Hebri Bi - Introduction

NYA TSƆƆMI

A ngma womi nɛ ɔ ya ha Kristo se nyɛɛli komɛ nɛ miɔ nɛ a ngmɛɛ a hemi kɛ yemi he, ejakaa a ngɛ mɛ yi mi wae wawɛɛ. Womi ngmalɔ ɔ we oti ji kaa e maa wo mɛ he wami. E de mɛ ke e hia kaa a le kaa Mawu je e he si kulaa gbe nya kɛ gu Kristo nɔ, lɔ ɔ he ɔ, a hemi kɛ yemi mi nɛ wa saminya. Womi ngmalɔ ɔ ma nɔ́ etɛ nɔ mi: (1) Yesu Kristo ji Mawu Bi kɛ yaa neneene. E bu e Tsɛ ɔ tue pɛpɛɛpɛ kɛ gu amanehlu nɛ e na a mi. Kaa Mawu Bi ɔ, Kristo pe gbali ɔmɛ nɛ hi si somi momo be ɔ. E pe hiɔwe bɔfo ɔmɛ hulɔ, nɛ e pe Mose tete po. (2) Mawu nitsɛ wo Yesu osɔfo kɛ yaa neneene; e pe osɔfohi tsuo nɛ hi si somi momo be ɔ. (3) Nɔ tsuaa nɔ nɛ heɔ Yesu yeɔ ɔ, a kpɔ lɛ kɛ je yayami peemi, gbeye yemi, kɛ gbenɔ mi. Yesu ji osɔfo nɔkɔtɔma pe kulaa, nɛ lɛ nɛ ha wɔ yi wami hemi nitsɛnitsɛ. Se kusumi nɛ Hebri bi peeɔ ngɛ a jami ɔ nya, nɛ a gbeɔ lohwehi nɛ a kɛ sãã bɔ kaa a kɛ ma he nɔ yi wami ɔ sui he ko kulaa.

Blema Israel bi komɛ nɛ he biɛ kaa a hemi kɛ yemi mi wa a, a wo a ta kɛ pee nɔhyɛ nɔ ngɛ yi 11 ɔ mi. Womi ngmalɔ ɔ wo ga kaa nihi nɛ maa kane womi ɔ nɛ a hɛɛ hemi kɛ yemi ɔ mi nɛ wa. E ya nɔ nɛ e de mɛ ngɛ yi 12 ɔ mi ke a hɛɛ hemi kɛ yemi ɔ mi kɛ ya si nyagbe; a ngɔ a hɛ kɛ fɔ Yesu pɛ nɔ, nɛ ke a ngɛ nɔ́ nae jio, a ngɛ mɛ yi mi wae jio, a to a tsui si.

Nyagbe ɔ, womi ngmalɔ ɔ wo nihi nɛ maa kane womi ɔ ga, nɛ e bɔ mɛ kɔkɔ.

Bɔ nɛ a dla womi ɔ mi ha

• Mawu je e he si tutuutu kɛ gu Kristo nɔ 1.1-3
• Kristo pe Mawu bɔfo ɔmɛ tsuo 1.4—2.18
• Kristo pe Mose kɛ Yoshua tsuo 3.1—4.13
• Kristo ji osɔfo nɛ pe osɔfohi tsuo 4.14—7.28
• Kristo somi ɔ pe somi tsuaa somi 8.1—9.28
• Kristo ngɔ e he kɛ sã bɔ nɛ pe bɔhi tsuo 10.1-39
• Hemi kɛ yemi he hia wawɛɛ 11.1—12.29
• Bɔ nɛ wa maa sa Mawu hɛ mi 13.1-19
• Sɔlemi 13.20-21
• Nyagbe munyuhi 13.22-25