Tesalonika Bi I, 5

Nyɛ dla nyɛ he ngɔ to Nyɔmtsɛ ɔ bami

1 Nyɛmimɛ, be tutuutu nɛ ní nɛ ɔmɛ maa ba mi ɔ, e hia we kaa waa ngma nyɛ.

2 ⓘ Ejakaa nyɛ nitsɛmɛ nyɛ le tsɔ kaa Nyɔmtsɛ ɔ maa ba tlukaa kaa bɔ nɛ julɔ baa nyɔ mi.

3 Be mi nɛ nihi ma de ke, “Wa he mi jɔ wɔ, nɛ wa tue mi hu jɔ wɔ” ɔ, jamɛ a be ɔ mi nɔuu nɛ a hɛ mi ma kpata tlukaa kaa bɔ nɛ yo nɛ mi wa nuɔ kɔɔmi si kake too ɔ; nɛ nɔ ko nɔ ko be e he yee.

4 Se nyɛmimɛ, nyɛɛ lɛɛ pi diblii mi nɛ nyɛ ngɛ nɛ ligbi ɔ ma ba ti nyɛ si kaa julɔ.

5 Ejakaa nyɛ tsuo pɛpɛɛpɛ la bimɛ ji nyɛ; ee, piani bimɛ ji nyɛ; wa pi nyɔ, loo diblii bimɛ.

6 Lɔ ɔ he ɔ, wa ko hwɔ mahe kaa bɔ nɛ ni kpahi peeɔ ɔ; se mohu waa hi hɛ ngmengmle, nɛ wa hɛ mi nɛ ka si.

7 Ejakaa nyɔ mi nɛ a hwɔɔ mahe, nɛ nyɔ mi dã deli deɔ dã.

8 ⓙ Se wɔɔ lɛɛ piani bimɛ ji wɔ, nɛ e hia kaa wa hɛ mi nɛ ka si. Wa hemi kɛ yemi, kɛ suɔmi ɔ mi nɛ wa kaa dama, nɛ hɛ kɛ nɔ fɔmi kaa a ma he wa yi wami ɔ, lɔ ɔ hu mi nɛ wa kaa dade pɛɛ.

9 Mawu hla we wɔ kɛ to, nɛ e na wa he abofu. Se mohu, e wo wɔ kɛ to, konɛ e he wa yi wami kɛ gu wa Nyɔmtsɛ Yesu Kristo nɔ.

10 Kristo ba gbo ha wɔ, bɔ nɛ pee nɛ wa hɛ ngɛ jio, wa gbo jio, waa kɛ lɛ nɛ hi si.

11 Lɔ ɔ he ɔ, nyɛɛ wo nyɛ sibi he wami, nɛ nyɛɛ ye bua nyɛ sibi kaa bɔ nɛ nyɛ ngɛ pee amlɔ nɛ ɔ.

Nyagbe ga womi kɛ sɛ yemi

12 Wa kpa nyɛ pɛɛ, nyɛmimɛ, nɛ nyɛɛ bu nihi nɛ ngɛ ní tsue ngɛ nyɛ kpɛti ɔ, Nyɔmtsɛ ɔ asafo ɔ hɛ mi nyɛɛli nɛ tuɔ munyu tsɔɔ nyɛ ɔ.

13 Nyɛɛ bu mɛ saminya, nɛ nyɛɛ suɔ mɛ ngɛ ní tsumi nɛ a ngɛ tsue ɔ he. Nyɛ nitsɛmɛ hu, nyɛɛ hi si ngɛ tue mi jɔmi mi.

14 Ye nyɛmimɛ nɛ i suɔ, wa kpa nyɛ pɛɛ! Nyɛɛ tu munyu ngɔ tsɔɔ hejɔtsɛmɛ ɔmɛ; nyɛɛ wo ni nɛmɛ nɛ be tsui ɔ he wami; nyɛɛ ye bua ni nɛmɛ nɛ gbɔjɔ ɔ, nɛ nyɛɛ to nyɛ tsui si ha nɔ tsuaa nɔ.

15 Nyɛɛ hyɛ nɛ nyɛ ti nɔ ko kó pee yayami kɛ to yayami nane mi. Se mohu daa nɛ ɔ, nyɛɛ bɔ mɔde kaa nyɛ maa pee kpakpa ha nyɛ sibi, kɛ nihi tsuo.

16 Nyɛ na bua jɔmi daa;

17 nyɛɛ sɔle be tsuaa be;

18 nyɛɛ na Mawu si ngɛ nɔ́ tsuaa nɔ́ he. Nyɛ nihi nɛ nyɛ ngɛ Kristo Yesu mi ɔ, enɛ ɔ ji nɔ́ nɛ Mawu suɔ kaa nyɛɛ pee.

19 Nyɛ ko gbe Mumi Klɔuklɔu ɔ.

20 Nyɛ kó ha gbali ɔmɛ a sɛ gbi nɛ pee nyɛ tai.

21 Nyɛɛ ka nɔ́ tsuaa nɔ́ hyɛ. Nɔ́ nɛ hi ɔ, nyɛɛ pɛtɛ he nɛ wa;

22 se nɔ́ tsuaa nɔ́ nɛ ji yayami ɔ lɛɛ nyɛɛ hɛ nyɛ kɛ je he.

23 Mawu, nɔ nɛ haa wɔ he jɔmi ɔ, lɛ nitsɛ nɛ tsukɔ nyɛ he kulaa kɛ pi si. E hyɛ nyɛ mumi, nyɛ klaa, kɛ nyɛ nɔmlɔ tso ɔ kulaa nɔ nɛ piami ko kó hi he be mi nɛ wa Nyɔmtsɛ Yesu Kristo maa ba a.

24 Nɔ nɛ tsɛ nyɛ ɔ, anɔkualetsɛ ji lɛ; nɛ e maa pee hulɔ.

25 Ye nyɛmimɛ nɛ i suɔ, nyɛɛ sɔle ha wɔ.

26 Nyɛ nga nyɛmimɛ ɔmɛ tsuo ha wɔ kɛ suɔmi nɛ mi wa.

27 I ngɛ nyɛ fae ngɛ Nyɔmtsɛ ɔ biɛ mi kaa nyɛɛ kane womi nɛ ɔ ha nyɛmimɛ ɔmɛ tsuo.

28 Wa Nyɔmtsɛ Yesu Kristo dloomi ɔ kɛ nyɛ nɛ hi si.