Yohane III, 1

1 ⓐ Imi nɔkɔtɔma a, i ngɛ womi nɛ ɔ ngmae kɛ ha mo Gayo nɛ i suɔ mo saminya kɛ ye tsui tsuo ɔ.

2 Ye nyɛmi nɛ i suɔ, i ngɛ kue fae ha Mawu, nɛ o ya nɔ ngɛ nɔ́ tsuaa nɔ́ mi. O hi gblagblaagbla ngɛ nɔmlɔ tso mi kaa bɔ nɛ i le nɛ o ngɛ mumi mi he wami ɔ.

3 I na bua jɔmi babauu benɛ nyɛmimɛ ɔmɛ ekomɛ ba hiɛmɛ nɛ ɔ ba bɔ mi amaniɛ ngɛ o he ɔ. A tsɔɔ kaa o ngɔ o he ngɔ ha Mawu kulaa kaa bɔ nɛ o ngɛ anɔkuale mi ɔ.

4 Nɔ́ nɛ peeɔ mi bua jɔmi pe kulaa ji kaa ma nu kaa ye bimɛ ɔmɛ ngɛ nyɛɛe ngɛ anɔkuale ɔ nya.

A jé Gayo yi

5 Ye nyɛmi nɛ i suɔ saminya! Dengme nɛ o ngɛ gboe ngɛ nyɛmimɛ ɔmɛ a he, titli nibwɔ ɔmɛ ɔ, o tsui tsuo o kɛ ngɛ ní nɛ ɔ tsue.

6 A ba ye suɔmi nɛ o ngɛ kɛ ha mɛ ɔ he odase ha asafo ɔ ngɛ hiɛ ɔ. I kpa mo pɛɛ nɛ o wo mɛ blɔ saminya bɔ nɛ maa sa Mawu hɛ mi nɛ a kɛ tsa a blɔ hiami ɔ nɔ.

7 Ejakaa blɔ nɛ a hia nɛ ɔ, Kristo ní tsumi a ngɛ tsue, nɛ a he we nihi nɛ li Mawu ɔ a dɛ mi yemi kɛ buami ko kulaa.

8 Lɔ ɔ he ɔ, wɔ nɛ wa le Kristo ɔ, e hia kaa waa ye kɛ bua nimli nɛ ɔmɛ, nɛ waa piɛ a he kɛ tsu anɔkuale ɔ he ní tsumi ɔ.

Diotrefe kɛ Demetrio

9 I ngma womi kpiti ko ngɔ mane asafo ɔ. Se Diotrefe, nɔ nɛ hlaa kaa e pee e he nɔkɔtɔma a bui mi kulaa.

10 Lɔ ɔ he ɔ, ke i ba a, lakpa munyuhi nɛ e ngɛ tue ngɛ wa he ɔ, ma wo nɔ ta, konɛ nyɛɛ na nihi tsuo nɛ e ngɛ pee ɔ. Se enɛ ɔ tete pi ha lɛ. Ke nyɛmimɛ ɔmɛ ba e ngɔ ɔ, e he we mɛ atuu. Asafo ɔ mi bi komɛ nɛ mɛɛ a suɔ kaa a ma he nyɛmimɛ ɔmɛ atuu po, e tsiɔ a nya; nɛ e hlaa kaa e fie mɛ kɛ je asafo ɔ mi!

11 Ye nyɛmi nɛ i suɔ! Ko ya wo nihi nɛ peeɔ ní yayamihi a nane; moo kase nihi nɛ peeɔ nɔ́ kpakpa mohu. Nɔ tsuaa nɔ nɛ peeɔ nɔ́ kpakpa a, Mawu nɔ́ ji lɛ; nɔ nɛ peeɔ yayami ɔ, e li Mawu.

12 Demetrio lɛɛ nɔ tsuaa nɔ tuɔ e he munyu kpakpa; nɛ jã nɔuu nɛ anɔkuale ɔ nitsɛ hu tsɔɔ. Wɔ hu wa ngɛ e he odase yee ja nɔuu, nɛ nyɛ le kaa anɔkuale wa ngɛ tue.

Nyagbe sɛ yemi

13 I ngɛ níhi fuu nɛ ma ngma mo, se i sume kaa i kɛ ningma tso kɛ ningma nyu ngmaa.

14 Mohu ɔ, i heɔ yeɔ kaa e be kɛe kulaa nɛ ma na mo, nɛ wa maa sɛɛ ní hɛ mi kɛ hɛ mi.

15 I ngɛ he jɔmi bae ha mo. O huɛmɛ ɔmɛ tsuo ke a biɔ mo. Nga wa huɛmɛ ɔmɛ tsuo kakaaka ha wɔ.