Kpojemi 13

Lohwe awi yeli enyɔ ɔmɛ

1 ⓘ Jehanɛ ɔ, i na lohwe awi yelɔ ko nɛ je wo ɔ mi kɛ ma. E ngɛ koli nyɔngma, kɛ yi kpaago. Jlasi ngɛ koli tsuaa koli he, nɛ a ngma biɛ nɛ ji musu bɔmi munyuhi kɛ si Mawu ngɛ yi tsuaa yi he.

2 ⓙ Lohwe awi yelɔ ɔ nɛ i na a ngɛ kaa ogbetee; e nane ngɛ kaa osisiblisi nane, nɛ e nya ngɛ kaa jata nya. Sinɔ nguaa a ha lohwe awi yelɔ ɔ e he wami kpetekpleenyɛ, kɛ he blɔ nɛ e ngɛ kaa nɔ nɛ yeɔ matsɛ ɔ eko.

3 Sinɔ nguaa a yi kake ngɛ kaa nɔ́ nɛ plaa wawɛɛ; se pa a gbo. Nihi tsuo nɛ ngɛ je ɔ mi ɔ a nya kpɛ a he, nɛ a nyɛɛ lohwe ɔ se.

4 Ni ɔmɛ tsuo ja sinɔ nguaa a, ejakaa e ngɔ e blɔ nya a kɛ ha lohwe awi yelɔ ɔ. A ja lohwe awi yelɔ ɔ hulɔ, nɛ a de ke, “Mɛnɔ kɛ lohwe nɛ ɔ sɔ? Mɛnɔ ma nyɛ nɛ e kɛ lɛ maa hwu ta?”

5 ⓚ A ngmɛ lohwe ɔ blɔ nɛ e tu munyu nguahi, kɛ musu bɔmi munyuhi putɛputɛɛ kɛ si Mawu, nɛ a ha lɛ blɔ hulɔ nɛ e kɛ je e he wami kpo nyɔhiɔ nyingmi eywiɛ kɛ enyɔ.

6 E bɔni musu bɔmi munyuhi tumi kɛ si Mawu, Mawu biɛ ɔ, Mawu hi he ɔ, kɛ nihi tsuo nɛ ngɛ hiɔwe ɔ.

7 ⓛ A ngmɛ lɛ blɔ nɛ e kɛ ni klɔuklɔu ɔmɛ hwu ta, nɛ e ye a nɔ. A ha lɛ he wami ngɛ wɛtso munomuno, nimli munomuno, kɛ gbi munomuno tsuo a nɔ.

8 ⓜ Nihi tsuo nɛ ngɛ je ɔ mi ɔ ma ja lɛ. Ni nɛmɛ nɛ a ngma a biɛ kɛ wo hɛ kali a womi ɔ mi loko a bɔ je ɔ, mɛ pɛ lɛ a be lɛ jae. To bi ɔ nɛ a gbe ɔ nɔ́ ji jamɛ a womi ɔ.

9 “Lɔ ɔ he ɔ, nɔ nɛ ngɛ tue ɔ, e bu tue!

10 ⓝ Ke a to ke a nu nɔ ko nyɔguɛ ɔ, ja a nu lɛ nyɔguɛ. Ke nɔ ko kɛ klaate gbe nɔ ɔ, ja a kɛ klaate gbe lɛ. Enɛ ɔ tsɔɔ kaa e hia kaa Mawu we bi nɛ to a tsui si, nɛ a pɛtɛ a hemi kɛ yemi ɔ he wawɛɛ.”

11 Jehanɛ ɔ, i na lohwe awi yelɔ kpa ko nɛ je zugba a mi. E ngɛ koli enyɔ; koli ɔmɛ ngɛ kaa to bi kolihi, nɛ lohwe ɔ tu munyu kaa bɔ nɛ sinɔ nguaa a tuɔ munyu.

12 E ngɔ jamɛ a he wami kpetekpleenyɛ ɔ nɛ lohwe awi yelɔ kake ɔ ngɛ ɔ, nɛ e kɛ tsu ní ja nɔuu ngɛ kekleekle nɔ́ ɔ nane mi. E nyɛ nihi tsuo nɛ ngɛ je ɔ mi ɔ a nɔ nɛ a ja kekleekle lohwe awi yelɔ ɔ nɛ e pa a gbo ɔ.

13 Lohwe awi yelɔ enyɔne ɔ peeɔ nyakpɛ ní nguahi; e haa nɛ la po jeɔ hiɔwe kɛ baa zugba nɛ nɔ tsuaa nɔ naa.

14 Mawu ngmɛ lohwe awi yelɔ enyɔne ɔ blɔ nɛ e pee nyakpɛ níhi ngɛ kekleekle lohwe ɔ hɛ mi. Kɛ gu nyakpɛ ní nɛ ɔmɛ a nɔ ɔ, e sisiɔ nihi tsuo nɛ ngɛ je ɔ mi ɔ, nɛ e haa a peeɔ yayami. E nyɛ a nɔ nɛ a puɛ amaga nɛ ngɛ kaa lohwe awi yelɔ kake ɔ nɛ a kɛ klaate plaa lɛ wawɛɛ se e gbo we ɔ.

15 Mawu ha lohwe awi yelɔ enyɔne ɔ blɔ kaa e mu mumi kɛ wo amaga a mi, konɛ amaga a nɛ na wami, nɛ e tu munyu. Kɛkɛ ɔ, e ma ha nɛ a gbe nihi tsuo nɛ ja we lɛ ɔ.

16 Jehanɛ se hu, lohwe awi yelɔ enyɔne ɔ nyɛ ni ɔmɛ tsuo a nɔ, nimli wawihi kɛ nimli nguahi, niatsɛmɛ kɛ ohiatsɛmɛ, odehehi kɛ nyɔguɛhi tsuo; nɛ a kadi a hiɔ nine, loo a hɛ nya.

17 Nɔ ko nɔ ko be nyɛe ma he ní, loo e maa jua ní, kaa ja a kadi lɛ kikɛ nɛ ɔ kɛ kekleekle lohwe awi yelɔ ɔ biɛ, loo yibɔ nɛ daa si ha biɛ ɔ.

18 Ja ní lelɔ ji mo loko o maa nu nɔ́ nɛ ɔ sisi. Nɔ nɛ ngɛ juɛmi ɔ, e tsɔɔ yibɔ ɔ nɛ daa si ha lohwe awi yelɔ ɔ sisi, ejakaa yibɔ ɔ daa si ha nɔmlɔ biɛ. Yibɔ ɔ ji 666.