Tesalonika Bi I, 1

1 ⓐ Imi Paulo, Sila, kɛ Timoteo, wa ngɛ womi nɛ ɔ ngmae kɛ ya ha asafo mi bi nɛ ngɛ Tesalonika, nɛ ngɛ Tsɛ Mawu, kɛ Nyɔmtsɛ Yesu Kristo mi ɔ. Dloomi kɛ he jɔmi ha nyɛ!

Tesalonika bi a si himi, kɛ a hemi kɛ yemi

2 Wa naa Mawu si daa kɛ haa nyɛ tsuo, nɛ daa ke wa ngɛ sɔlee ɔ, wa woɔ nyɛ ta.

3 Wa kaiɔ nyɛ ngɛ wa Tsɛ Mawu hɛ mi bɔ nɛ nyɛ hemi kɛ yemi ɔ jeɔ kpo ngɛ nyɛ ní tsumi mi, bɔ nɛ suɔmi nɛ nyɛ ngɛ ɔ ha nɛ nyɛ tsu ní wawɛɛ, kɛ bɔ nɛ nyɛ ngɔ nyɛ hɛ kɛ fɔ wa Nyɔmtsɛ Yesu Kristo nɔ wawɛɛ nitsɛ.

4 Nyɛmimɛ, wa le kaa Mawu suɔ nyɛ, nɛ e hla nyɛ kɛ pee lɛ nitsɛ e nihi.

5 Sane kpakpa a nɛ wa ngɔ ba ha nyɛ ɔ, pi munyu kɛkɛ nɛ wa ba tu. Nɔ́ nɛ wa ba de nyɛ ɔ wo nyɛ he wami, nɛ Mumi Klɔuklɔu ɔ bli nyɛ juɛmi nya, nɛ nyɛ na kaa munyu ɔ nɛ wa kɛ ba a, anɔkuale sɔuu. Benɛ wa ngɛ nyɛ ngɔ ɔ, nyɛ le bɔ nɛ waa kɛ nyɛ hi si ha. Wa pee ja, konɛ e hi ha nyɛ nitsɛmɛ.

6 ⓑ Nyɛ kase waa kɛ Nyɔmtsɛ ɔ tsuo, ejakaa benɛ a ngɛ nyɛ yi mi wae ɔ, Mawu Klɔuklɔu ɔ wo nyɛ he wami, nɛ nyɛɛ kɛ bua jɔmi he sɛ gbi ɔ.

7 Enɛ ɔ he je ɔ, nyɛ ba pee nɔ hyɛmi nɔ́ ha nihi nɛ he ye ngɛ Makedonia kɛ Akaya tsuo.

8 Pi Makedonia kɛ Akaya kɛkɛ nɛ Nyɔmtsɛ ɔ sɛ gbi ɔ nɛ nyɛ fiɛ ɔ gbɛ fĩa a, se he tsuaa he ɔ, a nu nyɛ hemi kɛ yemi nɛ nyɛ ngɛ ngɛ Mawu mi ɔ hu he. Enɛ ɔ he je ɔ, e hia we kaa wɔɔ wa deɔ nɔ́ ko hu.

9 Ni ɔmɛ tsuo yeɔ nyɛ he odase kpakpa kaa benɛ wa ba slaa nyɛ ɔ, nyɛ he wɔ atuu. Jehanɛ ɔ hu, nyɛ kpale kɛ je amagahi a se kɛ ba Mawu ngɔ, konɛ nyɛ ba sɔmɔ anɔkuale Mawu hɛ kalɔ ɔ.

10 Mawu Bi Yesu ɔ nɛ Mawu tle lɛ si kɛ je gbeje ɔ, a tsɔɔ kaa nyɛ ngɛ lɛ blɔ hyɛe kaa e maa je hiɔwe kɛ ba ekohu. Lɛ ji nɔ nɛ ma je wɔ kɛ je tue gblami nɛ ma a mi.