Galatia Bi 2

Bɔfo kpa amɛ he Paulo ngɔ wo a kpɛti

1 ⓔ Jeha nyɔngma kɛ eywiɛ se ɔ, i kɛ Barnaba kpale kɛ ya Yerusalem ekohu, nɛ i ngɔ Tito hu ngɔ piɛ ye he.

2 Mawu lɛ je tsɔɔ mi kaa ma ya Yerusalem, nɛ i ya. I kɛ nihi nɛ a buu mɛ ɔ kɔklɔɔ ya kpe, nɛ sɛ gbi nɛ i ngɛ fiɛe ha ma je li ɔmɛ ɔ, i tsɔɔ mɛ nya, bɔ nɛ pee nɛ ní tsumi nɛ i tsu kɛ sɛ hlami, kɛ nɔ́ nɛ i ngɛ tsue amlɔ nɛ ɔ pee yaka.

3 Tito nɛ i kɛ lɛ ngɛ ní tsue ɔ, nɔ ko nyɛ́ e nɔ doo ke a po lɛ, pohu Hela no ji lɛ.

4 Se nyɛmimɛ ɔmɛ a ti lakpatsɛmɛ komɛ gu ga blɔ nɔ kɛ sɛ asafo ɔ mi nigii kɛ ngɛ hlae nɛ a hyɛ bɔ nɛ a maa pee kɛ puɛ he yemi nɛ Kristo ha wɔ ɔ, konɛ a ye wɔ nyɔguɛ.

5 Akɛnɛ wa suɔ kaa nyɛ nine nɛ su anɔkuale ɔ tsuo nɛ ngɛ sane kpakpa a mi ɔ nɔ sisiisi he je ɔ, wa ngɔɛ a munyu ɔ.

6 ⓕ Se ni nɛmɛ nɛ a buu mɛ kaa a ngɛ biɛ ɔ, bɔ tsuaa bɔ nɛ a ngɛ sa a, pi ye he sane ko. Mawu hyɛ we nimli a hɛ mi; ejakaa imi lɛɛ ni nɛmɛ nɛ a buu mɛ ɔ tsɔɔ we mi nɔ́ ko ngɔ piɛ he.

7 Mohu ɔ, a na paa kaa ní tsumi pɔtɛɛ nɛ Mawu ha mi ji kaa ma fiɛ sane kpakpa a ha ma je li kaa bɔ nɛ a hla Petro kaa e fiɛ sane kpakpa a ha Yuda bi ɔ.

8 Ejakaa Mawu nɛ́ gu Petro nɔ kɛ tsu ní ngɛ Yuda bi a kpɛti ɔ, lɛ nɔuu lɛ gu ye nɔ kɛ tsu ní ngɛ ma je li ɔmɛ a kpɛti.

9 Yakobo, Petro, kɛ Yohane nɛ a buu mɛ kaa asafo ɔ mi titimahi ɔ na paa kaa Mawu dloo mi babauu, nɛ e tu ní tsumi pɔtɛɛ nɛ ɔ ngɔ wo ye dɛ; lɔ ɔ he ɔ, mɛ hu a sa i kɛ Barnaba wa dɛ mi kɛ he wɔ atuu kaa nihi nɛ kɛ mɛ ngɛ ní tsumi kake tsue. Wa ma nya si kaa i kɛ Barnaba maa ya ma je li ɔmɛ a ngɔ, konɛ mɛɛ lɛɛ a ya Yuda bi ɔmɛ a ngɔ.

10 Nɔ́ kake nɛ a kai wɔ wawɛɛ ngɛ he ji kaa wa hɛ ko je ohiatsɛmɛ ɔmɛ a nɔ; nɛ enɛ ɔ hu ji nɔ́ ko nɛ ngɛ ye tsui nɔ kaa ma pee.

Paulo ka Petro hɛ mi ngɛ Antiokia

11 Benɛ Petro ba Antiokia a, i ka e hɛ mi ngɛ ma hɛ mi; ejakaa nɔ́ nɛ e pee ɔ dɛ kulaa.

12 Yakobo tsɔ ni komɛ kɛ ba Antiokia. Benɛ tsɔli ɔmɛ na we nɛ a ba a, Petro kɛ ma je li ɔmɛ yeɔ ní. Se benɛ tsɔli ɔmɛ ba su ɔ, Petro tsɔ e he kɛ je a he nɛ e kɛ mɛ yi ní hu, ejakaa e ngɛ nihi nɛ deɔ ke a po ma je li ɔmɛ doo ɔ, gbeye yee.

13 Yuda bi nɛ piɛ ɔ hu pee jamɛ a osato ɔ, nɛ Barnaba tete po a gbla lɛ kɛ wo osato peemi nɛ ɔ mi.

14 Benɛ i na kaa a nyɛɛ we ngɛ sane kpakpa a nya anɔkuale mi ɔ, i ka Petro hɛ mi ngɛ ni ɔmɛ tsuo a hɛ mi. I de lɛ ke, “Mo Yuda no ɔ, o peeɔ o ní kaa ma je no, se pi Yuda no! Kɛ peeɔ kɛɛ nɛ o nyɛɔ ma je li ɔmɛ a nɔ nɛ a pee a ní kaa Yuda bi ɔ?”

Hemi kɛ yemi a kɛ heɔ Yuda bi kɛ ma je li a yi wami

15 Wɔ nitsɛmɛ ɔ, Yuda fɔfɔɛhi ji wɔ; wa pi ma je li yayami peeli.

16 ⓖ Se kɛ̃ ɔ, wa le kaa loko a ma dla nɔ ko kɛ Mawu a kpɛti ɔ, ja nɔ ɔ he Yesu Kristo ye, se pi mlaa a nɔ yemi. Wɔ nitsɛmɛ po wa heɔ Kristo Yesu yeɔ, konɛ a dla waa kɛ Mawu wa kpɛti kɛ gu wa hemi kɛ yemi nɔ, se pi mlaa a nɔ yemi. Ejakaa pi mlaa a nɔ yemi nɔ nɛ a guu kɛ dlaa nɔ ko kɛ Mawu a kpɛti.

17 Waa ngɔ lɛ kaa waa kɛ Yesu ngɛ bɔe, nɛ wa ngɛ mɔde bɔe nɛ a gu lɔ ɔ nɔ nɛ a dla waa kɛ Mawu wa kpɛti. Ke wa ngɛ yayami pee kaa ma je li ɔmɛ nɔuu ɔ, anɛ enɛ ɔ tsɔɔ kaa Kristo náá yayami he bua jɔmi lo? Dɛbi.

18 Níhi nɛ i kpa peemi ɔ, ke i kpale ya ngɛ pee ekohu ɔ, lɛɛ i tsɔɔ paa kaa tɔlɔ ji mi.

19 Ngɛ mlaa a blɔ fa mi ɔ, i plɛ pee nɔ gbogboe, konɛ ma hi wami mi ha Mawu mohu. I kɛ Kristo a sɛu ɔ nɛ.

20 Lɔ ɔ he ɔ, jehanɛ lɛɛ, pi imi nitsɛ nɛ i ngɛ wami mi hu; se Kristo lɛ e hɛ ngɛ ngɛ ye mi. Mawu Bi ɔ suɔ mi, nɛ e ngɔ e wami ngɔ ha ngɛ ye he; nɛ imi hu i he lɛ ye. Lɔ ɔ lɛ ha nɛ i ngɛ wami mi amlɔ nɛ ɔ nɛ.

21 I kplɛɛ kaa Mawu dloomi ji lɛ ha mi. Ke mlaa a nɔ a guu kɛ dlaa nɔ kɛ Mawu a kpɛti ɔ, lɛɛ Kristo gbo yaka gu.