Yohane I 4

Anɔkuale mumi kɛ lakpa mumi

1 Ye nyɛmimɛ nɛ i suɔ, nyɛ ko he nɔ tsuaa nɔ ko kɛkɛ nɛ deɔ ke e ná Mawu mumi ɔ nyɛɛ ye. Se mohu nyɛɛ ka nɔ tsuaa nɔ nɛ nyɛɛ hyɛ kaa mumi nɛ e ngɛ ɔ je Mawu ngɔ lo. Ejakaa je ɔ hyi tɔ kɛ lakpa gbali sɔuu.

2 Nɔ́ nɛ nyɛɛ kɛ ma yo Mawu mumi ɔ ji nɛ ɔ nɛ. Nɔ tsuaa nɔ nɛ maa jaje kaa Yesu Kristo ba je ɔ mi kaa adesa a, mumi nɛ je Mawu ngɔ ɔ ngɛ e mi.

3 Se nɔ nɛ jajeɔ kaa nɔ́ nɛ a de ngɛ Yesu he nɛ ɔ be mi ɔ, e mumi ɔ ji Mawu ngɔ. Mumi nɛ ngɛ e mi ɔ je Kristo he nyɛlɔ ɔ ngɔ. Nyɛ nu kaa e ma, pi jã? Ee, amlɔ nɛ ɔ, e ná ba je ɔ mi momo.

4 Bimɛ tsɔwi, nyɛɛ lɛɛ Mawu níhi ji nyɛ, nɛ nyɛ ye lakpa gbali ɔmɛ a nɔ kunimi. Ejakaa mumi nɛ ngɛ nyɛ mi ɔ, e he wa kulaa pe mumi nɛ ngɛ ni nɛmɛ nɛ a kɛ je ɔ ngɛ bɔe ɔ a mi.

5 Jamɛ a lakpa gbali ɔmɛ ɔ, munyu nɛ kɔɔ je nɛ ɔ mi níhi a he nɛ a tuɔ. Nɛ je ɔ buɔ mɛ tue, ejakaa je ɔ mi nɛ a je.

6 Se wɔɔ lɛɛ Mawu níhi ji wɔ. Nɔ tsuaa nɔ nɛ le Mawu ɔ, e buɔ wɔ tue; nihi nɛ kɛ Mawu be ɔ, mɛɛ a bui wɔ tue. Enɛ ɔ waa kɛ naa slɔɔto nɛ ngɛ anɔkuale mumi ɔ, kɛ lakpa mumi ɔ a kpɛti.

Mawu ɔ suɔmi ji lɛ

7 Ye nyɛmimɛ nɛ i suɔ! Nyɛ ha waa suɔ wa sibi, ejakaa suɔmi ɔ, Mawu ngɔ nɛ e je. Nɔ tsuaa nɔ nɛ suɔ nɔmlɔ ɔ, Mawu bi ji lɛ, nɛ e le Mawu.

8 Nɔ tsuaa nɔ nɛ sume nɔmlɔ ɔ, e li Mawu; ejakaa Mawu ɔ, suɔmi ji lɛ.

9 Blɔ nɔ nɛ Mawu gu kɛ je e suɔmi ɔ kpo kɛ tsɔɔ wɔ ji nɛ ɔ nɛ: e tsɔ e Bi kake too ɔ kɛ ba je ɔ mi, konɛ kɛ gu e Bi ɔ nɔ ɔ, wa na wami.

10 Bɔ nɛ suɔmi ngɛ ji nɛ ɔ nɛ: pi wɔ nɛ wa sɛ hlami kɛ suɔ Mawu; Mawu mohu lɛ suɔ wɔ. Enɛ ɔ he ɔ, e tsɔ e Bi ɔ kɛ ba, konɛ e ba dla waa kɛ Mawu wa kpɛti, nɛ a ngɔ wa he yayami ɔmɛ ngɔ pa wɔ.

11 Ye nyɛmimɛ nɛ i suɔ, ke kikɛ nɛ ɔ Mawu suɔ wɔ ɔ, wɔ hu e sa kaa waa suɔ wa sibi.

12 ⓙ Mawu ɔ, nɔ ko nɛ lɛ hyɛ. Se ke wa suɔ wa sibi ɔ, Mawu hii wa mi, nɛ suɔmi nɛ e ngɛ kɛ ha wɔ ɔ mi waa.

13 Mawu ngɔ lɛ nitsɛ e mumi ɔ ngɔ ha wɔ. Nɛ enɛ ɔ waa kɛ na kaa niinɛ, Mawu ngɛ wa mi; nɛ wɔ hu wa ngɛ e mi.

14 Wa na enɛ ɔ, nɛ wa ngɛ odase yee kaa Tsɛ ɔ tsɔ e Bi ɔ kɛ ba kaa je ɔ yi wami helɔ.

15 Nɔ tsuaa nɔ nɛ jajeɔ paa kaa Yesu ɔ, Mawu Bi ji lɛ ɔ, Mawu hii e mi, nɛ lɛ hu e hii Mawu mi.

16 Suɔmi nɛ Mawu ngɛ kɛ ha wɔ ɔ, wɔ nitsɛmɛ wa le, nɛ wa ji he nɔ́. Mawu ɔ, suɔmi ji lɛ, nɛ nɔ tsuaa nɔ nɛ suɔ nɔmlɔ kɛ e tsui tsuo ɔ, e hii Mawu mi, nɛ Mawu hu hii e mi.

17 Suɔmi nɛ Mawu ngɛ kɛ ha wɔ ɔ mi wa wawɛɛ, bɔ nɛ pee nɛ kojomi ligbi ɔ, wa ko ye gbeye. Ejakaa wa je mi bami ngɛ kaa bɔ nɛ Kristo nitsɛ ba e je mi.

18 He nɛ suɔmi ngɛ ɔ, gbeye yemi be lejɛ ɔ; suɔmi nɛ mi wa a fieɔ gbeye tsuo kɛ yaa se. Lɔ ɔ he ɔ, nɔ tsuaa nɔ nɛ yeɔ gbeye ɔ, Mawu suɔmi nɛ mi wa a be e mi. Ejakaa gbeye yemi, kɛ tue gblami lɛ nyɛɛɔ.

19 Wa suɔ Mawu, ejakaa lɛ nɛ suɔ wɔ kekle.

20 Ke nɔ ko ke e suɔ Mawu, se e nyɛɛ e nyɛmi ɔ, lakpatsɛ ji lɛ. Ejakaa nɔ nɛ sume e nyɛmi nɛ e naa kɛ hɛngmɛ ɔ, kɛ e maa pee kɛɛ nɛ e maa suɔ Mawu nɛ e nɛ ɔ.

21 Mlaa nɛ Kristo wo wɔ ji nɔ tsuaa nɔ nɛ suɔ Mawu ɔ, e sa kaa e suɔ e nyɛmi hulɔ.