Yoshua 6

Yeriko hɛ mi kpatami

1 A ngmɛ Yeriko agbo ɔmɛ a mi kpɛii, bɔ nɛ pee nɛ Israel bi ɔmɛ ko na blɔ kɛ sɛ ma a mi. Nɔ ko nɔ ko ji kpo ɔ, nɔ ko nɔ ko bɛ mi.

2 Yawɛ de Yoshua ke, “I ngɔ Yeriko, kɛ a matsɛ ɔ, kɛ a ta buli katsɛmɛ ɔmɛ tsuo ngɔ wo o dɛ.

3 O kɛ o ta buli ɔmɛ tsuo nɛ bɔle ma a si kake daa ligbi. Nyɛɛ pee ja ligbi ekpa.

4 Osɔfohi kpaago nɛ a hɛɛ titimati kpaago nɛ a kɛ agbosu koli pee kɛ nyɛɛ somi daka a hɛ mi. Ligbi kpaagone ɔ nɔ ɔ, nyɛɛ bɔle ma a si kpaago, nɛ osɔfo ɔmɛ nɛ a hi titimati ɔmɛ kpae.

5 Ke nyɛ nu nɛ a kpa bɛ ɔ nɛ e se kɛ ɔ, Israel ma a tsuo nɛ he ose wawɛɛ. Ke nyɛ pee ja a, Yeriko gbogbo ɔmɛ maa hule pue si tɛtlɛɛ. Kɛkɛ ɔ, nɔ tsuaa nɔ ma bu kɛ sɛ ma a mi.”

6 Jehanɛ, Nun bi Yoshua tsɛ osɔfo ɔmɛ nɛ e de mɛ ke, “Nyɛ wo somi daka a, nɛ nyɛ ti nihi kpaago nɛ a hɛɛ titimati kɛ nyɛɛ daka a hɛ mi.”

7 Lɔ ɔ se ɔ, e de mɛ ke, “Nyɛɛ ya nyɛ hɛ mi! Nyɛɛ nyɛɛ kɛ bɔle Yeriko ma a. Nyɛ ha nɛ hlami ta a nɛ sɛ Yawɛ somi daka a hɛ mi.”

8 Lɔ ɔ he ɔ, kaa bɔ nɛ Yoshua fa ma a, hlami ta a hia kɛ́ nyɛɛ osɔfo kpaago ɔmɛ nɛ ngɛ titimati ɔmɛ kpae ɔ a hɛ mi. Osɔfo ɔmɛ nɛ hɛɛ somi daka a nyɛɛ a se, nɛ se ta a gbe nya. Benɛ a yaa a tsuo, titimati ɔmɛ ngɛ pɛe.

9

10 Yoshua fa ma a ke, “Nyɛ ko kpa ngmlaa, nɛ nyɛ ko ha nɛ a nu nyɛ he; nyɛ ko tu munyu kulaa kɛ yaa su ligbi ɔ nɛ ma de nyɛ ke nyɛ he ose.”

11 E ha a kɛ Yawɛ daka a ya bɔle ma a si kake pɛ nɛ a kpale kɛ ba ma sito he ɔ ekohu nɛ a ba hwɔ lejɛ ɔ.

12 E nɔ jena makɛ mla a, Yoshua te si nɛ e kɛ osɔfo ɔmɛ, kɛ tabo ɔ tsuo ya bɔle ma a kaa bɔ nɛ a pee kekleekle ligbi ɔ: hlami ta a hia, nɛ osɔfo ɔmɛ nɛ kpaa titimati ɔmɛ ɔ nyɛɛ se; jehanɛ, osɔfo ɔmɛ nɛ hɛɛ Yawɛ somi daka a ba, nɛ se ta a gbe nya. Benɛ a ngɛ ma a bɔlee ɔ tsuo titimati ɔmɛ ngɛ pɛe.

13

14 Ligbi enyɔne ɔ hu a bɔle ma a si kake, nɛ a kpale kɛ ba a sito he ɔ. A pee ja ligbi ekpa.

15 Ligbi kpaagone ɔ, a te si makɛ mla, nɛ a bɔle ma a jã kɛ̃ si kpaago sɔuu. Jamɛ a ligbi ɔ nɔ pɛ nɛ a bɔle ma a si kpaago.

16 Si kpaagone ɔ, benɛ osɔfo ɔmɛ ma bɔni titimati ɔmɛ kpami pɛ nɛ Yoshua fa ma a ke, “Nyɛ he ose, ejakaa Yawɛ ngɔ ma a ngɔ wo nyɛ dɛ!

17 Nyɛ kpata ma a kɛ e mi nɔ́ tsuaa nɔ́ hɛ mi ha Yawɛ; Rahab, yo ajuama a, kɛ nɔ tsuaa nɔ nɛ kɛ lɛ ngɛ e we ɔ mi ɔ, mɛ pɛ a yi nɛ na wami; ejakaa e ngɔ slaali ɔmɛ nɛ wa tsɔ ɔ kɛ laa.

18 Nyɛɛ yu nyɛ he kɛ je níhi nɛ a ma kpata a hɛ mi ɔ a he, bɔ nɛ pee nɛ nyɛ hɛ ko ba kɔ a nɔ, nɛ nyɛ ba ngɔ eko. Ke nyɛ pee ja a, nyɛɛ kɛ haomi, kɛ hɛ mi kpatami maa ba Israel tsuo nɔ.

19 Sika hiɔ, sika tsu, akɔblee, kɛ dade níhi tsuo lɛɛ a hla kɛ to ha Yawɛ, lɔ ɔ he ɔ, a ngɔ kɛ ba Yawɛ nito he ɔ.”

20 ⓙ Kɛkɛ nɛ osɔfo ɔmɛ bɔni titimati ɔmɛ kpami. Benɛ ma a nu titimati pɛmi ɔ, a he ose wawɛɛ nitsɛ. Kɛkɛ nɛ Yeriko gbogbo ɔ hule pue si. Tabo ɔ tsuo bu kɛ sɛ ma a mi; nɔ tsuaa nɔ nyɛɛ kɛ ya e hɛ mi tɛɛ; nɛ a ya ngɔ ma a.

21 A kɛ klaate kpata nɔ tsuaa nɔ hɛ mi ngɛ ma a mi: nyumuhi, yihi, jokuɛwi, kɛ nikɔtɔmahi. A kpata nahi, tohi, kɛ tejihi hu a hɛ mi.

22 Lɔ ɔ se ɔ, Yoshua de nihewi enyɔ nɛ ya slaa zugba a ke, “Nyɛɛ ya yo ajuama a we ɔ mi nɛ nyɛ ya ngɔ lɛ, kɛ e weku li nɛ ngɛ lejɛ ɔ kɛ ba kaa bɔ nɛ nyɛ ka lɛ kita a.”

23 Kɛkɛ nɛ nihewi ɔmɛ ho nɛ a ya ngɔ Rahab kɛ e tsɛ, kɛ e nyɛ, e nyɛmimɛ ɔmɛ, kɛ e weku li kpa amɛ tsuo kɛ ba. A ha nɛ a kɛ a nyɔguɛ ɔmɛ tsuo ya hi Israel bi ɔmɛ a ma sito he ɔ se.

24 Jehanɛ, a kɛ la sa ma a, kɛ e mi níhi tsuo; se sika hiɔ, sika tsu, akɔblee, kɛ dade níhi lɛɛ a kɛ to Yawɛ we ɔ nito he ɔ.

25 ⓚ Yoshua baa Rahab, yo ajuama a, kɛ e weku li ɔmɛ tsuo a yi; ejakaa e ngɔ slaali enyɔ ɔmɛ nɛ Yoshua tsɔ Yeriko ɔ kɛ laa. Rahab nina kɛ Israel bi ɔmɛ ngɛ kɛ ba si mwɔnɛ ɔ.

26 ⓛ Jamɛ a be ɔ mi ɔ, Yoshua ka kita ke, “Nɔ tsuaa nɔ nɛ maa ka kaa e maa ma Yeriko ekohu ɔ, Yawɛ nɛ gbiɛ lɛ. Nɔ nɛ maa to sisi ɔ, e bitɛte nɛ gbo, nɔ nɛ maa gbe nya nɛ a maa ma nya agbo ɔ, e binakutso nɛ gbo.”

27 Yawɛ piɛ Yoshua he, nɛ e he biɛ kpakpa ngɛ zugba a nɔ tsuo.