Ni Tsumi 6

Asafo ɔ hla bɔfo ɔmɛ a he piɛli kpaago

1 Jamɛ be ɔ mi benɛ kaseli ɔmɛ a he ba bɔni hiɛmi ɔ, a kpɛti nihi nɛ tuɔ Hela gbi ɔ ba te si kɛ wo ni nɛmɛ nɛ tuɔ Hebri gbi ɔ ke a hyɛ we mɛ nihi nɛ tuɔ Hela gbi ɔ a yalɔyi ɔmɛ bɔ nɛ sa; sika nɛ a haa yalɔyihi daa ligbi nɛ a kɛ hyɛɛ a he nɔ ɔ, mɛɛ lɛɛ a nine sui a nɔ́ nɔ.

2 Lɔ ɔ he ɔ, bɔfo nyɔngma kɛ enyɔ ɔmɛ tsɛ nihi nɛ he Yesu ye ɔ tsuo kɛ ba, nɛ a de mɛ ke, “E sɛ kaa wa siɔ Mawu munyu ɔ fiɛmi se, nɛ wa ya yeɔ niye ní sane.

3 Lɔ ɔ he ɔ, wa nyɛmimɛ, nyɛɛ hla nyɛ kpɛti ni kpaago, nihi nɛ ngɛ biɛ kpakpa; nihi nɛ Mumi Klɔuklɔu ɔ hyi mɛ tɔ, nɛ a le ní hulɔ, konɛ waa ngɔ mɛ ngɔ to ní tsumi nɛ ɔ nya.

4 Wɔɔ lɛɛ wa maa ngɔ wa be tsuo kɛ pee sɔlemi, nɛ waa fiɛ Mawu munyu ɔ.”

5 Nɔ́ nɛ bɔfo ɔmɛ de ɔ, asafo ɔ kplɛɛ nɔ, nɛ a hla Stefano, nyumu ko nɛ ngɛ hemi kɛ yemi, nɛ Mumi Klɔuklɔu ɔ ngɛ e mi saminya a, kɛ Filipo, kɛ Prokoro, kɛ Nikanor, kɛ Timon, kɛ Parmena, kɛ Nikolao, ma je no nɛ je Antiokia nɛ tsake ba sɛ Yuda bi a jami ɔ mi be ko ɔ.

6 A kɛ mɛ ba da bɔfo ɔmɛ a hɛ mi; kɛkɛ nɛ bɔfo ɔmɛ sɔle, nɛ a kɛ a nine pue a nɔ.

7 Mawu munyu ɔ ya nɔ nɛ e gbɛ fĩa saminya. Nihi nɛ he ye ɔ a he ba hiɛ babauu ngɛ Yeruslem, nɛ Yuda osɔfo ɔmɛ a kpɛti nihi saii nitsɛ he Mawu munyu ɔ ye.

A nu Stefano

8 Mawu dloo Stefano saminya, nɛ e ha lɛ he wami nɛ e kɛ pee nyakpɛ ní nguanguahi ngɛ ma a mi.

9 Kɛkɛ nɛ Kirene kɛ Aleksandria bi komɛ nɛ je kpe he nɛ a tsɛɛ “Nihi nɛ ye a he” ɔ te si wo Stefano. Yuda bi komɛ hu nɛ je Kilikia, kɛ Asia a, ba piɛ nimli nɛ ɔmɛ a he, nɛ a kɛ lɛ sã nya.

10 Se Mumi Klɔuklɔu ɔ ha Stefano nile, nɛ benɛ e tu munyu ɔ, a nyɛ we nya nɛ a da.

11 Lɔ ɔ he ɔ, ni ɔmɛ ya wo ni komɛ a yi mi, nɛ a ba de ke, “Wa nu nɛ e tu munyu kɛ bɔ musu kɛ si Mose kɛ Mawu.”

12 Blɔ nɔ nɛ ni ɔmɛ gu kɛ sú ma mi bi ɔmɛ, kɛ ma nimeli ɔmɛ, kɛ mlaa tsɔɔli ɔmɛ kɛ wo Stefano he ji nɛ ɔ nɛ. Ni ɔmɛ bu kɛ ba pue Stefano nɔ, nɛ a nu lɛ kɛ ho kpe ngua a hɛ mi ya.

13 Jehanɛ a kɛ lakpa odase yeli komɛ ba, nɛ a ba de ke, “Daa nɛ ɔ, kikɛmɛ a nɔmlɔ nɛ ɔ tuɔ munyu kɛ siɔ wa sɔlemi we klɔuklɔu ɔ, kɛ Mose mlaa a.

14 Wa nu nɛ e de ke, Yesu, Nazaret no ɔ, maa ku sɔlemi we nɛ ɔ, nɛ e ma tsake blɔ nyahi nɛ Mose ngɔ ha wɔ ɔ.”

15 Kpe ngua a mi bi ɔmɛ tsuo dɔ a hɛ ngmɛ ngɔ to Stefano nɔ, nɛ a na kaa e hɛ mi pee kaa Mawu bɔfo hɛ mi.