Petro I, 2

Kristo ji tɛ nɛ haa wami

1 Lɔ ɔ he ɔ, nyɛ kpa yayami tsuaa yayami peemi, lakpa, osato, ninyɛ, kɛ nihi a he munyu tumi.

2 Nyɛɛ pee nyɛ ní kaa bimwɔwi, nihi nɛ a fɔ mɛ ehe. Nyɛ ha nɛ mumi mi nyɔ nyu nɛ mi tsɔ ɔ nɛ jlo nyɛ. Nyɛ hla nɛ nyɛɛ nu, nɛ nyɛɛ wa, konɛ a he nyɛ yi wami.

3 ⓒ Kaa bɔ nɛ ngmami ɔ deɔ ɔ, “Nyɛ nitsɛmɛ nyɛ kpa si, nɛ nyɛ na kaa Nyɔmtsɛ ɔ mi mi jɔ.”

4 Nyɛɛ ba Nyɔmtsɛ ɔ ngɔ. Lɛ ji tɛ nɛ hɛ ngɛ nɛ adesa kua lɛ kaa nɔ́ nɛ he be se nami ɔ nɛ. Se Mawu lɛɛ e hla lɛ kaa nɔ́ nɛ he jua wa saminya.

5 Nyɛɛ ba kaa tɛhi nɛ a hɛ ngɛ, nɛ nyɛ ha nɛ a fia nyɛ kɛ ma si kaa mumi mi we. Nyɛ maa pee osɔfo klɔuklɔuhi, nɛ kɛ gu Yesu Kristo nɔ ɔ, nyɛ maa sã mumi mi bɔ nɛ maa sa Mawu hɛ mi.

6 ⓓ Ejakaa ngmami ɔ ke, “I hla tɛ ko nɛ he jua wa saminya, nɛ i kɛ ngɛ si mae ngɛ Zion kaa kɔ nya tɛ. Nɔ tsuaa nɔ nɛ heɔ lɛ yeɔ ɔ, zo be lɛ gbee kɔkɔɔkɔ.”

7 ⓔ Nyɛ nihi nɛ nyɛ he ye ɔ, e he jua wa ha nyɛ saminya; se ni nɛmɛ nɛ he we yi ɔ, “Tɛ ɔ nɛ tsu fiali ɔmɛ kua a, lɔ ɔ tutuutu ba plɛ pee kɔ nya tɛ.”

8 ⓕ Ngmami kpa ko hu de ke, “Enɛ ɔ ji tɛ nɛ ma ha nɛ nihi a nane ma tɛ nɔ; tɛ sa nɛ ma ha nɛ nihi maa nɔɔ si.” A tɛ nɔ́, ejakaa a yi Mawu sɛ gbi ɔ nɔ; bɔ nɛ Mawu to ha mɛ ji ja a nɛ.

9 ⓖ Se nyɛɛ lɛɛ, wɛtso nɛ Mawu hla ji nyɛ, odehe osɔfohi, je ma klɔuklɔu, kɛ Mawu nitsɛ e ma. E hla nyɛ nɛ e tsɛ nyɛ kɛ je diblii mi kɛ ba lɛ nitsɛ e la nɛ ngɛ nyakpɛ ɔ he, konɛ nyɛ ba fiɛ nyakpɛ níhi nɛ e tsu ɔ.

10 ⓗ Sa a, pi Mawu e ma ji nyɛ; se amlɔ nɛ ɔ, e ma ji nyɛ. Sa a, Mawu nɛ́ nyɛ mɔbɔ; se amlɔ nɛ ɔ, e na nyɛ mɔbɔ.

Mawu nyɔguɛhi

11 Nyɛmimɛ nɛ i suɔ! I ngɔ sane nɛ ɔ kɛ ngɛ nyɛ hɛ mi fɔe kaa nibwɔhi, kɛ blɔ hiali ngɛ je nɛ ɔ mi. Nyɛ ko ya di he lo mi níhi a se, ejakaa a kɛ nyɛ klaa ngɛ ta hwue daa.

12 Nyɛɛ ba nyɛ je mi saminya ngɛ ma je li ɔmɛ a kpɛti. Ke nyɛ pee jã, nɛ a po nyɛ nya kaa yayami peeli ji nyɛ po, kpakpa nɛ nyɛ ngɛ pee ɔ, a maa na. Kɛkɛ ɔ, ligbi ɔ nɛ Mawu ma ba kojo je ɔ, a maa wo e hɛ mi nyami.

13 Nyɔmtsɛ ɔ he ɔ, nyɛɛ ba nyɛ he si ha nɔ yemi tsuaa nɔ yemi ngɛ je nɛ ɔ mi, matsɛ nɛ ngɛ blɔ nya pe nihi tsuo,

14 aloo amlaalohi nɛ e hla nɛ a gbla yayami peeli a tue, nɛ a je nihi nɛ peeɔ kpakpa a yi ɔ.

15 Ejakaa Mawu suɔ kaa nyɛɛ pee kpakpa, konɛ kuasia amɛ nɛ hii ní tsuae putɛputɛɛ ɔ, a kpa munyu tumi kɛ si nyɛ.

16 Nyɛɛ hi si kaa nihi nɛ ye a he, se nyɛ ko ngɔ he yemi nɛ ɔ kɛ pee yayami nɛ nyɛɛ laa nɔ. Mohu ɔ, nyɛɛ hi si kaa Mawu tsɔli.

17 Nyɛɛ bu nɔ tsuaa nɔ; nyɛɛ suɔ nyɛmimɛ ɔmɛ nɛ ngɔ a he ngɔ ha Kristo ɔ; nyɛɛ ye Mawu gbeye, nɛ nyɛɛ bu matsɛ ɔ.

Kristo amanehlu nɛ pee nɔ hyɛmi nɔ́

18 Sɔmɔli, nyɛɛ ba nyɛ he si ha nyɛ nyɔmtsɛmɛ, nɛ nyɛɛ bu mɛ saminya; pi nihi nɛ a mi mi hi, nɛ a he jɔ kɛkɛ, se ni nɛmɛ nɛ waa nyɛ yi mi tete.

19 Ke o na amanehlu nɛ sɛ́, nɛ o le kaa lɔ ɔ ji Mawu suɔmi nya ní ɔ, Mawu maa gbaa mo.

20 Ke o pee nɔ́ nɛ dɛ, nɛ a ngɛ mo kpa fiae ngɛ he, nɛ o to o tsui si ɔ, mɛni se nami ngɛ he? Se ke o pee kpakpa, nɛ o ngɛ he amanehlu nae, nɛ o to o tsui si ɔ, Mawu maa gbaa mo.

21 Enɛ ɔ he Mawu tsɛ nyɛ ɔ nɛ. Ejakaa Kristo nitsɛ na amanehlu, nɛ e kɛ lɔ ɔ pee nɔ hyɛmi nɔ́ ha nyɛ, konɛ nyɛɛ nyɛɛ e se.

22 ⓘ E pee we yayami ko ɔ, lakpa ko hu ji e nya.

23 ⓙ Benɛ a ngɛ lɛ jɛe ɔ, lɛɛ e jɛ we nɔ ngɔ to we nane mi. Benɛ e ngɛ amanehlu nae ɔ, e gbíɛ nɔ ko; se mohu e ngɔ e he ngɔ ha Mawu, kojolɔ ɔ nɛ yeɔ dami sane ɔ.

24 ⓚ Kristo nitsɛ tloo wa he yayami ɔmɛ, nɛ e nɔmlɔ tso ɔ na nɔ́ ngɛ sɛumi tso ɔ nɔ. E pee enɛ ɔ, konɛ wa ko ngɔ wa he ngɔ ha yayami hu, se mohu waa ba wa je mi bɔ nɛ sa. E pa amɛ lɛ tsa nyɛ ɔ nɛ.

25 ⓛ Jinɛ nyɛ laa blɔ kaa tohi. Se amlɔ nɛ ɔ, nyɛ kpale kɛ ba nyɛ hyɛlɔ, kɛ nyɛ he bulɔ ɔ ngɔ.