Tesalonika Bi II, 1

1 ⓐ Paulo, Sila, kɛ Timoteo ngma womi nɛ ɔ ya ha Tesalonika asafo ɔ, nɛ a kɛ wa Tsɛ Mawu, kɛ Nyɔmtsɛ Yesu Kristo pee kake ɔ.

2 Dloomi kɛ he jɔmi nɛ je Tsɛ Mawu ɔ, kɛ Nyɔmtsɛ Yesu Kristo ɔ dɛ mi ɔ ha nyɛ!

A maa gbla nihi a tue

3 Wa nyɛmimɛ! E hia kaa waa na Mawu si daa ha nyɛ. E sa kaa waa pee jã, ejakaa nyɛ hemi kɛ yemi ɔ mi ngɛ wae wawɛɛ nitsɛ, nɛ suɔmi nɛ nyɛ ti nɔ tsuaa nɔ ngɛ kɛ ha e nyɛmi ɔ ngɛ nɔ yae bɔ nɛ sa.

4 Wɔ nitsɛmɛ wa fĩaa fɔɔ nyɛ nɔ ngɛ Mawu asafo ɔmɛ a mi kaa nyɛ ngɛ hemi kɛ yemi nɛ mi wa. Ejakaa be mi nɛ a ngɛ nyɛ yi mi wae, nɛ nyɛ ngɛ nɔ́ nae ɔ, nyɛ to nyɛ tsui si, nɛ nyɛ mia nyɛ hɛ mi kɛ ngɛ ní nɛ ɔmɛ tsuo a mi gblee.

5 Enɛ ɔ tsɔɔ paa kaa Mawu yeɔ dami sane; e ngɔ nɔ́ nɛ nyɛ ngɛ nae nɛ ɔ kɛ ngɛ nyɛ dlae kɛ ha e matsɛ yemi ɔ.

6 Niinɛ, Mawu maa ye dami sane; nihi nɛ ngɛ nyɛ yi mi wae ɔ, Mawu maa hao mɛ ngɔ to nane mi.

7 Nɛ nyɛ ni nɛmɛ nɛ nyɛ ngɛ nɔ́ nae ɔ, e ma ha waa kɛ nyɛ tsuo he jɔmi. E maa pee enɛ ɔ, be mi nɛ Nyɔmtsɛ Yesu maa hia kpo kɛ je hiɔwe kɛ e bɔfo katsɛmɛ ɔmɛ,

8 kɛ la nɛ ngɛ tsoe plamplam. Nihi nɛ li Mawu, kɛ ni nɛmɛ nɛ bui Nyɔmtsɛ Yesu sane kpakpa a, e kɛ mɛ maa to ní.

9 ⓑ A maa gbla a tue, nɛ a hɛ mi ma kpata pɛsɛpɛsɛ kɛ maa ya neneene. A ma je mɛ kɛ je Nyɔmtsɛ ɔ hɛ mi. A be Nyɔmtsɛ ɔ hɛ mi nyami ɔ, kɛ e he wami ɔ nae

10 ligbi ɔ nɛ e maa ba nɛ e ni klɔuklɔu ɔmɛ ma je e yi, nɛ nihi nɛ heɔ lɛ yeɔ maa wo e hɛ mi nyami ɔ. Nɛ nyɛ hu nyɛ maa piɛ a he, ejakaa sɛ gbi ɔ nɛ wa ngɔ ba ha nyɛ ɔ, nyɛ he ye.

11 Enɛ ɔ he je ɔ, daa nɛ ɔ, wa kpaa Mawu pɛɛ ha nyɛ, konɛ nyɛ je mi bami nɛ sa nɔ́ nɛ he nɛ e tsɛ nyɛ ngɛ ɔ. Kɛkɛ ɔ, e maa wo nyɛ hemi kɛ yemi mi he wami, nɛ ní kpakpahi nɛ nyɛ to kaa nyɛ maa pee ɔ, nyɛ maa pee.

12 Kɛkɛ ɔ, nyɛ ní peepee he ɔ, nɔ tsuaa nɔ ma je Nyɔmtsɛ Yesu yi. Nɛ e he ɔ, nyɛ hu nyɛ hɛ mi maa ba nyami ngɛ wa Tsɛ Mawu, kɛ Nyɔmtsɛ Yesu Kristo dloomi ɔ nya.