Yakobo 1

1 ⓐ Imi Yakobo, Mawu kɛ Nyɔmtsɛ Yesu Kristo tsɔlɔ ɔ lɛ i ngɛ womi nɛ ɔ ngmae kɛ ya ha wɛtso nyɔngma kɛ enyɔ ɔmɛ nɛ gbɛ fĩa je ɔ mi tsuo. Nyɛ he manye!

Hemi kɛ yemi, kɛ nile

2 Ye nyɛmimɛ, ke nyɛɛ kɛ ka slɔɔtoslɔɔtohi ngɛ kpee ɔ, nyɛ bua nɛ jɔ wawɛɛ mohu;

3 ejakaa nyɛ le momo kaa ke nyɛ hemi kɛ yemi mi wa, nɛ nyɛ ye ka amɛ a nɔ ɔ, e woɔ nyɛ he wami nɛ nyɛɛ kɛ toɔ nyɛ tsui si.

4 Nyɛɛ to nyɛ tsui si saminya kɛ gblee kahi tsuo a mi kɛ manye, konɛ nyɛɛ hi kɛ pi si kulaa, nɛ nɔ́ ko nɔ́ ko kó hia nyɛ.

5 Se ke nyɛ ti nɔ ko ngɛ nile hlae ɔ, e kpa Mawu pɛɛ, nɛ e ma ha lɛ; ejakaa Mawu haa nɔ nɔ́ faa nɛ mi mi gbigblimi be mi.

6 Se ke o ngɛ Mawu nɔ́ ko he pɛɛ kpae ɔ, he ye, nɛ o ko je nɔ́ kulaa kaa Mawu ma ha mo nɔ́ nɛ o ngɛ bie ɔ. Nɔ nɛ jeɔ nɔ́ ɔ, e ngɛ kaa wo mi oslɔke nɛ kɔɔhiɔ ngɛ lɛ fiae kɛ ngɛ yae kɛ ngɛ bae.

7 Nɔmlɔ nɛ jeɔ nɔ́ nɛ e juɛmi peeɔ lɛ enyɔɔnyɔ, nɛ e nyɛ we nɔ́ ko nya si mami ɔ, e ko susu kaa e ma na nɔ́ ko kɛ je Nyɔmtsɛ ɔ dɛ mi.

8

Ohia kɛ ní nami

9 Kristo se nyɛɛlɔ ohiatsɛ ɔ, ke Mawu wo e nɔ ɔ, e fĩa;

10 ⓑ nɛ Kristo se nyɛɛlɔ niatsɛ ɔ, lɛ hu ke Mawu ba lɛ si ɔ, e fĩa, ejakaa niatsɛmɛ hɛ mi ma kpata kaa mɔmɔ nglaa ngɛ nga nɔ.

11 Ke pu je, nɛ je mi dɔ la a, mɔmɔ nglaa, nɛ e wɔleɔ pueɔ si, nɛ afɛu ko be e he hu. Ja nɔuu niatsɛ ɔ hu benɛ e hɛ dɔ kɛ ngɛ ní tsue ɔ, e hɛ mi ma kpata tlukaa.

Ka

12 Nɔ nɛ ke a ngɛ lɛ kae ɔ, e toɔ e tsui si, nɛ e ngmɛɛ we e hemi kɛ yemi he ɔ, á gbaa lɛ. Ejakaa ke e nyɛ gblee ka a mi ɔ, neneene wami nɛ Mawu wo si kaa a ma ha nihi nɛ suɔ lɛ ɔ, e nine maa su nɔ.

13 Ke a ka nɔ ko ɔ, e ko de ke Mawu lɛ ka lɛ. Ejakaa nɔ ko be nyɛe maa ka Mawu kaa e maa pee yayami lo. Pohu Mawu nitsɛ kɛ́ nɔ.

14 Se nɔ tsuaa nɔ ɔ, lɛ nitsɛ e we akɔnɔ nɛ gblaa lɛ, nɛ́ sisiɔ lɛ ɔ nɛ kaa lɛ.

15 Nɛ akɔnɔ ɔ, ke e ngɔ hɔ ɔ, e fɔɔ yayami, nɛ yayami hu ke e wa a, e fɔɔ gbenɔ.

16 Ye nyɛmimɛ nɛ i suɔ, nyɛ ko ha nɛ a sisi nyɛ.

17 Nike ní kpakpa, kɛ níhi nɛ hi kɛ pi si nɛ wa naa yaka a, lɛ tsuo Mawu lɛ haa wɔ. Mawu lɛ bɔ pu, nyɔhiɔ, kɛ dodoehi nɛ ngɛ hiɔwe ɔ. E haa nɛ a haa wɔ la daa, nɛ lɛ nitsɛ hu e tsakee we gblegbleegble.

18 Mawu gu sane kpakpa a nɔ kɛ ha wɔ mumi mi wami. Lɛ nitsɛ e suɔmi nya nɛ e pee enɛ ɔ. Ejakaa e suɔ kaa e pee wɔ nihi nɛ a he hia pe nibɔ ní ɔmɛ tsuo.

Sane kpakpa a tue bumi kɛ e nɔ yemi

19 Ye nyɛmimɛ nɛ i suɔ, nyɛ hɛ nɛ hi enɛ ɔ nɔ. Ke nɔ ko ngɛ munyu tue ɔ, nyɛɛ bu tue; nyɛ he ko sɔ kɛ tu munyu, nɛ nyɛ mi mi hu ko fu mla.

20 Mi mi fumi ha we nɛ nɔ peeɔ Mawu suɔmi nya ní.

21 Lɔ ɔ he ɔ, je mi bami yaya nɛ woɔ nɔ he mu ɔ, nyɛ kpa lɛ tsuo, nɛ nyɛ ko pee nyɛ sibi yi wu tso nihi hu. Nyɛɛ kɛ he si bami nɛ he munyu ɔ nɛ a du kɛ wo nyɛ mi ɔ, ejakaa lɔ ɔ nɛ ma he nyɛ klaa yi wami.

22 Nyɛ ko sisi nyɛ he kaa nyɛ maa bu munyu ɔ tue kɛkɛ; mohu nyɛɛ pee munyu ɔ nɔ yeli.

23 Nɔ tsuaa nɔ nɛ buu munyu ɔ tue kɛkɛ, se e yi nɔ ɔ, e ngɛ kaa nɔ ko nɛ ya hyɛɛ e he ngɛ ahuhuɛ mi, nɛ e naa bɔ nɛ e ngɛ ɔ tutuutu.

24 E naa bɔ nɛ e ngɛ ɔ, kɛkɛ ke e je lejɛ ɔ nɔuu pɛ e hɛ jeɔ bɔ nɛ e ngɛ ɔ nɔ.

25 Sane kpakpa a ji Mawu mlaa nɛ hi kɛ pi si, nɛ haa nɔ yeɔ e he. Ke nɔ ko kase sane kpakpa a mi tsɔɔmi ɔmɛ saminya, nɛ e mia e hɛ mi nɛ e hɛ ji nɔ́ nɛ e kase ɔ nɔ, se mohu e ye nɔ ɔ, a maa gbaa lɛ saminya ngɛ nɔ́ tsuaa nɔ́ nɛ e ngɛ tsue ɔ mi.

26 Anɛ nyɛ ti nɔ ko susuu kaa e ngɛ Mawu jae bɔ nɛ sa lo? Jamɛ a nɔ ɔ, e kɔ e lilɛ mi. Ke e kɔɛ e lilɛ mi ɔ, tsa pi Mawu nɛ e ngɛ jae, se lɛ nitsɛ e he kɛkɛ nɛ e ngɛ sisie.

27 Bɔ nɛ nɔ ko ma ja Mawu nɛ maa sa Tsɛ Mawu ɔ nitsɛ hɛ mi ji nɛ ɔ nɛ: awusahi kɛ yalɔyihi nɛ e fi mɛ ɔ, e hyɛ a nɔ. Jehanɛ e hyɛ lɛ nitsɛ e he nɔ saminya, konɛ je mi akɔnɔ yaya ko tɔtɔ e nane.