Kpojemi 2

Womi nɛ a ngma ya ha asafo ɔ nɛ ngɛ Efeso ɔ

1 Nɛ e de ke, “Bɔfo ɔ nɛ ngɛ Efeso asafo ɔ nya a, ngmaa womi nɛ ɔ ya ha lɛ ke, “Nɔ nɛ hɛɛ dodoe kpaago ɔmɛ ngɛ e hiɔ nine mi, nɛ e ngɛ nyɛɛe ngɛ sika tsu kane tso kpaago ɔmɛ a kpɛti ɔ, sɛ gbi nɛ je e ngɔ ji nɛ ɔ nɛ.

2 I le ní nɛ o tsuɔ, dengme nɛ o gboɔ, kɛ bɔ nɛ o toɔ o tsui si. I le hu kaa o ha we yayami peeli hɛ mi. Nihi nɛ tsɛɔ a he bɔfohi, se pi bɔfohi ji mɛ ɔ, bɔ nɛ o ka mɛ, nɛ o na kaa lakpatsɛmɛ ji mɛ ɔ, i le lɛ tsuo pɛpɛɛpɛ.

3 O toɔ tsui si; o naa amanehlu ngɛ ye he nɛ pɔ tɔɛ mo.

4 Se kɛ̃ ɔ, i kɛ mo ngɛ sane ko. O sume mi hu kaa bɔ nɛ o suɔ mi sa a.

5 Lɔ ɔ he ɔ, moo hɛli o he si ngɛ nɔ nɛ mi nɛ o gbee si ngɛ ɔ he. Mo tsake o tsui, nɛ o hi si kaa kekle ɔ. Ke o tsakee we o tsui ɔ, ma ba o ngɔ, nɛ ma ba je o kane tso ɔ kɛ je e ma he ɔ.

6 Se kɛ̃ ɔ, nɔ́ kake nɛ o pee nɛ hi ji kaa ní nɛ Nikolai bi ɔmɛ ngɛ tsue ɔ, o nyɛɛ kaa bɔ nɛ imi hu i nyɛɛ ɔ nɔuu.

7 ⓙ “Lɔ ɔ he ɔ, nɔ nɛ ngɛ tue ɔ, e bu nɔ́ nɛ mumi ɔ ngɛ asafo ɔmɛ dee ɔ tue! “Ni nɛmɛ nɛ maa ye kunimi ɔ, ma ha mɛ blɔ nɛ a maa ye tso nɛ haa nɔ wami nɛ ngɛ Mawu abɔɔ ɔ mi ɔ yiblii.”

Womi nɛ a ngma ya ha asafo ɔ nɛ ngɛ Smirna a

8 ⓚ Nɛ e de ke, “Bɔfo ɔ nɛ ngɛ asafo ɔ nya ngɛ Smirna a, ngmaa womi nɛ ɔ ya ha lɛ ke, “Sɛ gbi nɛ je nɔ nɛ ji kekleekle no kɛ nyagbe no ɔ ngɔ ji nɛ ɔ nɛ; e gbo, nɛ e kpale ba wami mi ekohu.

9 I le o haomi ɔmɛ! I le kaa nɔ́ ko be o dɛ lɛɛ, se kɛ̃ ɔ, niatsɛ ji mo. Nihi nɛ deɔ ke Yuda bi ji mɛ, pohu e be mi ja a, ní yayahi nɛ a deɔ ngɛ o he ɔ, i le lɛ tsuo. Abosiami jali a kuu ji mɛ!

10 Koo ye amanehlu nɛ ma o nɔ ɔ gbeye! Hyɛ! Abosiami miɔ nɛ e maa wo nyɛ ti ni komɛ tsu, konɛ a kɛ ka nyɛ; nɛ nyɛ maa na nɔ́ ligbi nyɔngma. Ye mi anɔkuale kɛ yaa si gbenɔ mi tete po, nɛ ma ha mo wami kaa kunimi nɛ o ye ɔ he jlasi.

11 ⓛ “Lɔ ɔ he ɔ, nɔ nɛ ngɛ tue ɔ, e bu nɔ́ nɛ mumi ɔ ngɛ asafo ɔmɛ dee ɔ tue. “Ni nɛmɛ nɛ maa ye kunimi ɔ, gbenɔ enyɔne ɔ be mɛ nae.

Womi nɛ a ngma ya ha asafo ɔ nɛ ngɛ Pergamo ɔ

12 “Bɔfo ɔ nɛ ngɛ asafo ɔ nya ngɛ Pergamo ɔ, ngmaa womi nɛ ɔ ya ha lɛ ke, “Sɛ gbi nɛ je nɔ nɛ ngɛ klaate nya enyɔtsɛ nɛ nya ba a ngɔ ji nɛ ɔ nɛ.

13 I le o hi he ɔ kaa Abosiami matsɛ sɛ ɔ ngɛ lejɛ ɔ. Se o pɛtɛ ye biɛ he. Nɛ benɛ a gbe Antipa tete po ɔ, hemi kɛ yemi nɛ o ngɛ ngɛ ye mi ɔ, o ngmɛɛ we he. Niinɛ, Antipa ye ye he odase nɛ e ye mi anɔkuale. Nɛ sane kpakpa a nɛ e ngɛ fiɛe ɔ he je ɔ, a gbe lɛ ngɛ nyɛ kpɛti ngɛ he nɛ Abosiami ngɛ ɔ.

14 ⓜ Se kɛ̃ ɔ, i kɛ mo ngɛ sane bɔɔ ko. Ni komɛ ngɛ nyɛ kpɛti nɛ ya wo Balaam tsɔɔmi ɔ. Balam lɛ tsɔɔ Balak kaa e tsɔ Israel bi ɔmɛ klama nɛ a ye wɔ nya lo, nɛ a fiɛ yo kɛ nyumu yakayaka fiɛmi.

15 Ja nɔuu ni komɛ hu ngɛ nyɛ kpɛti nɛ a hɛɛ Nikolai bi ɔmɛ a tsɔɔmi ɔ mi.

16 Lɔ ɔ he ɔ, mo tsake o tsui! Ke pi ja a, ma ba o ngɔ be kpiti. Ma ngɔ klaate nɛ ngɛ ye nya mi ɔ, nɛ i kɛ jamɛ a ni ɔmɛ maa hwu ta.

17 ⓝ “Lɔ ɔ he ɔ, nɔ nɛ ngɛ tue ɔ, e bu nɔ́ nɛ mumi ɔ ngɛ asafo ɔmɛ dee ɔ tue! “Ni nɛmɛ nɛ maa ye kunimi ɔ, ma ha mɛ mana nɛ a kɛ laa a eko. Jehanɛ se hu, ma ha a ti nɔ tsuaa nɔ tɛ hiɔ nɛ a ngma biɛ he ngɛ nɔ. Biɛ nɛ ɔ, nɔ ko nɔ ko li, ja nɔ nɛ a ngɔ tɛ ɔ ngɔ ha lɛ ɔ pɛ.

Womi nɛ a ngma ya ha asafo ɔ nɛ ngɛ Tiatira a

18 “Bɔfo ɔ nɛ ngɛ asafo ɔ nya ngɛ Tiatira a, ngmaa womi nɛ ɔ ya ha lɛ ke, “Mawu Bi ɔ, nɔ nɛ e hɛngmɛ ngɛ kpɛe kaa la, nɛ e nane hu ngɛ kpɛe kaa ayawa nɛ a tsu he ɔ, sɛ gbi nɛ je e ngɔ ji nɛ ɔ nɛ.

19 I le ní nɛ o tsuɔ; i le o suɔmi, o hemi kɛ yemi, bɔ nɛ o sɔmɔɔ, kɛ bɔ nɛ o toɔ o tsui si ngɛ nɔ́ nami mi. I le kaa o ngɛ ní tsue amlɔ nɛ ɔ kulaa pe kekle ɔ po.

20 ⓞ Se kɛ̃ ɔ, i kɛ mo ngɛ sane. O ngmɛ blɔ nɛ Yezebel, jamɛ a yo ɔ nɛ tsɛɔ e he gbalɔ ɔ ngɛ ye ma a ní tsɔɔe. E kɛ tsɔɔmi nɛ ɔ sisi mɛ, nɛ a ya ngɛ yo kɛ nyumu yakayaka fiɛmi fiɛe; nɛ a ngɛ wɔ nya ní hu yee.

21 I ha lɛ be, konɛ e kɛ tsake e tsui, se e sume kaa e ma kpa e yakayaka nyɛɛmi ɔ.

22 Hyɛ, ma ha nɛ e tlɔ sa mi kpotoo kɛ hiɔ, nɛ nihi tsuo nɛ e kɛ mɛ puɛ gba a, ma ha nɛ a maa na nɔ́ wawɛɛ. Ma pee enɛ ɔ, ja e kɛ mɛ tsuo tsake a tsui ngɛ yi wu tso níhi nɛ a kɛ lɛ pee ɔ a he.

23 ⓟ Ma gbe e se nyɛɛli ɔmɛ hulɔ. Kɛkɛ ɔ, asafo ɔmɛ tsuo maa na kaa imi ji nɔ nɛ le adesahi tsuo a juɛmi, kɛ a tsui mi. Ma wo nyɛ ti nɔ tsuaa nɔ hiɔ ngɛ nɔ́ nɛ e tsu ɔ he.

24 “Se nyɛ ni nɛmɛ nɛ piɛ ngɛ Tiatira a, nyɛɛ lɛɛ nyɛ ya nyɛɛ we tsɔɔmi nɛ ɔ se; nɔ́ nɛ ni kpa amɛ tsɛɔ Abosiami laami sanehi nɛ a mi kuɔ ɔ hu, nyɛ kase we. Nyɛɛ lɛɛ i ngɛ nyɛ dee ke, i hla we nɔ́ kpa ko ngɛ nyɛ dɛ

25 kaa nyɛɛ pɛtɛ nɔ́ nɛ nyɛ ngɛ ɔ he wawɛɛ kɛ yaa si ma ba.

26 ⓠ Ni nɛmɛ nɛ maa ye kunimi, ni nɛmɛ nɛ maa ya nɔ maa pee ye suɔmi nya ní kɛ yaa si nyagbe ɔ, he blɔ nɛ Tsaatsɛ ngɔ ha mi ɔ, imi hu ma ha mɛ. Ma ha nɛ a maa ye je ma amɛ a nɔ kɛ kɔni si wami, nɛ a ma tsɔtslɔɔ a mi kaa buɛ nɛ ywia tsɔkɔtsɔkɔ. Nɛ ma ha mɛ dodoe nɛ a tsɛɛ nɔkɔ ɔ.

27

28

29 “Lɔ ɔ he ɔ, nɔ nɛ ngɛ tue ɔ, e bu nɔ́ nɛ mumi ɔ ngɛ asafo ɔmɛ dee ɔ tue!