Manyadali 12

Yefta kɛ Efraim bi ɔmɛ

1 Efraim bi ɔmɛ dla a he kɛ ha ta. A po pa a kɛ ya Zafon, nɛ a ya de Yefta ke, “Mɛni he je nɛ o kɛ Amon bi ɔmɛ ya hwu ta, nɛ o tsɛ we wɔ nɛ wa ba piɛ o he ɔ? Wa maa mɛ o we ɔ he la kɛ pue o nɔ.”

2 Se Yefta de mɛ ke, “I kɛ ye ma mi bi ɔmɛ ɔ, waa kɛ Amon bi ɔmɛ na pɛ wawɛɛ ko, nɛ benɛ i tsɛ nyɛ ɔ, nyɛ bɛ nɛ nyɛ ba je ngmlaa ha mi.

3 Nɛ́ i na kaa nyɛ be bae ɔ, i ngɔ ye wami kɛ sã bɔ, nɛ i hia kɛ ya na Amon bi ɔmɛ; nɛ Yawɛ hu ngɔ mɛ kɛ wo ye dɛ mi. Lɛɛ, mɛni he je nyɛ hia kɛ ba na mi mwɔnɛ ɔ nɛ nyɛɛ kɛ mi ba hwu mɔ?”

4 Kɛkɛ nɛ Yefta bua Gilead nyumu ɔmɛ tsuo a nya, nɛ a kɛ Efraim bi ɔmɛ hwu ta nɛ e ye a nɔ. Ejakaa Efraim bi ɔmɛ de ke, “Nyɛ Gilead bi nɛ nyɛ ngɛ Efraim kɛ Manase ɔ, ta nɛ fie nyɛ kɛ je Efraim kɛ ba hiɛ ɔ.”

5 Gilead bi ɔmɛ ya tsi blɔ ha Efraim bi ɔmɛ ngɛ Yordan pa pomi he ɔmɛ. Lɔ ɔ he ɔ, Efraim bi ɔmɛ nɛ ngɛ fo tue ɔ, ke a ti nɔ ko ke a ha lɛ blɔ nɛ e po pa a, Gilead bi ɔmɛ ma bi lɛ ke, “Efraim no ji mo lo?” Ke e he nɔ ke, “Dɛbi!” ɔ,

6 a ma de lɛ ke e de ke, “Shibolet.” Ke e lilɛ ya dɛ nɔ nɛ e ya de ke, “Sibolet” mohu ɔ, a maa nu lɛ nɛ a maa gbe lɛ ngɛ Yordan pa a pomi he ɔmɛ. Jamɛ a be ɔ mi ɔ, a gbe Efraim bi akpe nyingmi eywiɛ kɛ enyɔ.

7 Yefta, Gilead no ɔ da Israel ma a nya jeha ekpa. Lɔ ɔ se ɔ, e ba gbo; nɛ a pu lɛ ngɛ e ma mi, ngɛ Gilead.

Ibzan kɛ Elon kɛ Abdon

8 Yefta se ɔ, Ibzan nɛ je Betlehem ɔ ba da Israel ma a nya.

9 E ngɛ binyumuhi nyingmi etɛ, kɛ biyihi nyingmi etɛ. E ngɔ e biyi ɔmɛ ngɔ ha gba ngɛ weku kpahi a mi, nɛ e ya hla yihewi nyingmi etɛ kɛ je weku kpahi a mi kɛ ba ha e binyumu ɔmɛ nɛ a ngɔ. Ibzan da Israel ma a nya jeha kpaago.

10 Lɔ ɔ se ɔ, e ba gbo; nɛ a pu lɛ ngɛ Betlehem.

11 Ibzan se ɔ, Elon, Zebulun no ɔ ba da Israel ma a nya jeha nyɔngma.

12 Lɔ ɔ se ɔ, e ba gbo; nɛ a pu lɛ ngɛ Aiyalon, ngɛ Zebulun zugba a nɔ.

13 Elon se ɔ, Abdon, Hilel binyumu ɔ nɛ je Piraton ɔ ba da Israel ma a nya.

14 E ngɛ binyumuhi nyingmi eywiɛ kɛ bibinyumuhi nyingmi etɛ nɛ hii teji nyingmi kpaago a nɔ. Abdon da Israel ma a nya jeha kpaanyɔ.

15 Lɔ ɔ se ɔ, e ba gbo; nɛ a pu lɛ ngɛ Piraton, ngɛ Efraim zugba a nɔ, ngɛ Amalek bi ɔmɛ a yoku ɔ nɔ.