Introduction
Galatia Bi
NYA TSƆƆMI Benɛ sane kpakpa a nɛ kɔɔ Kristo he ɔ bɔni gbɛmi kɛ fiami, nɛ ma je li ɔmɛ he munyu ɔ atuu ɔ, sane ko ba te si kaa loko nɔ ko maa pee Kristo se nyɛɛlɔ kpakpa a, anɛ e hia doo kaa e ye Mose mlaa a nɔ lo? Paulo tsɔɔ nya kaa e hia we kulaa. E ya nɔ nɛ e de ke, anɔkuale mi ɔ, nɔ́ nɛ he hia mohu ji kaa nɔ nɛ kɛ Kristo ngɛ bɔe ɔ, e he Kristo nɛ e ye; ejakaa kɛ gu e nɔ lɛ a dlaa nɔ kɛ Mawu a kpɛti. Se ni komɛ ba sɛ asafo ɔmɛ a mi ngɛ Galatia kpokpa a nɔ; a te si kɛ si Paulo tsɔɔmi ɔ. Mɛɛ lɛɛ a ke loko a ma dla nɔ ko kɛ Mawu a kpɛti ɔ, ja e ye Mose mlaa a hu nɔ. Galatia ji Roma nɔ yemi he ko ngɛ Asia Mainɔ. Paulo ngma womi nɛ ɔ ya ha Galatia asafo ɔ, konɛ nihi tsuo nɛ a ngɛ a tue puɛe kɛ kikɛmɛ a lakpa tsɔɔmi ɔ, a kpale kɛ ba pɛtɛ anɔkuale hemi kɛ yemi ɔ he ekohu. Kekleekle ɔ, blɔ nya nɛ e na kaa a tsɛɔ lɛ Yesu Kristo bɔfo ɔ, Paulo tsɔɔ nya. E ma nɔ mi kaa Mawu nitsɛ nɛ tsɛ lɛ ke e ba pee bɔfo, se pi nɔmlɔ adesa. E tsɔɔ kaa ma je li ɔmɛ titli a ngɔ a tsɔ lɛ, se pi Yuda bi. Paulo ya nɔ nɛ e tsɔɔ nya kaa hemi kɛ yemi pɛ nɔ a guɔ kɛ dlaa nɔ kɛ Mawu a kpɛti. Ngɛ womi ɔ nyagbe blɔ ɔ, Paulo tsɔɔ kaa Kristo se nyɛɛlɔ je mi babɛ jeɔ kpo paa ngɛ hemi kɛ yemi nɛ e ngɛ ngɛ Kristo mi ɔ mi. Nɔ́ nɛ kɛ hemi kɛ yemi nɛ ɔ baa ji suɔmi. Bɔ ne a dla womi ɔ mi ha • Sisije 1.1-10
• He nɛ Paulo na he wami kɛ je nɛ e ba pee bɔfo 1.11—2.21
• Sane kpakpa nɛ Mawu na wɔ mɔbɔ nɛ e ha wɔ ɔ 3.1—4.31
• He yemi nɛ Kristo se nyɛɛlɔ ná, kɛ e he ní tsumi 5.1—6.10
• Nyagbe 6.11-18
• He nɛ Paulo na he wami kɛ je nɛ e ba pee bɔfo 1.11—2.21
• Sane kpakpa nɛ Mawu na wɔ mɔbɔ nɛ e ha wɔ ɔ 3.1—4.31
• He yemi nɛ Kristo se nyɛɛlɔ ná, kɛ e he ní tsumi 5.1—6.10
• Nyagbe 6.11-18