Timoteo II, 2

Kristo Yesu ta bulɔ kpakpa

1 Lɔ ɔ he ɔ, ye bi, nɛ Mawu dloo wɔ nɛ wa ngɛ Kristo Yesu mi ɔ, o he nɛ wa.

2 Níhi nɛ o nu nɛ i ngɛ fiɛe ngɛ nihi babauu a hɛ mi ɔ, tsɔɔ nihi nɛ yeɔ anɔkuale ɔ lɔ ɔmɛ nɔuu, konɛ mɛ hu a tsɔɔ ni kpahi.

3 Mia o hɛ mi kɛ na nɔ́ kaa Kristo Yesu ta bulɔ kpakpa.

4 Ke ta bulɔ ngɛ ta hwue ɔ, e suɔ kaa e maa pee nɔ́ nɛ maa sa e tatsɛ ɔ hɛ mi be tsuaa be; lɔ ɔ he ɔ, e peeɔ klaalo kɛ haa e tatsɛ ɔ pɛ; e kɛ e he wui ma mi sanehi a mi.

5 Loko fo dalɔ ko nine maa su kunimi yemi jlasi nɔ ɔ, ja e ye fo dami he mlaa amɛ tsuo a nɔ pɛpɛɛpɛ.

6 Ngmɔ hulɔ nɛ gboɔ dengme kɛ tsuɔ ní ɔ, lɛ kekle e yeɔ ngmɔ niba ní ɔ eko.

7 Susuu nɔ́ nɛ i ngɛ mo dee nɛ ɔ he, nɛ Nyɔmtsɛ ɔ nitsɛ ma ha nɛ o nu nɔ́ tsuaa nɔ́ sisi.

8 Kai kaa Yesu Kristo, Matsɛ David nina nɛ Mawu tle lɛ si kɛ je gbeje ɔ he sane kpakpa a ji nɔ́ nɛ i ngɛ fiɛe ɔ nɛ.

9 Sane nɛ ɔ nɛ i ngɛ fiɛe ɔ he je nɛ i ngɛ nɔ́ nae; a wo mi kɔsɔkɔsɔ tete po kaa nɔ́ nɛ awi yelɔ ji mi. Se Mawu munyu ɔ fiɛmi lɛɛ nɔ́ ko nɔ́ ko be nyɛe maa tsi nya.

10 Enɛ ɔ he je nɛ i toɔ ye tsui si ngɛ nɔ́ tsuaa nɔ́ mi, nɛ i naa nɔ́ ngɛ nihi nɛ Mawu hla a a he, konɛ kɛ gu Kristo Yesu nɔ ɔ, a he mɛ hu a yi wami, nɛ a nine nɛ su hɛ mi nyami nɛ ngɛ kɛ yaa neneene ɔ nɔ.

11 Anɔkuale munyu ji nɛ ɔ nɛ: “Ke waa kɛ lɛ gbo ɔ, waa kɛ lɛ maa hi wami mi hulɔ.

12 ⓓ Ke wa mia wa hɛ mi ngɛ nɔ́ nami mi ɔ, waa kɛ lɛ maa ye matsɛ hulɔ. Ke wa kua lɛ ɔ, lɛ hu e ma kua wɔ.

13 Ke wa yi anɔkuale ɔ, lɛɛ anɔkuale pɛ e yeɔ daa, ejakaa e be nyɛe maa ye lakpa kɛ si lɛ nitsɛ e he.”

Ní tsulɔ kpakpa

14 Kaii mɛ kikɛmɛ a ní nɛ ɔmɛ. Bɔɔ mɛ kɔkɔ ngɛ Nyɔmtsɛ ɔ hɛ mi ke a ko pɛ ngɛ munyuhi a he, ejakaa nɔ́ kpakpa ko ji mi kɛ bɛ, se mohu jamɛ a munyu ɔmɛ gbeɔ e nuli ɔmɛ a hemi kɛ yemi.

15 Bɔɔ mɔde wawɛɛ kaa ní tsulɔ kpakpa, konɛ Mawu nɛ ná o he bua jɔmi. E ko pee mo zo kulaa kaa o maa tsɔɔ anɔkuale munyu ɔ saminya.

16 Se yakayaka ní sɛɛmi nɛ tsɔɔ we Mawu gbeye yemi ɔ, yu o he kɛ je he; ejakaa e haa nɛ nihi hɛɔ a he kɛ jeɔ Mawu he kulaa mohu.

17 Bɔ nɛ pa yaya gbo we gblee, se e hiaa kɛ haa si mohu ɔ, ja lɛ jamɛ a ní sɛɛmi yaya amɛ a mi sanehi gbɛɛ fĩaa. Ni enyɔ komɛ nɛ tsɔɔ lakpa ní nɛ ɔmɛ ji Himeneo kɛ Fileto.

18 A tla blɔ kɛ je anɔkuale ɔ he, nɛ a ngɛ dee ke be ɔ nɛ gbogboehi maa te si kɛ je gbeje ɔ be momo. A ngɔ munyu nɛ ɔmɛ kɛ ngɛ Kristo we bi babauu a hemi kɛ yemi hɛ mi kpatae.

19 ⓔ Se tsu sisi tomi tɛ nɛ Mawu ngɔ kɛ ma si ha hemi kɛ yemi ɔ he wa, nɛ e be mimiɛe. Munyu nɛ a kɛ sɔu tɛ ɔ nya ji, “Nyɔmtsɛ ɔ le lɛ nitsɛ e nihi.” Ekpa hu deɔ ke, “Nɔ tsuaa nɔ nɛ deɔ ke Mawu nɔ́ ji lɛ ɔ, é kpa yayami peemi.”

20 Pi sika tsu níhi, kɛ sika hiɔ níhi kɛkɛ nɛ a naa ngɛ we ngua mi, se mohu nyu yɛmi níhi nɛ a gbɔ, kɛ ekomɛ hu nɛ a puɛ hii mi. A kɛ ekomɛ tsuɔ ní pɔtɛɛ komɛ nɛ a buu, nɛ ekpa komɛ lɛɛ a kɛ tsuɔ ní be saisaa.

21 Ke nɔ ko tsu e he, nɛ e kpa yayami peemi ɔ, a maa ngɔ lɛ kɛ tsu ní ngɛ be titli ko nɛ a buu mi, ejakaa e tsu e he saminya, nɛ e plɛ pee nyu yɛmi nɔ́ pɔtɛɛ ha Nyɔmtsɛ ɔ. Kɛkɛ ɔ, a ma nyɛ maa ngɔ lɛ kɛ tsu ní tsumi kpakpa tsuaa ní tsumi kpakpa be tsuaa be.

22 Lɔ ɔ he ɔ, nihewi a we akɔnɔ yaya a, yu o he kɛ je he kulaa, nɛ o kɛ nihi nɛ yeɔ Kristo anɔkuale nɛ bɔ. Nyɛɛ ba nyɛ je mi saminya kaa Kristo we bi nɛ yeɔ dami sane, nɛ tsuɔ a hemi kɛ yemi he ní; nyɛɛ suɔ nyɛ sibi, nɛ nyɛɛ hi si saminya ngɛ he jɔmi mi.

23 Kuasiahi a nɔ́ jemi nɛ a kase we nɔ́ kpakpa ko kɛ ji mi ɔ, tuu nya fo, ejakaa o le kaa nɔ́ jemi ɔ, kunɔ e kɛ baa.

24 Nyɔmtsɛ ɔ sɔmɔlɔ ɔ, e sɛ́ kaa e pɛɔ, mohu ɔ, e mi nɛ jɔ ha nɔ tsuaa nɔ; e pee ní tsɔɔlɔ kpakpa nɛ toɔ e tsui si.

25 Pi enɛ ɔ kɛkɛ, e sa kaa e pee nɔ nɛ kɛ mi mi jɔmi tuɔ munyu tsɔɔ nihi nɛ tee si kɛ siɔ lɛ ɔ. Alini Mawu maa na jamɛatsɛmɛ ɔmɛ mɔbɔ nɛ a tsake a tsui, konɛ a ba le anɔkuale ɔ.

26 Kɛkɛ ɔ, a maa hɛli a he si, nɛ klama nɛ Abosiami tsɔ ha mɛ kaa a pee e suɔmi nya ní, nɛ a ya nɔ mi ɔ, a ya be mi nɔe.