Tito 1

1 Imi Paulo, Mawu tsɔlɔ, kɛ Yesu Kristo bɔfo ɔ lɛ i ngma womi nɛ ɔ. Mawu hla mi, nɛ e tsɔ mi, konɛ ma ya wo nihi nɛ Mawu hla mɛ ɔ a hemi kɛ yemi mi he wami, nɛ ma tsɔɔ mɛ anɔkuale ɔ nɛ ngɛ Mawu jami mi.

2 Wa ngɛ hɛ kɛ nɔ fɔmi kaa enɛ ɔ ma ha wɔ neneene wami. Mawu nɛ yi lakpa a wo si kaa e ma ha wɔ kikɛmɛ a neneene wami nɛ ɔ be nɛ a na we nɛ a bɔ nɔ́ ko nɔ́ ko.

3 Lɔ ɔ he ɔ, be nɛ sa mi ɔ, e ha nɛ siwo nɛ ɔ ba mi kɛ gu e sane kpakpa a nɛ a tu ngɔ wo ye dɛ mi ɔ nɔ. Enɛ ɔ i ngɛ fiɛe, kaa bɔ nɛ Mawu, wa kpɔlɔ ɔ fa mi ke ma pee ɔ.

4 ⓐ I ngɛ womi nɛ ɔ ngmae ha mo Tito, ye bi nitsɛnitsɛ ngɛ hemi kɛ yemi kake ɔ nɛ i kɛ mo tsuo wa hɛɛ mi ɔ mi. Dloomi kɛ he jɔmi nɛ je Tsɛ Mawu ɔ, kɛ wa kpɔlɔ Kristo Yesu dɛ mi ɔ ha mo!

Tito ní tsumi ngɛ Kreta

5 I si mo ngɛ Kreta, konɛ níhi nɛ piɛ ɔ, o to blɔ nɔ pɛpɛɛpɛ, nɛ o wo asafo nya dali ngɛ ma tsuaa ma mi. Mo kai níhi nɛ i de mo ɔ.

6 ⓑ Asafo nya dalɔ ɔ, e pee nɔ ko nɛ piami be e he, nɔ nɛ ngɛ yo kake pɛ, nɛ e bimɛ le Kristo. Bimɛ ɔmɛ nɛ a pee nihi nɛ a yeɔ a he odase kpakpa; pi yaholi, loo nihi nɛ tsɔɔ atuã.

7 Asafo nya dalɔ ɔ, akɛnɛ Mawu ní tsumi nɔ e ngɛ hyɛe he je ɔ, e sɛ kaa piami ko hii e he. E ko pee nɔ nɛ woɔ e he nɔ, loo nɔ nɛ tsui fiaa mlamlaamla, loo dã tɔlɔ, loo kunɔ nɔlɔ, loo nɔ ko nɛ dii sika se tsɔ.

8 Asafo nya dalɔ ɔ, e pee nɔ nɛ peeɔ nibwɔ, nɛ e suɔ nɔ́ nɛ hi, nɔ nɛ juɛmi ka si, nɛ e peeɔ nɔ́ nɛ da; nɔ nɛ ngɔ e he ngɔ ha Mawu kulaa, nɛ e yeɔ e he nɔ.

9 Anɔkuale ɔ nɛ a tsɔɔ lɛ, nɛ e he ye ɔ, e hɛɛ mi wawɛɛ. Ke e pee jã loko lɛ hu e ma nyɛ tsɔɔ ni kpahi ní nɛ he tsɔ saminya. Kɛkɛ ɔ, nihi nɛ teɔ si siɔ anɔkuale ɔ, e maa tsɔɔ mɛ a tɔmi.

10 Ejakaa nihi babauu tsɔ atuã, nɛ a ngɛ yakayaka munyu tue kɛ ngɛ nihi sisie. Nihi nɛ deɔ ke ja a po nɔ ɔ, mɛ titli lɛ a ngɛ ní nɛ ɔ tsue.

11 E hia kaa a ku nɔ́ nɛ ɔ nya la, ejakaa nimli nɛ ɔmɛ kɛ a tsɔɔmi ɔ ngɛ wehi fuu a nane kpatae. A ngɛ níhi nɛ dɛ blɔ tsɔɔe. Blɔɔ zo blɔ nɔ nɛ a gu kɛ ngɛ sika pee ji nɛ ɔ nɛ.

12 Kreta fɔfɔɛ, nɛ ji mɛ nitsɛmɛ a gbalɔ ko lɛ de ke, “Daa nɛ ɔ, Kreta bi ngɛ lakpa yee; a ngɛ kaa lohwe awi yeli pɛ! Daa nɛ ɔ, hejɔ peemi, kɛ a ye nɛ a tɔ pɛ ji a ní tsumi.”

13 Anɔkuale sane ji nɛ ɔ nɛ. Lɔ ɔ he ɔ, ka a hɛ mi wawɛɛ, konɛ a hɛɛ a hemi kɛ yemi ɔ mi wawɛɛ.

14 Kɛkɛ ɔ, a ya be Yuda bi a nyaziahi tue bue, nɛ mlaahi nɛ nihi nɛ kua anɔkuale ɔ wo mɛ ɔ hu a be nɔ yee.

15 Nihi nɛ a he tsɔ ɔ, nɔ́ tsuaa nɔ́ he tsɔ ha mɛ. Se nihi nɛ ble a he, kɛ ni nɛmɛ nɛ he we yi ɔ lɛɛ nɔ́ ko nɔ́ ko he tsɔ we ha mɛ; ejakaa a ble a juɛmi, kɛ a he nile tsuo.

16 A deɔ ke a le Mawu, se a ní peepee tsɔɔ we jã. Yakayaka nimli, kɛ atuã tsɔli ji mɛ; a tsu we nɔ́ kpakpa ko gblee.