Ni Tsumi 2

Mumi Klɔuklɔu ɔ ba

1 ⓙ Benɛ Pentekoste[2] ligbi ɔ su ɔ, nihi nɛ heɔ yeɔ tsuo a nya ba bua ngɛ he kake.

2 Si kake too ɔ, a nu nɔ́ ko nɛ pɛ kɛ je hiɔwe kaa kɔɔhiɔ nɛ nya wa lɛ ngɛ fiae; nɛ e ba hyi we ɔ mi he nɛ a hii si ngɛ ɔ tɔ.

3 Nɛ ní komɛ kaa la lilɛ nɛ a gba mi ba ma a yi mi kakaaka.

4 Mumi Klɔuklɔu ɔ ba mɛ tsuo a nɔ saminya, nɛ a bɔni gbi slɔɔtoslɔɔtohi tumi ngɛ Mumi Klɔuklɔu ɔ he wami nya.

5 Yuda bi komɛ nɛ yee Mawu gbeye ngɛ Yerusalem jamɛ a be ɔ mi. A je je ma amɛ tsuo a mi.

6 Benɛ a nu nɛ nɔ́ ɔ pɛ ɔ, nihi babauu ba bua a he nya. Mɛ tsuo a he mi po; ejakaa a ti nɔ tsuaa nɔ nu kaa a ngɛ lɛ nitsɛ e ma mi gbi tue.

7 Mɛ tsuo a nya kpɛ a he, nɛ a hɛ mi pee mɛ yaa. A de ke, “Nihi nɛ ngɛ munyu tue nɛ ɔ tsuo ɔ, Galilea bi ji mɛ!

8 Se kɛ pee kɛɛ nɛ wɔ tsuo wa ngɛ nue nɛ a ngɛ munyu tue ngɛ wɔ nitsɛmɛ wa je gbi mi mɔ?

9 Wa je Partia, kɛ Media, kɛ Elam; wa ti ni komɛ je Mesopotamia, Yudea, Kapadokia, Ponto, kɛ Asia;

10 ni komɛ je Frigia, kɛ Pamfilia; nɛ ni komɛ hu je Egipt, kɛ Libia kpokpa amɛ a nɔ ngɛ Kirene kasa nya. Wa ti ni komɛ je Roma.

11 Wɔ tsuo ɔ, Yuda bi kɛ ma je li nɛ ba sɛ Yuda bi jami ɔ mi ji wɔ; nɛ wa ti ni komɛ hu je Kreta, kɛ Arabia; se wɔ tsuo wa ngɛ nue nɛ a ngɛ Mawu ní nguangua amɛ jajee ngɛ wɔ nitsɛmɛ wa je gbi mi!”

12 Mɛ tsuo a nya kpɛ a he, nɛ a dɛ yaa. A bi a sibi ke, “Kɛ ji enɛ ɔ sisi kɛɛ?”

13 Se ni komɛ hu ye fɛu ke, “Wai he nɛ a nu nɛ a de.”

Munyu nɛ Petro tu

14 Jehanɛ ɔ, Petro kɛ ni nyɔngma kɛ kake ɔmɛ te da si; Petro wo e nya nɔ nɛ e tu munyu tsɔɔ ni kpekpemi ɔ ke, “Ye nyɛmimɛ Yuda bi, kɛ nyɛ nihi tsuo nɛ ngɛ Yerusalem, nyɛɛ bu mi tue, konɛ ma tsɔɔ nyɛ nɔ́ nɛ ɔ sisi.

15 Tsa pi dã nɛ ni mli nɛ ɔmɛ de kaa bɔ nɛ nyɛ ngɛ susue ɔ, ejakaa mɔtu ngmlɛ nɛɛ kɛkɛ ji nɛ ɔ nɛ.

16 Se mohu enɛ ɔ ji nɔ́ nɛ gbalɔ Yoel tu he munyu ɔ nɛ:

17 ⓚ ‘Mawu ke, Nyagbe be ɔ, ma ngɔ ye Mumi ɔ kɛ wo nɔ tsuaa nɔ mi. Nyɛ binyumu ɔmɛ, kɛ nyɛ biyi ɔmɛ maa fiɛ ye sɛ gbi ɔ; nihewi maa na nina, nɛ nikɔtɔmahi maa nla.

18 Ye tsɔli nyumu ɔmɛ kɛ yi ɔmɛ hu, ma ha mɛ ye Mumi ɔ jamɛ a be ɔ mi, nɛ a maa fiɛ ye sɛ gbi ɔ.

19 Ma pee nyakpɛ níhi ngɛ hiɔwe, kɛ okadihi ngɛ zugba a nɔ. Muɔ, kɛ la, kɛ la su ku maa ba.

20 Pu maa tsɔ diblii, nɛ nyɔhiɔ ma pee tsutsuutsu kaa muɔ loko Nyɔmtsɛ ɔ ligbi nguaa nɛ ngɛ gbeye ɔ maa ba.

21 E maa ba mi kaa nɔ tsuaa nɔ nɛ ma kpa ngmlaa kɛ tsɛ Nyɔmtsɛ ɔ biɛ ɔ, a ma he e yi wami.’

22 “Ye nyɛmimɛ Israel bi, nyɛɛ bu munyu nɛ ɔ tue saminya! Nyakpɛ níhi, kɛ okadihi nɛ Mawu pee kɛ gu Yesu nɛ je Nazaret ɔ nɔ ɔ yeɔ odase paa kaa Mawu nitsɛ lɛ tsɔ lɛ. Nyɛ nitsɛmɛ nyɛ le enɛ ɔ, ejakaa nyɛ kpɛti a pee ni nɛ ɔmɛ ngɛ.

23 ⓛ Mawu nitsɛ to e yi mi momo kaa e maa ngɔ Yesu ɔ ngɔ ha nyɛ. Nyɛ ngɔ lɛ ngɔ ha yayami peeli nɛ a sɛu lɛ ngɛ sɛumi tso nɔ, nɛ e gbo.

24 ⓜ Se Mawu tle lɛ si kɛ je gbeje; e kpɔ lɛ ngɛ gbenɔ nya mi, ejakaa gbenɔ be e nya nyɛe maa tsi kɔkɔɔkɔ.

25 ⓝ Bɔ nɛ David de ngɛ e he ji nɛ ɔ nɛ: ‘I naa Nyɔmtsɛ ɔ daa; e ngɛ ye hiɔ nɔ, nɛ nɔ ko be nyɛe maa wo ye he gbeye.

26 Lɔ ɔ he ɔ, ye tsui nɔ ye mi, nɛ i kɛ bua jɔmi ngɛ munyu tue; se imi nɛ adesa kɛkɛ ji mi ɔ, ma ngɔ ye hɛ ngɔ fɔ Mawu nɔ kulaa.

27 Ejakaa o be mi sie ngɛ gbeje; o be hae nɛ o nɔ klɔuklɔu ɔ nɛ puɛ ngɛ yɔkɔ mi.

28 O ha nɛ i le blɔ nɛ kɛ nɔ yaa wami mi ɔ. O ma ha ye tsui maa nɔ ye mi fuaa ngɛ o hɛ mi.’

29 “Ye nyɛmimɛ, nyɛ ha ma tu munyu paa ngɔ tsɔɔ nyɛ ngɛ wa nɛ̃ Matsɛ David he. E gbo nɛ a pu lɛ, nɛ e yɔkɔ ngɛ wa kpɛti kɛ ba si mwɔnɛ ɔ.

30 ⓞ Gbalɔ ji lɛ, nɛ si nɛ Mawu wo lɛ ɔ, e le. Mawu wo David si kaa e ma ha e nina ma ba ye tsɛ kaa bɔ nɛ lɛ David ɔ ye tsɛ ɔ.

31 David na nɔ́ nɛ Mawu maa pee ɔ momo, lɔ ɔ he ɔ, e tu Kristo si temi ɔ he munyu, nɛ e de ke, ‘A si we lɛ ngɛ gbeje, nɛ e he lo hu puɛ we ngɛ yɔkɔ mi.’

32 Mawu tle kikɛmɛ a Yesu nɛ ɔ nɔuu si kɛ je gbeje; lɔ ɔ he odase yeli ji wɔ tsuo.

33 A wo e nɔ kɛ ho e Tsɛ Mawu ɔ hiɔ nɔ ya, nɛ e ná Mumi Klɔuklɔu nɛ a wo he si ɔ kɛ je e dɛ. Nɔ́ nɛ nyɛ ngɛ hyɛe, kɛ nɔ́ nɛ nyɛ ngɛ nue nɛ ɔ, Yesu lɛ ha nɛ e ba.

34 ⓟ Ejakaa tsa pi David nɛ ya hiɔwe ɔ, se David nɔuu lɛ de ke, ‘Nyɔmtsɛ ɔ de ye Nyɔmtsɛ ɔ ke, Hii si ngɛ ye hiɔ nɔ,

35 nɛ ma pee o he nyɛli ɔmɛ kaa nɔ́ nɛ o kɛ o nane maa nɔ.’

36 “Lɔ ɔ he ɔ, Israel bi tsuo nɛ́ a na nɛ a le kaa Yesu ɔ nɛ nyɛ sɛu ɔ, Mawu ngɔ lɛ ngɔ pee Nyɔmtsɛ, kɛ nɔ nɛ lɛ nitsɛ e hla!”

37 Benɛ ni ɔmɛ nu munyu nɛ ɔ, e hao mɛ wawɛɛ, nɛ a bi Petro kɛ bɔfo kpa amɛ nɛ piɛ e he ɔ ke, “Wa nyɛmimɛ, kɛ wa maa pee kɛɛ?”

38 Petro de mɛ ke, “Nyɛ tsake nyɛ tsui, nɛ nyɛ ti nɔ tsuaa nɔ nɛ ha nɛ a sɔle lɛ ngɛ Yesu Kristo biɛ mi, kɛkɛ, a maa ngɔ nyɛ he yayami ɔmɛ ngɔ pa nyɛ, nɛ nyɛ ma na Mawu nɔke nɔ́ nɛ ji Mumi Klɔuklɔu ɔ.

39 Ejakaa si nɛ Mawu wo ɔ, nyɛɛ kɛ nyɛ bimɛ, kɛ nihi abɔ tsuo nɛ ngɛ se lokoo nɛ Nyɔmtsɛ, wa Mawu ɔ ma tsɛ kɛ ba e ngɔ ɔ nyɛ he ngɛ mi.”

40 Petro tu munyu kpahi fuu kɛ ye odase, nɛ e kɛ wo mɛ ga ke, “Tue gblami nɛ yi nɔ nɛ ɔ bi yayami peeli ma na a, nyɛɛ hyɛ saminya nɛ e kó ba nyɛ nɔ.”

41 Nihi babauu he e sɛ gbi ɔ ye, nɛ a sɔle mɛ. Jamɛ a ligbi ɔ, a na nimli maa pee akpe etɛ kɛ piɛ a he.

42 Nimli nɛ ɔmɛ kaseɔ ní be tsuaa be ngɛ bɔfo ɔmɛ a ngɔ; a kɛ mɛ peeɔ kake kɛ yeɔ ní, nɛ a kɛ peeɔ sɔlemi hulɔ.

Nihi nɛ he Yesu ye ɔ a si himi

43 Kɛ gu bɔfo ɔmɛ a nɔ ɔ, a pee nyakpɛ níhi, kɛ okadihi babauu, nɛ gbeye nu nɔ tsuaa nɔ.

44 ⓠ Nihi nɛ he Yesu ye ɔ tsuo kake peemi saminya ngɛ mɛ tsuo a kpɛti, nɛ a gba we nɔ ko mi ngɛ nɔ ko he.

45 A jua a zugba amɛ, kɛ a weto ní tsuo, nɛ a dla sika a ngɔ ha ni ɔmɛ tsuo bɔ nɛ he hia nɔ tsuaa nɔ.

46 Daa ligbi ɔ, a ya kpee ngɛ sɔlemi we ɔ, nɛ a buaa a he nya kɛ ya kuɔ abolo ngɛ a sibi a we mi, nɛ a kɛ bua jɔmi nɛ je tsui mi faa yeɔ ní.

47 A jeɔ Mawu yi be tsuaa be, nɛ ni ɔmɛ tsuo ná a he bua jɔmi babauu. Daa ligbi ɔ, nihi nɛ Nyɔmtsɛ ɔ he a yi wami ba piɛɔ asafo ɔ he.