Korinto Bi I, 3

Mawu sɔmɔli

1 Nyɛmimɛ, anɔkuale mi ɔ, i nyɛ we nɛ i kɛ nyɛ nɛ tu munyu kaa bɔ nɛ i kɛ nihi nɛ mumi ɔ ngɛ a mi ɔ tuɔ munyu. Se mohu, i kɛ nyɛ tu munyu kaa je mi bi, aloo bimwɔwi ngɛ Kristo jami mi.

2 ⓚ I ha nyɛ nyɔ nyu, se pi niye ní nɛ jiɔ; ejakaa jamɛ a be ɔ, nyɛ nyɛ we nɛ nyɛɛ ye niye ní nɛ jiɔ. Amlɔ nɛ ɔ tete po nyɛ nyɛ we kɛ mwɔɔ.

3 Nyɛ ngɛ he lo nya kɛ mwɔɔ, ejakaa nɔ́ nɛ je mi bi peeɔ ɔ, lɔ ɔ nyɛ hu nyɛ peeɔ. Be abɔ nɛ hunga jemi, kɛ pɛ ngɛ nyɛ kpɛti kɛ mwɔɔ ɔ, anɛ enɛ ɔ tsɔɔ we kaa je mi bi ji nyɛ lo? Nɔ́ nɛ nɔ tsuaa nɔ peeɔ ɔ, anɛ pi lɔ ɔ nɔuu nɛ nyɛ hu nyɛ ngɛ pee ɔ lo?

4 ⓛ Ke nɔ ko ke, “Paulo nɔ ji mi”, nɛ nɔ ko hu ke, “Imi lɛɛ Apolo nɔ ji mi” ɔ, anɛ pi nɔ́ nɛ je mi bi peeɔ nɛ nyɛ ngɛ pee nɛ ɔ?

5 Mɛnɔ ji Apolo ɔ? Imi Paulo hu, mɛnɔ ji mi? Mawu tsɔli kɛkɛ ji wɔ, nɛ wa nɔ lɛ nyɛ gu kɛ he Kristo ye. Nyɔmtsɛ ɔ ha wa ti nɔ tsuaa nɔ ní tsumi pɔtɛɛ nɛ wa tsu.

6 ⓜ Imi lɛ i ba ma tso ɔ. Apolo ba pue nɔ nyu, se Mawu lɛ ha nɛ tso ɔ wa.

7 Lɔ ɔ he ɔ, nɔ nɛ duɔ tso, kɛ nɔ nɛ pueɔ nɔ nyu ɔ, a he hia we kulaa. Mawu ji nɔ nɛ he hia, ejakaa lɛ nɛ haa nɛ tso ɔ waa.

8 Nɔ nɛ duɔ tso, kɛ nɔ nɛ pueɔ nɔ nyu ɔ, slɔɔto be a kpɛti; Mawu maa wo a ti nɔ tsuaa nɔ hiɔ kpakpa ngɛ ní tsumi nɛ e tsu ɔ he.

9 Wɔɔ lɛɛ Mawu tsɔli nɛ pee kake kɛ ngɛ ní tsue ji wɔ. Nyɛɛ lɛɛ nyɛ ngɛ kaa ngmɔ nɛ Mawu ngɛ ní tsue ngɛ mi. Nyɛ ngɛ kaa tsu nɛ Mawu ngɛ fiae.

10 I ngɔ Mawu dloomi nɛ e ha mi ɔ, nɛ i kɛ to tsu ɔ sisi kaa tsu fialɔ kpanaa nɛ le ga tsuɔ ní; nɛ nɔ kpa ba ngɛ nɔ fiae. Se e hia kaa nɔ tsuaa nɔ nɛ hyɛ kaa e ngɛ tsu ɔ fiae saminya ngɛ sisi tomi ɔ nɔ lo.

11 Ejakaa Mawu ngɔ Yesu Kristo ngɔ to momo kaa sisi tomi, nɛ nɔ ko be nyɛe maa to sisi kpa ko hu.

12 Ni komɛ maa ngɔ sika tsu, loo sika hiɔ, loo tɛ nɛ he jua wa kɛ fia sisi tomi ɔ nɔ; ni komɛ hu maa ngɔ tso, loo gla, loo nga kɛ pee.

13 Se ligbi ɔ nɛ Kristo maa ba a, nɔ tsuaa nɔ ní nɛ e tsu ɔ maa je kpo paa. Ejakaa jamɛ a ligbi ɔ, a kɛ la ma je nɔ tsuaa nɔ ní tsumi kpo. La a maa tsɔɔ bɔ nɛ nɔ tsuaa nɔ ní tsumi ngɛ ha.

14 Ke nɔ ko fia tsu ngɔ fɔ sisi tomi ɔ nɔ, nɛ la sa he, se tsu ɔ daa si kɛ mwɔɔ ɔ, tsu fialɔ ɔ ma na hiɔwo kpakpa.

15 Ke nɔ ɔ tsu ɔ sã a, nɔ́ laa lɛ; se lɛ nitsɛ lɛɛ a ma he e yi wami kaa nɔ ko nɛ a gbla lɛ kɛ je la mi.

16 ⓝ Anɛ nyɛ li kaa Mawu sɔlemi we ji nyɛ, nɛ Mawu mumi ɔ ngɛ nyɛ mi lo?

17 Ke nɔ ko puɛ Mawu sɔlemi we ɔ, Mawu ma kpata e hɛ mi. Ejakaa Mawu sɔlemi we ɔ ngɛ klɔuklɔu, nɛ nyɛ ji sɔlemi we ɔ nɛ.

18 Nyɛ ti nɔ ko nɔ ko kó sisi e he. Ke nyɛ ti nɔ ko susuu kaa lɛɛ e le ní pe nɔ tsuaa nɔ ɔ, é pee e he kuasia. Kɛkɛ ɔ, e maa pee ní lelɔ nitsɛnitsɛ.

19 ⓞ Ejakaa nɔ́ nɛ je ɔ buu kaa nile ɔ ji kuasia nɔ́ ko ngɛ Mawu lɛɛ e hɛ mi. Ngmami ɔ ke, “Mawu ngɔɔ nile kɛ tsɔɔ ní leli klama.”

20 ⓟ Ngmami ɔ kpa hu ke, “Nyɔmtsɛ ɔ le kaa ní leli a yi mi tomi peeɔ yaka.”

21 Lɔ ɔ he ɔ, nɔ ko nɔ ko kó fĩa ngɔ fɔ adesa ko nɔ, ejakaa mɛ tsuo a ngɛ ha nyɛ;

22 Paulo jio, Apolo jio, Petro jio, je nɛ ɔ jio, wami jio, gbenɔ jio, amlɔ nɛ ɔ jio, hwɔɔ se jio, ní nɛ ɔmɛ tsuo ngɛ ha nyɛ.

23 Nyɛ hu Kristo níhi ji nyɛ, nɛ Kristo ɔ, Mawu nɔ ji lɛ.