Tesalonika Bi I, 3

A tsɔ Timoteo

1 ⓕ Benɛ wa nyɛ we hu ɔ, wa kplɛɛ kaa wa maa tlɔ Atene kɛkɛ.

2 Lɔ ɔ he ɔ, wa tsɔ Timoteo, wa nyɛmi nɛ waa kɛ lɛ tsuɔ ní kaa Mawu sɔmɔlɔ kɛ fiɛɔ Kristo he sane kpakpa a. Wa tsɔ lɛ, konɛ e ba wo nyɛ he wami, nɛ e ha nyɛ fi si ngɛ nyɛ hemi kɛ yemi ɔ mi,

3 bɔ nɛ pee nɛ amanehlu nɛ ngɛ bae ɔ ko wo nyɛ ti nɔ ko he gbeye. Nyɛ nitsɛmɛ nyɛ le kaa nɔ́ nɛ Mawu to kɛ ha wɔ ji lɔ ɔ nɛ.

4 Benɛ waa kɛ nyɛ ngɛ ɔ, wa de nyɛ ngɔ to kaa wa maa na amanehlu. Nɛ kaa bɔ nɛ nyɛ le ɔ, lɔ ɔ pɛ lɛ ba mi nɛ ɔ nɛ.

5 Kaa bɔ nɛ i de ɔ, benɛ i nyɛ we tsui tomi hu ɔ, e hia kaa ma tsɔ Timoteo nyɛ ngɔ, nɛ́ e ba hyɛ kaa nyɛ hemi kɛ yemi ɔ mi wa kɛ mwɔɔ lo. I ya ye gbeye kaa alini Abosiami ba ka nyɛ, nɛ e ha nɛ wa dengme nɛ wa gbo ɔ maa pee yaka.

6 ⓖ Amlɔ nɛ ɔ, Timoteo kpale kɛ ba, nɛ e ba bɔ wɔ amaniɛ saminyayoo nɛ kɔɔ nyɛ hemi kɛ yemi, kɛ nyɛ suɔmi ɔ he. E ba de wɔ ke nyɛ susuɔ wa he daa nɛ, nɛ nyɛ hɛ jaa ngɛ wa he kaa bɔ nɛ wɔ hu wa hɛ jaa ngɛ nyɛ he ɔ.

7 Lɔ ɔ he ɔ, nyɛmimɛ, nyɛ hemi kɛ yemi ɔ woɔ wɔ he wami ngɛ amanehlu, kɛ nɔ́ nɛ wa ngɛ nae nɛ ɔ mi.

8 Ke nyɛ maa ngɔ nyɛ he ngɔ mɛtɛ Nyɔmtsɛ ɔ kulaa a, wɔ hu wa ma na he wami he.

9 Nyɛ he ɔ, Mawu haa wɔ bua jɔmi babauu nɛ wa be nyɛe maa na lɛ si saasaa.

10 Daa nyɔ kɛ pia a, wa kpaa lɛ pɛɛ kɛ wa tsui tsuo kaa waa na nyɛ hɛ mi kɛ hɛ mi, konɛ waa wo nyɛ hemi kɛ yemi ɔ mi he wami.

11 Wa Tsɛ Mawu ɔ nitsɛ, kɛ wa Nyɔmtsɛ Yesu nɛ a bli blɔ ha wɔ nɛ waa ba nyɛ ngɔ ekohu.

12 Nyɔmtsɛ ɔ nɛ ha nyɛ suɔmi ɔ mi nɛ wa, konɛ nyɛɛ suɔ nyɛ sibi, kɛ nimli adesahi tsuo kaa bɔ nɛ wɔ hu wa suɔ nyɛ ɔ.

13 Nɛ e wo nyɛ he wami, nɛ nyɛɛ kɛ tsui nɛ he tsɔ nɛ ba nyɛ je mi bɔ nɛ piami ko be nyɛ he hie ngɛ wa Tsɛ Mawu ɔ hɛ mi be mi nɛ wa Nyɔmtsɛ Yesu kɛ e ni klɔuklɔu ɔmɛ tsuo maa ba a.