Yohane 4

Yesu kɛ Samaria yo ɔ

1 Farisi bi ɔmɛ nu kaa Yesu ngɛ kaseli babauu nae, nɛ e ngɛ nihi babauu sɔlee hu pe Yohane.

2 (Anɔkuale mi ɔ, Yesu nitsɛ sɔle we nɔ ko, se e kaseli ɔmɛ mohu lɛ a sɔle nihi.)

3 Lɔ ɔ he ɔ, benɛ Yesu nu nɔ́ nɛ a ngɛ dee ngɛ e he ɔ, e je Yudea, nɛ e kpale e se kɛ ho Galilea ya.

4 Benɛ e yaa a, e hia kaa e gu Samaria.

5 ⓜ E ba su Samaria ma ko nɛ a tsɛɛ Sikar a. Lejɛ ɔ kɛ zugba kpɔ nɛ Yakob ngɔ ha e bi Yosef ɔ he kɛ we kulaa.

6 Yakob vu ɔ ngɛ lejɛ ɔ. Piani ngmlɛ nyɔngma kɛ enyɔ ɔ, Yesu ba su vu ɔ he, nɛ e ya hi si, ejakaa pɔ tɔ lɛ kɛ blɔ nyɛɛmi.

7 Kɛkɛ nɛ Samaria yo ko ba nyu yɛmi. Yesu de lɛ ke, “Ha mi nyu ɔ eko nɛ ma nu.”

8 (Jamɛ a be ɔ, Yesu kaseli ɔmɛ sɛ ma a mi ya nɛ a yaa he niye ní.)

9 ⓝ Yo ɔ bi Yesu ke, “Pi Yuda no ji mo lo? Nɛ kɛ pee kɛɛ nɛ o ngɛ imi Samaria no nyu bae nɛ o nu ɔ?” (Yuda bi kɛ Samaria bi yi.)

10 Yesu de yo ɔ ke, “Ke o le nɔ́ kpakpa nɛ Mawu haa nɔ, kɛ nɔ nɛ ngɛ mo nyu bae nɛ ɔ, jinɛ mo mohu o maa ba lɛ eko, nɛ lɛɛ e ma ha mo nyu nɛ haa nɔ wami.”

11 Yo ɔ de lɛ ke, “Nyɔmtsɛ, vu ɔ mi kuɔ, nɛ o be nɔ́ ko hulɔ nɛ o kɛ maa yɛ nyu ɔ. Nyu nɛ haa nɔ wami ɔ, jije o ma ná kɛ je?

12 Wa nɛ̃ Yakob nɛ ha wɔ kikɛmɛ a vu nɛ ɔ; nɛ lɛ nitsɛ, kɛ e bimɛ, kɛ e lohwehi tsuo nu e mi nyu. Anɛ o ngɛ hlae nɛ o tsɔɔ kaa moo o pe Yakob ɔ lo?”

13 Yesu he nɔ ke, “Nɔ tsuaa nɔ nɛ nuu vu nɛ ɔ mi nyu ɔ eko ɔ, kuma maa ye lɛ ekohu,

14 se nɔ nɛ maa nu nyu nɛ imi ma ha lɛ ɔ, kuma be lɛ yee hu gblegbleegble. Ejakaa nyu nɛ ma ha lɛ ɔ ma plɛ nyu hɛngmɛ nɛ baa nyu nɛ haa nɔ wami kɛ yaa neneene ngɛ e mi.”

15 Jehanɛ ɔ, yo ɔ de Yesu ke, “Nyɔmtsɛ, ha mi kikɛmɛ a nyu nɛ ɔ mɔ, kɛkɛ ɔ, kuma be mi yee hu, nɛ e be hiae po kaa ma ba hiɛ ɔ ba yɛ nyu.”

16 Yesu de yo ɔ ke, “Yaa nɛ o ya tsɛ o huno, nɛ o kɛ lɛ nɛ ba hiɛ ɔ.”

17 Yo ɔ he nɔ ke, “I be huno.” Yesu de lɛ ekohu ke, “Ke o de ke o be huno ɔ, o tu anɔkuale.

18 O gba nyumuhi enuɔ momo, nɛ nyumu nɛ o kɛ lɛ ngɛ piɔ hu, pi o huno nitsɛnitsɛ ji lɛ. O tu anɔkuale sisiisi.”

19 Yo ɔ de Yesu ke, “Nyɔmtsɛ, i na kaa gbalɔ ji mo.

20 Wa nɛmɛ ja Mawu ngɛ yo nɛ ɔ nɔ, se nyɛ Yuda bi lɛɛ nyɛ ke Yerusalem ji he nɛ sa kaa wa ja Mawu ngɛ.”

21 Yesu de lɛ ke, “Maa, he mi nɛ o ye kaa be ma nɛ nyɛ ma ja Tsɛ ɔ, pi yo nɛ ɔ nɔ, nɛ pi Yerusalem hulɔ.

22 Nyɛ Samaria bi, nyɛ li nɔ tutuutu nɛ nyɛ jaa a; se wɔ Yuda bi lɛɛ nɔ nɛ wa jaa a, wa le lɛ; ejakaa wɔ nɛ wa ngɔ yi wami hemi kɛ ba.

23 Jehanɛ ɔ, be ɔ ma, nɛ Mawu ma ha nihi he wami, konɛ a ja Tsɛ ɔ ngɛ mumi mi kɛ anɔkuale mi kaa bɔ nɛ Tsɛ ɔ nitsɛ suɔ. Pohu be ɔ su momo.

24 Mawu ɔ, Mumi ji lɛ, nɛ nihi nɛ jaa lɛ ɔ, ja a ja lɛ ngɛ mumi kɛ anɔkuale mi.”

25 Yo ɔ de lɛ ke, “I le kaa Mesia a nɛ a tsɛɛ lɛ Kristo ɔ ma, nɛ ke e ba a, e maa tsɔɔ wɔ nɔ́ tsuaa nɔ́.”

26 Yesu he nɔ ke, “Imi nɛ i kɛ mo ngɛ munyu ɔ tue ɔ, imi ji Mesia a nɛ.”

27 Jamɛ a be ɔ nɔuu ɔ, Yesu kaseli ɔmɛ ba je kpo, nɛ a hɛ mi pee mɛ yaa kaa e kɛ yo ngɛ ní sɛɛe. Se a ti nɔ ko bi we yo ɔ nɔ́ nɛ e ngɛ hlae; nɛ a bi we Yesu hu nɔ́ nɛ e kɛ yo ɔ ngɛ sɛɛe.

28 Kɛkɛ nɛ yo ɔ si e paya buɛ ɔ, nɛ e pue nɔ kɛ ho ma a mi ya; nɛ e ya de ma mi bi ɔmɛ ke,

29 “Nyɛɛ ba! Nyɛ ba hyɛ nyumu ko nɛ de mi níhi tsuo nɛ i pee hyɛ. Anɛ pi lɛ ji Kristo ɔ lo?”

30 Kɛkɛ nɛ ma a tsuo bu kɛ ba Yesu ngɔ.

31 Jamɛ a be ɔ, kaseli ɔmɛ bɔni Yesu pɛɛ kpami ke e ba wo e nya mi nɔ́ ko.

32 Se e he nɔ ke, “I ngɛ ngma nɛ i yeɔ, se nyɛ li.”

33 Lɔ ɔ he ɔ, kaseli ɔmɛ bi a he ke, “Anɛ nɔ ko ba ha lɛ nɔ́ ko nɛ e ye lo?”

34 Yesu de mɛ ke, “Ye niye ní ji kaa ma pee nɔ nɛ tsɔ mi ɔ suɔmi nya ní; nɛ́ nɔ́ nɛ e tsɔ mi tsumi ɔ, ma gbe nya.

35 Tse nyɛ deɔ ke, ‘E piɛ hlami eywiɛ nɛ a ma kpa ní.’ Se i ngɛ nyɛ dee ke, nyɛɛ hyɛ ngmɔ ɔmɛ a nɔ kɛ kpe, nɛ nyɛ maa na kaa ní ba, nɛ e kpami be su nɛ a ma bua nya.

36 Amlɔ nɛ ɔ po ní kpalɔ ɔ ngɛ e hiɔwo nae; e ngɛ ngmɔ ní nya buae kɛ ngɛ wami nɛ ngɛ kɛ yaa neneene ɔ toe, konɛ ní dulɔ ɔ, kɛ ní kpalɔ ɔ tsuo nɛ a bla kɛ nya.

37 Enɛ ɔ tsɔɔ kaa nɔ́ ko nɛ a deɔ ke, ‘Nɔ ko duɔ ní, nɛ nɔ ko hu kpaa’ a ngɛ mi niinɛ.

38 I tsɔ nyɛ ní kpami ngɛ ngmɔ nɔ he nɛ nyɛ du we nɔ́ ko ngɛ. Ni kpahi tsu ní ɔ, se nyɛ mohu lɛ nyɛ ba na he se.”

39 Samaria bi babauu nɛ ngɛ jamɛ a ma a mi ɔ he Yesu ye, ejakaa yo ɔ de mɛ ke, “E de mi níhi tsuo nɛ i pee.”

40 Lɔ ɔ he ɔ, benɛ Samaria bi ɔmɛ ba Yesu ngɔ ɔ, a kpa lɛ pɛɛ ke e hi a ngɔ. Nɛ Yesu kɛ mɛ hi lejɛ ɔ ligbi enyɔ.

41 Benɛ Yesu fiɛ munyu ɔ, nihi babauu pe kekle ɔ he ye.

42 Kɛkɛ nɛ a de yo ɔ ke, “Jehanɛ lɛɛ pi o munyu ɔ nya hu nɛ wa heɔ yeɔ kaa nɔmlɔ nɛ ɔ ji je ɔ yi wami helɔ ɔ, se mohu nɔ́ nɛ wɔ nitsɛmɛ wa nu kɛ wa tue kɛ je lɛ nitsɛ e nya a he.”

Yesu tsa amlaalo nɔkɔtɔma ko binyumu

43 Yesu ye ligbi enyɔ ngɛ lejɛ ɔ, nɛ e pue nɔ kɛ ho Galilea ya,

44 ⓞ ejakaa lɛ nitsɛ e ye odase ke, “A bui gbalɔ ngɛ lɛ nitsɛ e ma mi.”

45 ⓟ Benɛ e ba su Galilea a, ma a tsuo he lɛ atuu, ejakaa níhi tsuo nɛ e pee ngɛ Yerusalem Hetsɔmi nyami be ɔ, mɛ nitsɛmɛ a ya lejɛ ɔ nɛ a na paa.

46 ⓠ Jehanɛ ɔ, Yesu kpale kɛ ba Kana ngɛ Galilea, he nɛ e ha nyu plɛ pee wai ngɛ be ko ɔ ekohu. Tsɔlɔ nɔkɔtɔma ko ngɛ Kapernaum nɛ e bi be he wami.

47 Benɛ e ná le kaa Yesu je Yudea kɛ ba Galilea a, e ba e ngɔ, nɛ e ba kpa lɛ pɛɛ ke e binyumu miɔ nɛ e ma gbo, lɔ ɔ he ɔ, a ho Kapernaum ya nɛ e ya tsa lɛ.

48 Se Yesu de lɛ ke, “Blɔɔ ke nyɛ nɛ okadihi, kɛ nyakpɛ níhi ɔ, lɛɛ nyɛ be hee maa ye!”

49 Tsɔlɔ ɔ de lɛ ke, “Nyɔmtsɛ, ha waa ho esɔ, ke pi ja a, ye bi ɔ ma gbo.”

50 Yesu de lɛ ke, “Yaa, o bi ɔ yi na wami.” Munyu ɔ nɛ Yesu tu nyumu ɔ, e he ye, nɛ e pue nɔ kɛ ho.

51 Benɛ e ngɛ blɔ ɔ nɔ kɛ yaa we mi ɔ, e sɔmɔli kɛ lɛ ba kpe; nɛ a de lɛ ke, “O bi ɔ yi na wami.”

52 Tsɔlɔ ɔ bi sɔmɔli ɔmɛ ke, “Mɛni be hiɔ ɔ fani ha lɛ ɔ?” A he nɔ ke, “Hiɛ̃ piani ngmlɛ kake be mi nɛ aslã a po ngɛ e nɔ.”

53 Kɛkɛ nɛ bitsɛ ɔ kai kaa jamɛ a be ɔ tutuutu nɛ Yesu de lɛ ke e ya, se e bi ɔ yi na wami ɔ nɛ. Lɔ ɔ he ɔ, e kɛ e we ɔ tsuo he Yesu ye.

54 Enɛ ɔ ji okadi enyɔne nɛ Yesu pee benɛ e je Yudea kɛ ba Galilea a.