Kpojemi 7

Israel bi 144,000

1 ⓣ Enɛ ɔ se ɔ, i na Mawu bɔfohi eywiɛ nɛ a daa si ngɛ je ɔ kɔ nya eywiɛ ɔmɛ. A tsi kɔɔhiɔ eywiɛ ɔmɛ a nya, konɛ kɔɔhiɔ ko fia ngɛ zugba a nɔ, loo wo nɔ, loo kɛ muɔ tso ko.

2 I na bɔfo kpa ko hu nɛ ngɛ kuɔe kɛ je pu site he kɛ ma, nɛ e hɛɛ Mawu hɛ kalɔ ɔ nɔ́ nya sɔumi nɔ́. E kpa ngmlaa wawɛɛ, nɛ e de bɔfo eywiɛ ɔmɛ nɛ Mawu ha mɛ he wami ke a kpata zugba a, kɛ wo ɔ a hɛ mi ɔ ke,

3 ⓤ “Nyɛ ko kpata zugba a, loo wo ɔ, loo tso ɔmɛ a hɛ mi. Nyɛɛ mlɛ kɛ yaa si wa maa ngɔ nɔ́ nya sɔumi nɔ́ kɛ kadi wa Mawu ɔ tsɔli ɔmɛ a hɛ nya lolo.”

4 Nɛ a de mi ke nihi nɛ a ngɔ Mawu nɔ́ nya sɔumi nɔ́ ɔ kɛ kadi a hɛ nya a, a yibɔ ji 144,000. A je Israel wɛtso nyɔngma kɛ enyɔ ɔmɛ a mi;

5 nihi akpe nyɔngma kɛ enyɔ je wɛtso tsuaa wɛtso mi. Wɛtso ɔmɛ ji Yuda, Reuben, Gad, Asher, Naftali, Manase, Simeon, Levi, Isakar, Zebulun, Yosef, kɛ Benyamin.

6

7

8

Asafo kuu nguaa a

9 Enɛ ɔ se nɛ ma hyɛ ɔ, nimli asafo nɛ nɔ ko be nyɛe maa kane ji nɛ. A je je ma amɛ tsuo a mi, wɛtso munomuno, nimli munomuno, kɛ gbi munomuno. A daa si ngɛ matsɛ sɛ ɔ, kɛ To bi ɔ hɛ mi kɛ a he tade hiɔ klɔiiklɔii; nɛ nɔ tsuaa nɔ hɛɛ tã kũɔmi ngɛ e dɛ.

10 Nɛ mɛ tsuo a kpa ngmlaa wawɛɛ ke, “Wa Mawu ɔ nɛ hii si ngɛ matsɛ sɛ ɔ nɔ ɔ, kɛ To bi ɔ pɛ ji ni nɛmɛ nɛ heɔ nɔ yi wami.”

11 Bɔfo ɔmɛ tsuo daa si kɛ bɔle matsɛ sɛ ɔ, kɛ nikɔtɔma amɛ, kɛ hɛ kali eywiɛ ɔmɛ. Kɛkɛ nɛ a ngɔ a hɛ mi ngɔ bu si ngɛ matsɛ sɛ ɔ hɛ mi, nɛ a ja Mawu,

12 nɛ a de ke, “Amen! Wa Mawu! Wa ngɛ o yi jee; wa ngɛ o hɛ mi nyami woe, nɛ wa ngɛ mo si nae kɛ yaa neneene. Ejakaa o le ní; o kle, nɛ o je agbo! Amen!”

13 Kɛkɛ nɛ nikɔtɔma amɛ a ti nɔ kake bi mi ke, “Nihi nɛ wo tade hiɔ klɔiiklɔii nɛ ɔ, mɛnɔmɛ ji mɛ, nɛ jije a je?”

14 ⓥ I de lɛ ke, “Ye Nyɔmtsɛ, i li; mo lɛ o le!” E de mi ke, “Haomi kpetekpleenyɛ ɔ, nimli nɛ ɔmɛ ji ni nɛmɛ nɛ gblee mi kɛ be slɔkee. A fɔ a tade ɔmɛ a he, nɛ a ha nɛ a hiɛ futaa ngɛ To bi ɔ muɔ ɔ mi.

15 Enɛ ɔ he je nɛ a ngɛ Mawu matsɛ sɛ ɔ hɛ mi, nɛ a jaa lɛ nyɔ kɛ pia ngɛ e sɔlemi we ɔ nɛ. Nɔ nɛ hii si ngɛ matsɛ sɛ ɔ nɔ ɔ maa baa a yi.

16 ⓦ Hwɔ be mɛ yee hu; kuma be mɛ yee hu. Pu, loo pu la nɛ nya wa hu be mɛ sããe,

17 ⓧ ejakaa To bi ɔ nɛ ngɛ matsɛ sɛ ɔ kpɛti ɔ maa lɛ mɛ; nɛ e ma tsɔ̃ mɛ kɛ maa ya nyu vuhi nɛ haa nɔ wami a he. Nɛ Mawu ma tsu a hɛ mi vo nyu tsuo.”