Korinto Bi I, 1

1 Imi Paulo, nɛ Mawu suɔmi nya a, e tsɛ mi nɛ ma ba pee Yesu Kristo bɔfo ɔ, i kɛ wa nyɛmi Sostene lɛ wa ngma womi nɛ ɔ.

2 ⓐ Wa ngɛ womi nɛ ɔ ngmae kɛ yaa ha Mawu we asafo nɛ ngɛ Korinto ɔ, nihi nɛ a tsu a he, nɛ a pee mɛ klɔuklɔu ha Yesu Kristo, kɛ nihi nɛ ngɛ he tsuaa he, nɛ a jaa Kristo Yesu, wa Nyɔmtsɛ, kɛ mɛ hu a Nyɔmtsɛ ɔ.

3 Dloomi kɛ he jɔmi nɛ je wa Tsɛ Mawu ɔ, kɛ Nyɔmtsɛ Yesu Kristo dɛ mi ɔ ha nyɛ.

Gbaami ngɛ Kristo mi

4 I naa Mawu si daa kɛ haa nyɛ ngɛ dloomi nɛ e ngɔ ha nyɛ kɛ gu Kristo Yesu nɔ ɔ he.

5 Ejakaa nyɛ ya hɛ mi ngɛ nɔ́ tsuaa nɔ́ mi, munyu tumi jio, nile jio.

6 Kristo he odase nɛ nyɛ ngɛ yee ɔ ba he si wawɛɛ nɛ nihi na.

7 Lɔ ɔ he ɔ, be mi nɛ nyɛ ngɛ Nyɔmtsɛ Yesu Kristo bami ɔ blɔ hyɛe nɛ ɔ, mumi mi nike ní ko kulaa be nyɛ hiae.

8 Mawu nitsɛ maa hɛɛ nyɛ kɛ maa ya nyagbe, konɛ ligbi ɔ nɛ wa Nyɔmtsɛ Yesu Kristo maa ba a, piami ko piami ko kó hi nyɛ he.

9 Mawu, nɔ nɛ kpee nyɛ ke nyɛɛ kɛ e Bi Yesu Kristo, wa Nyɔmtsɛ ɔ ba bɔ huɛ ɔ, anɔkualetsɛ ji lɛ.

Mi gbami ngɛ asafo ɔ mi

10 Nyɛmimɛ, i ngɛ nyɛ pɛɛ kpae ngɛ Nyɔmtsɛ Yesu Kristo biɛ mi kaa nyɛ tsuo nyɛ nya nɛ pee kake, nɛ mi gbami kó ba nyɛ kpɛti. Nyɛ yi mi, kɛ nyɛ juɛmi nɛ pee kake.

11 Ye nyɛmimɛ, i ngɛ nyɛ enɛ ɔ dee, ejakaa ni komɛ je Kloe we ɔ mi ba wo ye tue nɔ ke pɛ ngɛ nyɛ kpɛti.

12 ⓑ Nɔ́ nɛ i ngɛ tsɔɔe ji, nyɛ ti nɔ tsuaa nɔ ngɛ nɔ́ ko nɛ e ngɛ dee. Nɔ ko ke, “Paulo nɔ́ ji mi”, nɛ nɔ ko hu ke, “Imi lɛɛ Apolo nɔ́ ji mi”; nɔ kpa ke, “Imi lɛɛ Kefa nɔ́ ji mi”; nɛ nɔ kpa hu ke, “Oo, imi lɛɛ Kristo nitsɛ se nyɛɛlɔ ji mi.”

13 Anɛ a gba Kristo mi lo? Anɛ Paulo nɛ a sɛu ha nyɛ lo? Anɛ Paulo biɛ mi a sɔle nyɛ kɛ wo lo?

14 ⓒ I naa Mawu si kaa i sɔle we nɔ ko nɔ ko kaa ja Krispo kɛ Gayo pɛ.

15 Lɔ ɔ he ɔ, nɔ ko be nyɛe ma de ke a sɔle nyɛ kɛ wo ye biɛ mi.

16 ⓓ Niinɛ, i sɔle Stefana kɛ e we mi bi ɔmɛ hulɔ. Se i kaii we kaa i pa sɔle nɔ kpa ko hu.

17 Kristo tsɔ we mi ke ma ba sɔle nihi. E tsɔ mi ke ma ba fiɛ sane kpakpa a; pi kɛ nya mi dɔkɔɔ, kɛ adesa nile, konɛ gbenɔ nɛ Kristo gbo ngɛ sɛumi tso ɔ nɔ ɔ kó pee yaka.

Kristo ji Mawu he wami, kɛ e nile

18 Ejakaa nihi nɛ a hɛ mi miɔ nɛ e ma kpata a, buɔ sɛ gbi ɔ nɛ kɔɔ sɛumi tso ɔ he ɔ kaa kuasiahi a sane ko kɛkɛ. Se wɔ nɛ a ngɛ wa yi wami hee ɔ, wɔɔ lɛɛ e ji Mawu he wami ha wɔ.

19 ⓔ Ngmami ɔ ke, “Ma ha nɛ ní leli a nile ma puɛ, nɛ ga leli a ga tsuo maa pee yaka.”

20 ⓕ Jije ní leli ɔmɛ ngɛ? Jije ga leli ɔmɛ ngɛ? Jije je nɛ ɔ mi sane mi hlali ɔmɛ ngɛ? Ee, Mawu ha nɛ je nɛ ɔ mi nile ɔ plɛ pee kuasiahi a sane.

21 Mawu ngɔ e nile ɔ kɛ tsi adesa blɔ, konɛ adesa kó nyɛ nɛ e gu lɛɛ e ní lemi nɔ kɛ le Mawu. Se mohu ɔ, sɛ gbi ɔ nɛ wa ngɛ fiɛe nɛ nihi buu kaa kuasiahi a sane ɔ, Mawu to kaa e kɛ ma he ni nɛmɛ nɛ heɔ yeɔ ɔ a yi wami.

22 Yuda bi hlaa kaa a pee okadi ha mɛ nɛ a na loko a he sɛ gbi ɔ nɛ a ye. Hela bi hu hlaa kaa a maa nu nile munyu ko ngɛ mi lo.

23 Se wɔɔ lɛɛ Kristo nɛ a sɛu ɔ wa ngɛ fiɛe. Enɛ ɔ peeɔ blɔ tsimi nɔ ha Yuda bi, nɛ Hela bi hu buu lɛ kaa kuasiahi a sane.

24 Ee, nihi nɛ Mawu hla a, Yuda bi jio, Hela bi jio, mɛɛ a le kaa Kristo ji Mawu he wami, kɛ e nile.

25 Ejakaa ke Mawu je kuasia tete po, adesa kɛ e nile nɛ nya wa a na we lɛ; ke Mawu gbɔjɔ tete po, adesa kɛ e he wami kpetekpleenyɛ ɔ na we lɛ saasaa.

26 Ye nyɛmimɛ, nyɛ kai bɔ nɛ nyɛ ngɛ ha loko Mawu tsɛ nyɛ ɔ. Ngɛ he lo blɔ fa mi ɔ, nyɛ ti nihi bɔɔ pɛ ji ní leli, nihi bɔɔ pɛ ji nihi nɛ a he wa, nɛ bɔɔ pɛ ji odehehi.

27 Mawu je blɔ hla je ɔ mi kuasia níhi, konɛ e kɛ gbe ní leli zo. Mawu hla je ɔ mi níhi nɛ gbɔjɔ, konɛ e kɛ gbe níhi nɛ a he wa a zo.

28 E hla níhi nɛ je ɔ bui, níhi nɛ a hiee, kɛ níhi nɛ pi nɔ́ ko kulaa a, konɛ e kɛ gbe níhi nɛ je ɔ buu saminya a a he guɛ.

29 E pee enɛ ɔ, konɛ nɔ ko nɔ ko kó fĩa ngɛ e hɛ mi.

30 Se Mawu ngɔ nyɛ kɛ ba, konɛ nyɛɛ kɛ Kristo Yesu ba bɔ. E ha nɛ Kristo ba pee wa nile. Kɛ gu Kristo nɔ ɔ, Mawu pee wɔ nihi nɛ da. Wa ba plɛ pee e ma klɔuklɔu, nɛ a he wa yi wami.

31 ⓖ Lɔ ɔ he ɔ, kaa bɔ nɛ ngmami ɔ deɔ ɔ, “Nɔ nɛ suɔ kaa e maa fĩa a, e fĩa ngɔ fɔ nɔ́ nɛ Nyɔmtsɛ ɔ pee ɔ nɔ.”