Korinto Bi II, 1

1 ⓐ Imi Paulo nɛ Mawu suɔmi nya a, i ba pee Kristo Yesu bɔfo ɔ, i kɛ wa nyɛmi Timoteo lɛ ngma womi nɛ ɔ ya ha Mawu asafo ɔ nɛ ngɛ Korinto, kɛ ni klɔuklɔu ɔmɛ tsuo nɛ ngɛ Akaya a.

2 Dloomi kɛ he jɔmi nɛ je wa Tsɛ Mawu ɔ, kɛ Nyɔmtsɛ Yesu Kristo dɛ mi ɔ ha nyɛ.

Paulo na Mawu si

3 Nyɛ ha wa je Mawu, wa Nyɔmtsɛ Yesu Kristo Tsɛ ɔ yi. Tsɛ mɔbɔ nalɔ ji lɛ, nɛ e ji Mawu nɛ woɔ wɔ bua ngɛ nɔ́ tsuaa nɔ́ mi hulɔ.

4 E woɔ wa bua ngɛ haomihi tsuo a mi. Kɛkɛ ɔ, ke haomi ba ni kpahi a nɔ ɔ, bua womi nɛ wɔ nitsɛmɛ wa na kɛ je Mawu dɛ mi ɔ, wa ma nyɛ kɛ wo mɛ hu bua.

5 Ejakaa wa ngɛ amanehlu babauu nae kaa Kristo se nyɛɛ li. Se bɔ nɛ Mawu wo Kristo bua a, ja nɔuu kɛ gu Kristo nɔ ɔ, Mawu woɔ wɔ hu wa bua.

6 Ke wa ngɛ amanehlu nae ɔ, e baa konɛ Mawu nɛ wo nyɛ bua nɛ e he nyɛ yi wami. Be tsuaa be nɛ Mawu maa wo wɔ bua a, nyɛ hu nyɛ naa jamɛ a bua womi ɔ eko. Enɛ ɔ haa nɛ ke nyɛ ngɛ amanehlu nae kaa wɔ ɔ, nyɛ toɔ nyɛ tsui si.

7 Wa ngɔ wa hɛ ngɔ fɔ nyɛ nɔ wawɛɛ, ejakaa wa le kaa nɛ nyɛ ngɛ nɔ́ nae kaa wɔ nɛ ɔ, jã kɛ̃ lɛ a maa wo nyɛ bua kaa wɔ.

8 ⓑ Nyɛmimɛ, amanehlu nɛ wa na ngɛ Asia a, wa sume kaa wa maa laa nyɛ nɔ́ ko. Wa na nɔ́ tsɔ pe bɔ nɛ wa ma nyɛ, nɛ wa hɛ be nɔ kaa wa maa hi je mi tete.

9 Wa na paa kaa peepee ta wa he, nɛ gbenɔ ji nɔ́ nɛ fɔɔ si ha wɔ. Se nɔ́ nɛ ɔ ba mi, konɛ wa ko ngɔ wa hɛ kɛ fɔ wɔ nitsɛmɛ wa nɔ, se mohu waa ngɔ wa he kɛ fɔ Mawu nɔ. Ejakaa lɛ nɛ e tleɔ ni gbogboehi si.

10 Mawu nɛ́ je wɔ kɛ je gbenɔ muɔ nya kaa kikɛ nɛ ɔ ngɛ wɔ jee kɛ mwɔɔ; nɛ e ma je wɔ ekohu. Wa ngɔ wa hɛ kɛ fɔ e nɔ kaa e maa kpale je wɔ kulaa.

11 Nyɛ hu nyɛɛ piɛ wa he kɛ kpa pɛɛ, konɛ nihi babauu nɛ na Mawu si ha wɔ kaa nihi babauu a pɛɛ kpami nya a, wa na dloomi nike níhi.

Paulo tsake e yi mi tomi

12 Nɔ́ kake nɛ wa fĩaa ngɔ fɔɔ nɔ, nɛ wa he nile hu yeɔ he odase ji kaa wa baa wa je mi saminya ngɛ he tsuaa he, titli ngɛ waa kɛ nyɛ wa bɔmi mi kaa bɔ nɛ Mawu ngɛ hlae ɔ. Wa yeɔ anɔkuale nɛ mu ko mu ko be wa he. Pi wɔ nitsɛmɛ wa nile nɛ waa kɛ peeɔ enɛ ɔ, se mohu Mawu dloomi ɔ nya.

13 Ke wa ngɛ nyɛ womi ngmae ɔ, níhi nɛ nyɛ ma nyɛ kane nɛ nyɛ maa nu sisi pɛ wa ngmaa. Amlɔ nɛ ɔ, nyɛ nuɔ wɔ sisi fa kɛ fa kɛkɛ, se i heɔ yeɔ kaa nyɛ ma ba nu wɔ sisi saminya. Nɛ ligbi ɔ nɛ wa Nyɔmtsɛ Yesu Kristo maa kpale kɛ ba a, nyɛ maa fĩa kɛ fɔ wa nɔ kaa bɔ nɛ wɔ hu wa fĩaa kɛ fɔɔ nyɛ nɔ ɔ.

14

15 Kikɛmɛ a ní nɛ ɔmɛ nɛ i le saminya a a he je nɛ i to ye yi mi kekle ɔ kaa ma ba slaa nyɛ, konɛ nyɛ na gbaami ɔ si enyɔ.

16 ⓒ Ejakaa i to kaa ke i yaa Makedonia a, ma ba gu nyɛ ngɔ, nɛ ke i kpale ye se kɛ ma hu ma ba gu nyɛ ngɔ, konɛ nyɛɛ wo mi blɔ kɛ ya Yudea.

17 Blɔɔ nɛ i tsake ye yi mi tomi ɔ, anɛ yi mi flɛflɛ i kɛ pee lo? Ke i ngɛ ye yi mi toe ɔ, anɛ i peeɔ ye ní kaa yaka nɔ ko kɛkɛ nɛ deɔ “Ee” kɛ “Dɛbi” be kake too lo?

18 Mawu yeɔ anɔkuale, lɔ ɔ he ɔ, nɔ́ nɛ wa de nyɛ ɔ, pi “Ee” kɛ “Dɛbi” nɛ a deɔ be kake too ji lɔ ɔ.

19 ⓓ Ejakaa sɛ gbi nɛ kɔɔ Mawu Bi, Yesu Kristo ɔ he nɛ i kɛ Silvano kɛ Timoteo fiɛ ngɔ ha nyɛ ɔ tsakee we kɛ je “Ee” ba pee “Dɛbi” be kake too. Mohu ɔ, lɛ ji “Ee” Mawu ɔ nɛ.

20 Ejakaa níhi tsuo nɛ Mawu woɔ he si ɔ, e yeɔ nɔ kɛ guu Yesu Kristo nɔ. Enɛ ɔ he nɛ wa deɔ “Amen” ngɛ Yesu biɛ mi kɛ woɔ Mawu hɛ mi nyami ɔ nɛ.

21 Mawu ji nɔ nɛ peeɔ waa kɛ nyɛ tsuo anɔkuale Kristo se nyɛɛli. Mawu nitsɛ lɛ hla wɔ ngɔ to,

22 nɛ e wo wa he so. Lɛ nɛ e ngɔ Mumi Klɔuklɔu ɔ ngɔ wo wa tsui mi kɛ ma níhi tsuo nɛ e wo si ke e ma ha wɔ ɔ a nɔ mi.

23 I na Mawu kaa pe i sume nɛ ma hao nyɛ, lɔ ɔ he loko i tsake ye yi mi tomi ɔ, nɛ i bɛ Korinto ɔ nɛ.

24 Wa sume kaa wa maa nyɛ nyɛ nɔ nɛ waa tsɔɔ nɔ́ nɛ sa nɛ nyɛ he ye; wa le kaa nyɛ hɛɛ hemi kɛ yemi ɔ mi wawɛɛ. Mohu ɔ, waa kɛ nyɛ ngɛ ní tsue, konɛ nyɛ na bua jɔmi.