Manyadali 19

Levi no ɔ kɛ e plã a

1 Jamɛ a be ɔ mi nɛ Israel na we matsɛ lolo ɔ, Levi no ko ya to nubwɔ ngɛ Efraim yo ɔmɛ a nɔ tsitsaa lokoo; nɛ e ya su yo ko ngɛ Betlehem Yuda.

2 E ba mi kaa e plã yo ɔ mi mi fu lɛ, nɛ e tu fo kɛ ho e tsɛ we ya ngɛ Betlehem Yuda, nɛ e ya hi lejɛ ɔ nyɔhiɔ eywiɛ.

3 Ligbi ko ɔ, e huno ɔ bu e nɔ konɛ e kɛ lɛ ya tu ngɛ he jɔmi mi, nɛ e kpale kɛ ba. E kɛ e tsɔlɔ ɔ, kɛ teji enyɔ ho. Benɛ e ba su yo ɔ tsɛ we ɔ mi ɔ, yo ɔ tsɛ ɔ na lɛ, nɛ e kɛ bua jɔmi ba kpee lɛ.

4 E ngatsɛ ɔ tsi e nya, nɛ e ye ligbi etɛ ngɛ e ngɔ. A ye ní, nɛ a nu dã, nɛ a hwɔ lejɛ ɔ.

5 Ligbi nɛ ji eywiɛ ɔ, a te si mɔtu kpla nɛ a dla konɛ a pue blɔ, se yo ɔ tsɛ ɔ de e ngatsɛ ɔ ke, “Moo mlɛ nɛ o wo o nya mi nɔ́ ko loko o ho.”

6 Kɛkɛ nɛ nyumu ni enyɔ ɔmɛ hi si nɛ a ye ní, nɛ a nu dã; nɛ yo ɔ tsɛ ɔ de nyumu ɔ ke, “Moo hwɔ hiɛ ɔ gbɔkuɛ nɛ ɔ hulɔ, nɛ o na bua jɔmi.”

7 Benɛ Levi no ɔ te si nɛ e maa je ɔ, e ngatsɛ ɔ hɛɛ mi hluu nɛ e tsi e nya nɛ e hwɔ lejɛ ɔ ekohu.

8 Ligbi nɛ ji enuɔ ɔ, e te si mɔtu kpla konɛ e hia blɔ ɔ. Se yo ɔ tsɛ ɔ de lɛ ke, “Moo wo o nya mi nɔ́ ko, nɛ o mlɛ kɛ yaa si gbɔkuɛ.” Nɛ mɛ ni enyɔ ɔmɛ tsuo a ye ní.

9 Benɛ nyumu ɔ, kɛ e plã a, kɛ e tsɔlɔ ɔ dla nɛ a maa ho ɔ, e ngatsɛ ɔ de lɛ ke, “Hyɛ, du bu ta; nyɛɛ hwɔ hiɛ ɔ! O nɛ, je jɔ; nyɛɛ hwɔ hiɛ ɔ kɛ yaa si je maa na, nɛ o bua nɛ jɔ o he; konɛ nyɛɛ te si hwɔɔ mɔtu mla, nɛ nyɛ pue nɔ kɛ ho o ma a mi ya.”

10 Se nyumu ɔ kplɛɛ we kaa e maa hwɔ lejɛ ɔ jamɛ a ligbi ɔ. E kɛ e plã a, e tsɔlɔ ɔ, kɛ teji enyɔ ɔmɛ nɛ a wo a nɔ ní ɔ pue nɔ kɛ ya si a ya su Yebus (nɛ ji Yerusalem) hanɔ.

11 Benɛ a su Yebus ta a, du bu, nɛ tsɔlɔ ɔ de e nyɔmtsɛ ɔ ke, “Ha wa gba Yebus bi ɔmɛ a ma a mi, nɛ wa ya hwɔ lejɛ ɔ.”

12 Se e nyɔmtsɛ ɔ de lɛ ke, “Wa be ni komɛ nɛ pi Israel bi ji mɛ a ma mi gbae, se mohu wa maa po mi kɛ ya Gibea.

13 Ha waa nyɛɛ kɛ ya wa hɛ mi bɔɔ, nɛ wa ya hwɔ Gibea, loo Rama.”

14 Kɛkɛ nɛ a tsa nɔ kɛ ho. Benɛ e piɛ bɔɔ nɛ a maa su Gibea ngɛ Benyamin zugba a nɔ ɔ, pu nɔ si.

15 Lɔ ɔ he ɔ, a gba konɛ a ya hwɔ Gibea. A ya to si ngɛ magbɛ nɔ; ejakaa nɔ ko nɔ ko ba ngɔɛ mɛ kɛ yɛ e we mi nɛ a ya to lɛ.

16 Gbɔkuɛ ɔ, nɔmoyo ko ji nɛ ɔ nɛ je ngmɔ nɔ kɛ ma. Nyumu nɛ ɔ, Efraim yo ɔmɛ a nɔ nɛ e je kɛ ba to nubwɔ ngɛ Gibea, ngɛ Benyamin bi a kpɛti.

17 Benɛ nɔmoyo ɔ na blɔ hialɔ ɔ ngɛ magbɛ ɔ nɔ ɔ, e bi lɛ ke, “Jije o je? Nɛ jije o yaa?”

18 Levi no ɔ de lɛ ke, “Wa ba be kɛ ho Betlehem Yuda ya, nɛ wa kpale kɛ yaa we ngɛ Efraim yo ɔmɛ a nɔ tsitsaa lokoo, se nɔ ko nɔ ko ngɔɛ wɔ kɛ yɛ e we mi.

19 Wa ngɛ nga, kɛ niye ní ha wa teji ɔmɛ. Jehanɛ hu, wa hɛɛ niye ní, kɛ wai kɛ ha imi nitsɛ kɛ o mawayo ɔ, kɛ niheyo ɔ nɛ kɛ o tsɔli ɔmɛ nyɛɛ ɔ; nɔ́ ko nɔ́ ko hia we wɔ.”

20 Nɔmoyo ɔ de ke, “Nyɛ hee! Mawu nɛ gbaa nyɛ! Nɔ́ tsuaa nɔ́ nɛ maa hia nyɛ ɔ, ma pee ha nyɛ; se magbɛ ɔ nɔ kɛkɛ nɛ nyɛ ko hwɔ.”

21 E ngɔ mɛ kɛ ho e we mi ya, nɛ e ya ha teji ɔmɛ ní. Lɔ ɔ se ɔ, a fɔ a nanehi a he, nɛ a ye ní, nɛ a nu dã.

22 ⓡ Benɛ a bua jɔ a he ɔ, yakayaka nyumu komɛ nɛ ngɛ ma a mi ɔ ba bɔle we ɔ kɛ kpe. A si sinya a kɛ he wami, nɛ a de nɔmoyo ɔ nɛ ji wetsɛ ɔ ke, “Nyumu ɔ nɛ ba o we ɔ mi ɔ, je lɛ ha wɔ nɛ waa kɛ lɛ nɛ hwɔ.”

23 Se wetsɛ ɔ je kpo kɛ ya na mɛ, nɛ e de mɛ ke, “Dɛbi! Ye nyɛmimɛ, nyɛ ko pee yayami ko nɛ ngɛ kaa kikɛ nɛ ɔ! Nyumu nɛ ɔ, ye nubwɔ ji lɛ; nyɛ ko tsu kikɛmɛ a zo ní nɛ ɔ!

24 Ye bi zangmayo nɛ li nyumu, kɛ nyumu ɔ hu plã ji nɛ ɔmɛ nɛ. Ma je mɛ kpo ha nyɛ nɛ nyɛɛ ngɔ mɛ kɛ ho, nɛ nyɛ ya pee mɛ bɔ nɛ nyɛ suɔ. Se nyumu nɛ ɔ lɛɛ, nyɛ ko pee lɛ zo nɔ́ ko kaa kikɛ nɛ ɔ.”

25 Se nyumu ɔmɛ bui lɛ tue. Lɔ ɔ he ɔ, Levi no ɔ ya nu e plã a nɛ e tsitsɛɛ e yi se mane mɛ. A kɛ lɛ hwɔ, nɛ a pee lɛ basabasa nyɔ ɔ mi tsuo kɛ ya si mɔtu. Benɛ je mi maa ho tsɔmi ya a, a ngmɛɛ e he.

26 Makɛ futɛfutɛ mi ɔ, yo ɔ ba nɛ e ba tsɔ fia si ngɛ nɔmoyo ɔ sinya a nya, ngɛ we mi he nɛ e huno ɔ ngɛ ɔ; nɛ e tlɔ lejɛ ɔ kɛ ya si je mi tsɔ.

27 Benɛ e huno ɔ te si mɔtu nɛ e bli sinya a konɛ e je kpo nɛ e pue blɔ ɔ, e plã a ji nɛ ɔ nɛ hwɔɔ si ngɛ sinya a nya, nɛ e ninehi pueɔ si ngɛ kpoku ɔ nɔ.

28 E de lɛ ke, “Tee si nɛ waa ho!” Se yo ɔ he we nɔ. Lɔ ɔ he ɔ, e ngɔ lɛ ngɔ fɔ e teji ɔ nɔ, nɛ e pue nɔ kɛ ho e ma mi ya.

29 ⓢ Benɛ e ya su e we ɔ mi ɔ, e ngɔ ha nɛ e poo e plã a mi kpɔ nya kpɔ nya nyɔngma kɛ enyɔ, nɛ e tsɔ nɛ a kɛ ya ha Israel wɛtso nyɔngma kɛ enyɔ ɔmɛ tsuo kakaaka.

30 Nɔ tsuaa nɔ nɛ na nɔ́ nɛ ɔ de ke, “Kɛ je ligbi ɔ nɛ Israel bi ɔmɛ je Egipt zugba a nɔ hluu kɛ ba si mwɔnɛ ligbi nɛ ɔ, nɔ́ nɛ ɔ eko bɛ hyɛ; nɛ a nɛ eko hu hyɛ. Nyɛ susu he; nyɛɛ wo he ga, nɛ nyɛ de nɔ́ ko!”