Efeso Bi 2

Kɛ je gbenɔ mi kɛ ba wami mi

1 ⓕ Sa a, nyɛ ngɛ kaa nihi nɛ gbo, ejakaa nyɛ gbo Mawu tue, nɛ nyɛ pee yayami kɛ si lɛ.

2 Jamɛ a be ɔ, nɔ́ nɛ je nɛ ɔ peeɔ ɔ, lɔ ɔ nyɛ hu nyɛ peeɔ. Nyɛ ya nyɛɛ nɔ nɛ yeɔ mumi yayami ɔmɛ a nɔ ngɛ kɔɔhiɔ mi ɔ se. Nihi nɛ gboɔ Mawu tue ɔ, mumi nɛ ɔ lɛ ngɛ ní tsue ngɛ a mi amlɔ nɛ ɔ.

3 Niinɛ, sa a, wɔ tsuo pɛpɛɛpɛ wa ngɛ kaa mɛ; nɛ akɔnɔ yaya nɛ ngɛ wa mi ɔ jeɔ kpo ngɛ wa ní peemi níhi a mi. Níhi nɛ wa nɔmlɔ tso ɔ, kɛ wa juɛmi suɔ ɔ, lɔ ɔmɛ wa peeɔ. Akɛnɛ adesa kɛkɛ ji wɔ kaa bɔ nɛ nihi tsuo ngɛ ɔ, e fɔɔ si paa kaa Mawu maa gbla wa tue. Mawu mi mi fu wɔ kaa bɔ nɛ e mi mi fu adesahi tsuo ɔ, ejakaa wa pee yayami kɛ si lɛ.

4 Se Mawu lɛɛ e mɔbɔ nami ɔ hiɛ babauu; jã kɛ̃ nɛ suɔmi nɛ e ngɛ kɛ ha wɔ ɔ hu kle.

5 Lɔ ɔ he ɔ, be mi nɛ wa gbo tue, nɛ wa pee kaa nihi nɛ gbo ɔ, e ha wa ba wami mi ekohu benɛ e tle Kristo si kɛ je gbeje ɔ. Dloomi nya nɛ a he nyɛ yi wami.

6 Mawu tle waa kɛ Kristo si, konɛ waa kɛ lɛ tsuo nɛ ye tsɛ ngɛ hiɔwe ejakaa wa ngɛ e mi.

7 E pee enɛ ɔ, konɛ e kɛ tsɔɔ yi nɔhi tsuo nɛ maa ba hwɔɔ se ɔ kaa Kristo Yesu he ɔ, e suɔ wɔ saminya, nɛ e dloo wɔ babauu.

8 Mawu dloomi nya nɛ a he nyɛ yi wami akɛnɛ nyɛ he ye ɔ. Pi dengme ko nɛ nyɛ nitsɛmɛ nyɛ gbo he je; e ji nɔ́ nɛ Mawu ke nyɛ, bɔ nɛ pee nɛ nɔ ko nɔ ko ko fĩa.

9

10 Mawu nitsɛ lɛ pee wɔ bɔ nɛ wa ngɛ nɛ ɔ. E ha waa kɛ Kristo Yesu ba nu huɛ, bɔ nɛ pee nɛ waa ngɔ wa wami be ɔ tsuo kɛ pee nihi kpakpa. E to blɔ nya nɛ ɔ blema lokoo konɛ waa nyɛɛ ngɛ nya.

Waa kɛ Kristo pee kake

11 Ma je li, pi Yuda fɔfɔɛ ji nyɛ. Ni nɛmɛ nɛ deɔ ke mɛɛ lɛɛ Mawu nitsɛ e nihi ji mɛ ɔ, bɔ nɛ a tsɛɔ nyɛ ji mɔmlɔtɔtsɛmɛ. A tsɛɔ nyɛ jã, ejakaa a po mɛ; se lɔ ɔ po nɔ́ ko kɛkɛ nɛ adesa pee. Lɔ ɔ he ɔ, nyɛ kai bɔ nɛ nyɛ ngɛ sa be ko ɔ.

12 Jamɛ a be ɔ, nyɛ li Kristo. Nihi nɛ Mawu hla a, nyɛ be a kpɛti; lɔ ɔ he ɔ, nibwɔhi ji nyɛ. Somi nɛ Mawu kɛ e ni ɔmɛ so, kɛ si nɛ e wo mɛ ɔ, nyɛ piɛ we he. Nyɛ hi si ngɛ je ɔ mi kɛkɛ, nɛ nyɛɛ kɛ nyɛ hɛ fɔ we nɔ́ ko nɔ; Mawu nitsɛ tete nyɛ li lɛ.

13 Sa a, nyɛɛ kɛ Mawu nyɛ kpɛti kɛ wawɛɛ nitsɛ. Se jehanɛ ɔ nɛ kɛ gu Kristo muɔ ɔ nɔ ɔ, nyɛ ba ngɛ Kristo Yesu mi ɔ, a kpale nyɛ kɛ ba Mawu kasa nya haa. Gbenɔ nɛ Kristo gbo, nɛ e ngɔ e he ngɔ sã bɔ ɔ, lɔ ɔ lɛ tsu enɛ ɔ.

14 Ejakaa Kristo nitsɛ ba pee Yuda bi, kɛ ma je li kake, nɛ enɛ ɔ ha nɛ he jɔmi ba. Ninyɛ nɛ pee kaa gbogbo ngɛ Yuda bi kɛ ma je li a kpɛti ɔ, Kristo ha nɛ jamɛ a ninyɛ ɔ se po gbidigbidi.

15 ⓖ Kristo gbo nɛ e kɛ po Yuda bi a mlaa a, kɛ a kɔ ɔmɛ a mi, nɛ e pee Yuda bi ɔmɛ, kɛ ma je li ɔmɛ kake ngɛ lɛ nitsɛ e mi; nɛ enɛ ɔ kɛ he jɔmi ba.

16 ⓗ Kristo gbo ngɛ sɛumi tso ɔ nɔ ɔ nɛ e kɛ dla ni enyɔ ɔmɛ kɛ Mawu a kpɛti kaa nɔmlɔ tso kake; nɛ e ha niyɛ nɛ ngɛ a kɛti ɔ se po ninyɛ nɛ ngɛ ni enyɔ ɔmɛ a kpɛti ɔ se po.

17 ⓘ Lɔ ɔ he ɔ, Kristo ba nɛ e ba fiɛ sane kpakpa a nɛ haa nɔ he jɔmi ɔ ngɔ tsɔɔ nihi tsuo. E fiɛ ngɔ tsɔɔ nyɛ ma je li nɛ sa a nyɛɛ kɛ Mawu kpɛti kɛ ɔ, kɛ Yuda bi nɛ mɛɛ lɛɛ a ngɛ e kasa nya haa a.

18 Yuda bi jio, ma je li jio, Kristo nɔ lɛ wɔ tsuo wa maa gu kɛ ba Tsɛ ɔ ngɔ. Mumi Klɔuklɔu kake ɔ nɔuu lɛ maa piɛ wa he.

19 Lɔ ɔ he ɔ, nyɛ ma je li, jehanɛ ɔ nyɛ pi nibwɔhi, loo ma se bi hu, se mohu nyɛɛ kɛ ni klɔuklɔu ɔmɛ tsuo peeɔ ma mi bi, kɛ Mawu we bi.

20 Sisi tomi nɛ a fia nyɛ ngɔ ma nɔ ji sɛ gbi ɔ nɛ bɔfo ɔmɛ, kɛ gbali ɔmɛ fiɛ ɔ; nɛ Kristo Yesu nitsɛ ngɛ kaa tsu ɔ kɔ nya tɛ.

21 Lɛ ji nɔ nɛ ha nɛ tsu ɔ he ní slɔɔto ɔmɛ tsuo nu a he kɛ da si kpɛkpɛtɛɛ. Lɛ nɛ e haa tsu ɔ waa, nɛ e ba peeɔ sɔlemi we klɔuklɔu nɛ a hla ngɔ to ha Nyɔmtsɛ ɔ.

22 Nyɛ hu mumi ɔ ngɔ nyɛɛ kɛ ni nɛmɛ nɛ heɔ yeɔ tsuo ngɔ mɛtɛ Kristo he, nɛ nyɛ ba pee Mawu sihi he.