Hebri Bi 13

Bɔ nɛ wa maa sa Mawu hɛ mi

1 Nyɛɛ ya nɔ nɛ nyɛɛ suɔ nyɛ sibi daa kaa nyɛmimɛ.

2 ⓤ Nyɛ ko jɔɔ nibwɔ peemi hulɔ, ejakaa nibwɔ peemi nɔ nɛ ni komɛ gu kɛ he hiɔwe bɔfohi atuu nɛ a li tete.

3 Nyɛ kai nihi nɛ a wo mɛ tsu ɔ kaa nɔ́ nɛ nyɛɛ kɛ mɛ tsuo lɛ a wo tsu. Nyɛ kai nihi nɛ a ngɛ mɛ yi mi wae ɔ kaa nɔ́ nɛ nyɛ nitsɛmɛ mohu nɛ a ngɛ yi mi wae.

4 Nyɛ ha gba si himi he nɛ tsɔ, nɛ nyumu kɛ yo nɛ a ye a sibi anɔkuale. Ejakaa Mawu maa kojo yaholi, kɛ gba puɛli.

5 ⓥ Nyɛ ko di sika se; nɔ́ tsuaa nɔ́ nɛ nyɛ ngɛ ɔ, nyɛ bua nɛ jɔ he. Ejakaa Mawu de ke, “I be mo sie, nɛ i be mo kuae gblegbleegble.”

6 ⓦ Lɛɛ nyɛ ha waa kɛ kã nɛ de ke, “Nyɔmtsɛ ɔ ji ye he piɛlɔ, i be gbeye yee. Mɛni adesa ma nyɛ maa pee mi?”

7 Nyɛ hɛ mi nyɛɛli ɔmɛ nɛ ngɔ Mawu sɛ gbi ɔ ba ha nyɛ ɔ, nyɛ kai mɛ. Nyɛɛ hyɛ bɔ nɛ a hi si saminya hluu kɛ ya si a gbenɔ be; nyɛɛ hyɛ bɔ nɛ a he Mawu ye ha, nɛ nyɛɛ kase mɛ.

8 Yesu Kristo ɔ, bɔ nɛ e ngɛ hiɛ ɔ, ja nɔuu e ngɛ mwɔnɛ ɔ; nɛ e ngɛ ja nɔuu kɛ yaa neneene.

9 Nyɛ ko ha ni komɛ nɛ ngɔ tsɔɔmi slɔɔtoslɔɔtohi nɛ kɛ sane kpakpa a kɔ we nɛ je nyɛ kɛ je blɔ kpakpa a nɔ. Mawu dloomi ɔ lɛ woɔ wa mumi mi he wami; se mlaahi nɛ kɔɔ niye ní he ɔ, se nami ko kulaa be he kɛ ha nihi nɛ yeɔ nɔ ɔ.

10 Wa ngɛ bɔ sami la tɛ ko nɛ nihi nɛ sɔmɔɔ ngɛ bo tsu ɔ mi ɔ be he blɔ kaa a yeɔ e nɔ ní.

11 ⓧ Yuda bi a we osɔfo nɔkɔtɔma pe kulaa a ngɔɔ lohwehi a muɔ kɛ ya sãã bɔ ngɛ he klɔuklɔu pe kulaa a, konɛ Mawu nɛ ngɔ ma a he yayami kɛ pa mɛ. Se lohwe ɔmɛ nɛ a gbe ɔ nitsɛmɛ lɛɛ a ya sãã ngɛ ma sito he ɔ se.

12 Jã kɛ̃ Yesu hu na amahehlu ngɛ ma a agbo ɔ se, konɛ e ngɔ lɛ nitsɛ e muɔ ɔ kɛ je ma a he yayami.

13 Lɔ ɔ he ɔ, nyɛ ha nɛ waa ya e ngɔ ngɛ ma sito he ɔ se, nɛ a bɔ wɔ ahlua ngɛ lejɛ ɔ kaa bɔ nɛ a pee lɛ ɔ.

14 Ejakaa wa be ma nɛ ngɛ daa ngɛ zugba a nɔ hiɛmɛ nɛ ɔ, se ma nɛ maa ba a mohu se blɔ wa ngɛ hlae.

15 Lɔ ɔ he ɔ, e hia kaa wa je Mawu yi daa. Wɔ nihi nɛ wa heɔ Mawu yeɔ ɔ, nɔ́ nɛ waa kɛ wa nya jaje ɔ kɛ jeɔ e Bi ɔ yi ɔ ji bɔ nɛ wa ngɛ sãe ha Mawu kɛ gu Yesu Kristo nɔ ɔ nɛ.

16 Nyɛ hɛ ko je kpakpa peemi nɔ; nɛ nyɛɛ kɛ nyɛ sibi nɛ dla níhi nɛ nyɛ ngɛ ɔ. Ejakaa jamɛ a bɔ ɔmɛ saa Mawu hɛ mi saminya.

17 Nyɛɛ bu nyɛ hɛ mi nyɛɛli ɔmɛ tue, nɛ nyɛɛ ba nyɛ he si ha mɛ. Mɛ lɛ a hyɛɔ nyɛ nɔ daa, nɛ a maa bu akɔtaa ha Mawu. Nyɛ ha nɛ a pee enɛ ɔ kɛ bua jɔmi, se pi kɛ mi mi la, ejakaa lɔ ɔ maa ye nyɛ awi.

18 Nyɛɛ sɔle ha wɔ daa. Wa le kaa wa he nile bui wɔ fɔ; ejakaa be tsuaa be ɔ, wa suɔ kaa nɔ́ tsuaa nɔ́ nɛ wa maa pee ɔ, bu nɛ hi he.

19 I ngɛ nyɛ pɛɛ kpae nɛ nyɛɛ sɔle, konɛ a ha nɛ ma ba nyɛ ngɔ be kpiti mi.

20 He jɔmi Mawu ɔ, nɔ nɛ gu muɔ nɛ a kɛ sɔu neneene somi ɔ nya a nɔ, nɛ e je to ɔmɛ a hyɛlɔ ngua a nɛ ji wa Nyɔmtsɛ Yesu kɛ je gbeje kɛ ba wami mi ekohu ɔ,

21 e dla nyɛ kɛ pi si kɛ ní tsumi kpakpa sɔuu, konɛ nyɛɛ pee e sɔumi nya ní; nɛ kɛ gu Yesu Kristo nɔ ɔ, e ha nyɛ tsu níhi nɛ maa sa e hɛ mi, konɛ a wo e hɛ mi nyami kɛ je neneene kɛ ya neneene. Amen.

Nyagbe munyuhi

22 Ye nyɛmimɛ, womi nɛ i ngma nyɛ nɛ ɔ nya kɛ we kulaa, lɔ ɔ he ɔ, i kpa nyɛ pɛɛ nɛ nyɛɛ ye slɔmi ɔmɛ a nɔ.

23 I ngɛ hae nɛ nyɛɛ le kaa wa nyɛmi Timoteo nɛ a wo lɛ tsu ɔ, jehanɛ lɛɛ a ngmɛɛ e he. Ke e ba su ye ngɔ mla a, i kɛ lɛ tsuo maa ba nyɛ ngɔ.

24 Wa biɔ nyɛ hɛ mi nyɛɛli ɔmɛ, kɛ ni klɔuklɔu ɔmɛ tsuo. Ni nɛmɛ nɛ je Italia a hu ke a biɔ nyɛ.

25 Mawu dloomi ɔ kɛ nyɛ tsuo nɛ hi si. Amen.