Yoshua 1

Mawu fa Yoshua ke e ya ngɔ Kanaan zugba a

1 Yawɛ tsɔlɔ Mose gbenɔ se ɔ, Yawɛ de Nun bi Yoshua, nɛ ji Mose sɔmɔlɔ ɔ

2 ke, “Ye tsɔlɔ Mose gbo; lɔ ɔ he ɔ, o kɛ Israel ma a tsuo nyɛ dla nɛ nyɛ ya po Yordan pa a kɛ ya zugba a nɛ i ngɔ ha mɛ ɔ nɔ.

3 ⓐ Kaa bɔ nɛ i wo Mose si ɔ, i kɛ he tsuaa he nɛ nyɛ nane maa ma a ha nyɛ.

4 Nyɛ huzu maa je nga a nɔ ngɛ leneyi je, kɛ ya su Lebanon ngɛ omleyi je; jehanɛ, kɛ je Yufrate pa a nya ngɛ beleku je, kɛ gu Hit bi ɔmɛ a zugba a mi, kɛ ya ta Mediterenia wo ɔ nya ngɛ bonyoku je tɔɔ.

5 ⓑ Nɔ ko nɔ ko be mo nyɛe o wami be ɔ tsuo. Bɔ nɛ i kɛ Mose hi si ɔ, jã kɛ̃ i kɛ mo, Yoshua hu maa hi si. I be mo sie, nɛ i be mo kuae hulɔ.

6 ⓒ O he nɛ wa, nɛ o pee kã; ejakaa mo nɛ o maa nyɛɛ ma nɛ ɔ hɛ mi kɛ ya ngɔ zugba a nɛ i ka a nɛmɛ ɔmɛ kita ke i kɛ ma ha mɛ ɔ nɛ.

7 Kaa bɔ nɛ i ngɛ dee ɔ, moo lɛɛ o he nɛ wa, nɛ o pee kã kɛkɛ; lɔ ɔ ji kaa, o maa ye mlaa a tsuo nɛ ye tsɔlɔ Mose wo mo ɔ nɔ sisiisi. Kó si ekoeko, nɛ he tsuaa he nɛ o maa ya a, o maa ye manye.

8 Moo kane mlaa womi nɛ ɔ daa. Mo susu he nyɔ kɛ pia; nɛ o ye nɔ́ tsuaa nɔ́ nɛ a ngma ngɛ mi ɔ nɔ; ja jã loko níhi a mi maa hi ha mo, nɛ o maa ye manye.

9 Ná nɛ o le kaa imi nitsɛ nɛ i ngɛ mo fae ke o he nɛ wa, nɛ o pee kã a nɛ. Koo nu sawale, nɛ o nine mi ko je wu. He tsuaa he nɛ o maa ya a, imi, Yawɛ, o Mawu ɔ, ma piɛ o he kɛ ya.”

Yoshua fa ma a nɔ hyɛli ɔmɛ

10 Jehanɛ, Yoshua fa ma a nɔ hyɛli ɔmɛ ke

11 a ya kpa ma sito he ɔ, nɛ a de ni ɔmɛ ke, “Nyɛ hla blɔ hiami niye ní kɛ to; ejakaa hiɛmɛ nɛ ɔ ligbi etɛ ɔ, nyɛ maa po Yordan pa a kɛ ya ngɔ zugba a nɛ Yawɛ, nyɛ Mawu ɔ kɛ ha nyɛ ke nyɛ nɔ́ ɔ.”

12 ⓓ Yoshua de Ruben kɛ Gad bi ɔmɛ, kɛ Manase wɛtso fa a ke,

13 “Nyɛ kai kaa Yawɛ tsɔlɔ Mose de nyɛ ke Yawɛ, nyɛ Mawu ɔ ma ha nyɛ zugba nɛ ɔ ngɛ Yordan beleku je, nɛ e maa pee nyɛ hi he.

14 Nyɛ yi ɔmɛ, nyɛ bimɛ tsɔwi ɔmɛ, kɛ nyɛ we mi lohwe ɔmɛ maa hi hiɛ ɔ, se nyɛ kpɛti nyumuhi nɛ su ta yami nya a tsuo maa mia kɛ nyɛɛ nyɛ nyɛmimɛ Israel bi ɔmɛ a hɛ mi, nɛ a maa piɛ a he

15 kɛ yaa su be nɛ mɛ hu a nine maa su zugba a nɛ ngɛ Yordan bonyoku je ɔ nɔ. Zugba nɛ ɔ ji nɔ́ nɛ Yawɛ, nyɛ Mawu ɔ ngɔ ha mɛ ɔ nɛ. Lɔ ɔ se ɔ, nyɛɛ kpale kɛ ba nyɛ nitsɛmɛ nyɛ hi he nɛ ji zugba a nɛ ngɛ Yordan beleku je, nɛ́ Yawɛ tsɔlɔ Mose ngɔ ha nyɛ ɔ nɔ.”

16 A ha Yoshua heto ke, “Nɔ́ tsuaa nɔ́ nɛ o fa wɔ ke waa pee ɔ, wa maa pee, nɛ he tsuaa he nɛ o tsɔ wɔ ɔ, wa maa ya.

17 Bɔ nɛ wa bu Mose tue ngɛ nɔ́ tsuaa nɔ́ mi ɔ, jã kɛ̃ wa maa bu mo hu tue. Yawɛ, o Mawu ɔ kɛ mo nɛ hi si kaa bɔ nɛ e kɛ Mose hi si ɔ.

18 Nɔ tsuaa nɔ nɛ ma tsɔ o hɛ mi atuã, nɛ e be mo tue bue ɔ, a gbe lɛ. Moo lɛɛ o he nɛ wa, nɛ o pee kã saminya kɛkɛ.”