɛ Naomi nɔ kake too nɛ e be huno, loo binyumu ko.

Rut nyɛɛ Naomi se kɛ ba Betlehem

6 Pee se ɔ, Naomi nu kaa Yawɛ ba gbaa e ma a, nɛ e ha a ngmɔ ɔmɛ ba ní saminya; lɔ ɔ he ɔ, e dla konɛ e kɛ e nganyɛmɛ ɔmɛ nɛ hia kɛ je Moab zugba a nɔ.

7 Kɛkɛ nɛ a pue nɔ kɛ yaa Yuda. Benɛ a yaa ngɛ blɔ ɔ nɔ ɔ,

8 Naomi de e nganyɛmɛ enyɔ ɔmɛ ke, “Nyɛɛ kpale nyɛ se nɛ nɔ tsuaa nɔ nɛ ho e nyɛ ngɔ ya. I kpa Yawɛ pɛɛ nɛ e na nyɛ mɔbɔ ngɛ si himi kpakpa nɛ nyɛɛ kɛ mi, kɛ nihi nɛ si wɔ ɔ hi ɔ he.

9 Yawɛ nɛ ha nɛ nyɛɛ gba ekohu, konɛ nyɛ ti nɔ tsuaa nɔ nɛ na he ko nɛ e hi.” Benɛ e fua mɛ nɛ e kɛ mɛ ye sɛ ɔ, a wo yana,

10 nɛ a de ke, “Dɛbi! Waa kɛ mo maa ya o weku li ɔmɛ a ngɔ.”

11 Se Naomi de mɛ ke, “Ye bimɛ, nyɛɛ kpale nyɛ se! Mɛni he je nyɛɛ kɛ mi maa yaa? Nyɛ susu kaa ma nyɛ ma fɔ binyumuhi ekohu ha nyɛ nɛ nyɛɛ kɛ mɛ nɛ hi si lo?

12 Nyɛɛ kpale nyɛ se, ejakaa i be gba si himi nya. Nɛ ke kaa i kɛ nyumu ko bua nyɔ nɛ ɔ mi nɛ i fɔ binyumuwi po,

13 anɛ enɛ ɔ he je ɔ, nyɛ maa tsi nyɛ he nya nɛ nyɛ be gbae; nɛ nyɛ maa mlɛ kɛ yaa si be nɛ a maa wa lo? Dɛbi, ye bimɛ, nyɛ le kaa nɔ́ nɛ ɔ be mi bae; ejakaa sane nɛ Yawɛ kɛ mi ye ɔ nya wa; se nyɛɛ lɛɛ nyɛ ní peeɔ mi mɔbɔ.”

14 Se a wo yana ekohu. Kɛkɛ nɛ Orpa fua e nganyɛ ɔ, nɛ e kɛ lɛ ye sɛ, nɛ e kpale e se; se Rut lɛɛ e mɛtɛ e nganyɛ ɔ he kpɛii nɛ e hi kpɔmi.

15 Lɔ ɔ he ɔ, Naomi de lɛ ke, “O nɛ, o hunongua yo ɔ kpale e se kɛ ho e weku li kɛ e mawu ɔmɛ a ngɔ ya. Mo hu, kpale o se nɛ o kɛ lɛ nɛ ho!”

16 Se Rut ha lɛ heto ke, “Mo ko nyɛ ye nɔ doo ke ma si mo; ha nɛ waa ho kɛkɛ. He tsuaa he nɛ o yaa a, ma ya; nɛ he tsuaa he nɛ o maa hi ɔ, lejɛ ɔ ma hi. O je kɛ wɛ maa pee imi hu ye je kɛ wɛ, nɛ o Mawu maa pee ye Mawu.

17 He nɛ o ma gbo ngɛ ɔ, lejɛ ɔ ma gbo ngɛ, nɛ lejɛ ɔ nɔuu a maa pu mi ngɛ. Ja gbenɔ pɛ lɛ ma ha nɛ ma si mo; ke pi ja lɛɛ Yawɛ kɛ mi nɛ ye sisiisi.”

18 Benɛ Naomi na kaa Rut muɔ e yi mi kpɔ kaa e kɛ lɛ maa ya a, e de we nɔ́ ko hu.

19 Kɛkɛ nɛ mɛ ni enyɔ ɔmɛ a tsa nyɛɛmi ɔ nɔ kɛ ya si a ya su Betlehem. Benɛ a su Betlehem ɔ, ma a tsuo hoso, nɛ yi ɔmɛ nɛ ngɛ lejɛ ɔ kɛ gbafa bi ke, “Naomi ɔ ji nɛ ɔ?”

20 Nɛ e he nɔ nɛ e de mɛ ke, “Nyɛ ko tsɛ mi Naomi[1] hu, se mohu nyɛ tsɛ mi Mara,[2] ejakaa Ope ɔ kɛ mi ye sane nɛ dooɔ tsɔ.

21 Ye he su kɛ je hiɛ ɔ kɛ ho, se Yawɛ kpale mi kɛ ba dɛ gu. Mɛni he je mɔ nɛ nyɛ tsɛɔ mi Naomi, be mi nɛ Ope ɔ te si wo mi, nɛ e ha i na nɔ kikɛ nɛ ɔ?”

22 Bɔ nɛ Naomi kpale e se kɛ je Moab zugba a nɔ, nɛ e kɛ e nganyɛ Rut, Moab yo ɔ, ba Betlehem ji nɛ ɔ nɛ. Be mi nɛ a ba su Betlehem ɔ, a bɔni ngma kpami.