Yohane 12

A pɔ Yesu nu ngɛ Betania

(<x>470 26:6-13</x>; <x>480 14:3-9</x>)

1 Jehanɛ ɔ, benɛ e piɛ ligbi ekpa nɛ a maa ye Hetsɔmi ɔ, Yesu ba Betania, he nɛ Lazaro nɛ gbo nɛ Yesu tle lɛ si kɛ je gbeje ɔ ngɛ ɔ.

2 A pee niye ní ha Yesu, nɛ Marta sɔmɔ lɛ. Lazaro piɛ nihi nɛ a kɛ Yesu ye ní ɔ a he.

3 ⓡ Kɛkɛ nɛ Maria ngɔ nardo nu ngmingmiingmi nɛ he jua wa saminya lita fa, nɛ e kɛ ba pɔ Yesu nane, nɛ e kɛ e yi bwɔmi tsu e nane ɔmɛ a he. Nu ɔ he via a kpe we ɔ mi tsuo;

4 lɔ ɔ he ɔ, Yuda Iskariot, Yesu kaseli ɔmɛ a ti nɔ kake nɛ maa tsɔɔ e se blɔ ɔ bi ke,

5 “Mɛni he je nɛ a jua we nu kɛ e he via nɛ ɔ sika hiɔ yi lafa etɛ nɛ a kɛ ha ohiatsɛmɛ?”

6 Se enɛ ɔ nɛ e de ɔ, pi kaa ohiatsɛmɛ ɔmɛ a he nɔ́ nɛ ngɛ lɛ dɔe. Mohu julɔ ji lɛ; nɛ akɛnɛ sika kpɛɛ ɔ ngɛ e dɛ ɔ, ke pee ɔ, e juɔ nɔ́ nɛ a ngɔ woɔ mi ɔ eko.

7 Se Yesu he nɔ ke, “Koo doo e nya; e pee nɔ nɛ ɔ ngɔ to ye pumi be.

8 ⓢ Ohiatsɛmɛ ɔmɛ ɔ, nyɛɛ kɛ mɛ ngɛ daa, se imi lɛɛ pi daa nɛ i kɛ nyɛ maa hi si.”

A so Lazaro yi nɔ

9 Yuda bi babauu nu Yesu he ngɛ Betania, nɛ a bu kɛ ba kaa a maa na lɛ, kɛ Lazaro nɛ e tle si kɛ je gbeje ɔ hulɔ.

10 Enɛ ɔ he ɔ, osɔfo nikɔtɔma amɛ ya so nɛ a maa gbe Lazaro hulɔ,

11 ejakaa e he ɔ, Yuda bi ɔmɛ a ti nihi babauu kua mɛ, nɛ a ya he Yesu ye.

Yesu Yerusalem sɛmi

(<x>470 21:1-11</x>; <x>480 11:1-11</x>; <x>490 19:28-40</x>)

12 E nɔ jena a, nimli kpekpemi ɔ nɛ ba nɛ a ba ye Hetsɔmi nyami ɔ nu kaa Yesu ma Yerusalem.

13 ⓣ Lɔ ɔ he ɔ, a kukuɔ tã ba, nɛ a je kpo, nɛ a kɛ lɛ ya kpe kɛ a nɔ ose ke, “Mo kpɔ wɔ oo! Mawu nɛ gbaa nɔ nɛ ma ngɛ Nyɔmtsɛ ɔ biɛ mi ɔ! Mawu nɛ gbaa Israel matsɛ ɔ!”

14 Yesu na teji ko nɛ e hi nɔ kaa bɔ nɛ a ngma a ke,

15 ⓤ “Zion biyo, koo ye gbeye! O matsɛ ɔ ma. E hi teji bi nɔ.”

16 Jamɛ a be ɔ, e kaseli ɔmɛ nui nɔ́ nɛ ɔ sisi; se benɛ a tle Yesu si, nɛ a wo e hɛ mi nyami se ɔ, a kai kaa a ngma nɔ́ nɛ ɔ ngɛ Yesu he, nɛ e ba mi.

17 Nihi nɛ a kɛ Yesu nyɛɛ benɛ e tsɛ Lazaro ngɛ yɔkɔ ɔ mi, nɛ e tle lɛ si kɛ je gbeje ɔ ya sɛɛ nɔ́ nɛ Yesu pee ɔ.

18 Kikɛmɛ a okadi nɛ ɔ nɛ e to mɛ ɔ he nɛ ma kpekpemi ɔ ya kpee lɛ ɔ nɛ.

19 Lɔ ɔ he ɔ, Farisi bi ɔmɛ de a he ke, “Tse nyɛ na kaa nyɛ nyɛ we nɔ́ ko nɛ nyɛɛ pee. Hyɛ, je ɔ tsuo nɛ hia kɛ nyɛɛ e se ɔ nɛ.”

Hela bi komɛ ba hla Yesu

20 Nihi nɛ ya Mawu jami ngɛ Yerusalem nyami be ɔ, Hela bi komɛ piɛ a he.

21 Nimli nɛ ɔmɛ ba Filipo nɛ je Betsaida ngɛ Galilea a ngɔ, nɛ a ba de lɛ ke, “Nyɔmtsɛ, wa ngɛ hlae nɛ waa na Yesu.”

22 Filipo hu ya de Andrea, nɛ mɛ ni enyɔ ɔmɛ a ya bɔ Yesu amaniɛ.

23 Yesu he nɔ ke, “Jehanɛ lɛɛ be ɔ su nɛ a maa wo Nɔmlɔ Bi ɔ hɛ mi nyami babauu.

24 I ngɛ nyɛ dee anɔkuale mi ke, ke a du we ngma ngu ngɛ zu mi, nɛ e gbo ɔ, lɛɛ ngma ngu kake ngmelu ji lɛ daa. Se ke e gbo ɔ, e woɔ yiblii babauu.

25 ⓥ Nɔ nɛ suɔ e wami ɔ, e wami ɔ maa laa lɛ; se nɔ nɛ ngɔɔ e wami ngɔ haa ngɛ je nɛ ɔ mi ɔ, e maa to e wami ɔ kɛ maa ya neneene.

26 Ke nɔ ko suɔ kaa e ma sɔmɔ mi ɔ, e nyɛɛ ye se, kɛkɛ ɔ, i kɛ ye tsɔlɔ ɔ maa hi he kake. Nɔ tsuaa nɔ nɛ ma sɔmɔ mi ɔ, Tsaatsɛ maa wo e hɛ mi nyami.”

Yesu tu e gbenɔ he munyu

27 Yesu de ke, “Jehanɛ lɛɛ ye mumi ngɛ haoe ngɛ ye mi, nɛ i li nɔ nɛ ma de. Anɛ ma de Tsaatsɛ nɛ e tsi amanehlu nɛ ɔ nya nɛ e ko ba ye nɔ lo? Dɛbi! Lɔ ɔ nɔuu he nɛ i ba, konɛ ma ba gblee be nɛ ɔ kɛ e mi nɔ́ nami kpetekpleenyɛ ɔ mi.

28 Tsaatsɛ, wo mo nitsɛ o hɛ mi nyami!” Kɛkɛ nɛ gbi ko je hiɔwe de ke, “I wo ye hɛ mi nyami momo, se ma kpale pee ekohu.”

29 Benɛ nimli kpekpemi ɔ nɛ daa si ngɛ lejɛ ɔ nu gbi ɔ, a ti ni komɛ de ke, “Hiɔwe si”; nɛ ni komɛ hu de ke, “Hiɔwe bɔfo ko kɛ lɛ tu munyu.”

30 Se Yesu de mɛ ke, “Gbi nɛ ɔ, pi imi ye he nɛ e pɛ, nyɛ mohu nyɛ he.

31 Amlɔ nɛ ɔ, be ɔ su nɛ a maa kojo je ɔ, nɛ nɔ nɛ ngɛ je ɔ nɔ matsɛ yee ɔ, a ma kpa lɛ.

32 Ke a wo ye nɔ kɛ je zugba a nɔ ɔ, ma gbla nihi tsuo kɛ ba ye ngɔ.”

33 Munyu nɛ e tu nɛ ɔ tsɔɔ nɔ gbenɔ nɛ e ma gbo.

34 ⓦ Ma kpekpemi ɔ he nɔ ke, “Wa mlaa a de ke Kristo ɔ maa hi si kɛ maa ya neneene. Kɛ pee kɛɛ nɛ moo lɛɛ o deɔ ke a ma wo Nɔmlɔ Bi ɔ nɔ ɔ? Mɛnɔ ji kikɛmɛ a Nɔmlɔ Bi nɛ ɔ?”

35 Yesu he nɔ ke, “Be bɔɔ ko pɛ nɛ e piɛ nɛ la a kɛ nyɛ maa hi si kɛ yaa si. Be mi nɛ la a ngɛ nɛ ɔ, nyɛɛ nyɛɛ blɔ ɔ nɔ, konɛ diblii ɔ nɛ ko ba na nyɛ, ejakaa nɔ nɛ nyɛɛɔ diblii mi ɔ, e li he nɛ e yaa.

36 Be abɔ nɛ nyɛ ngɛ la a nɛ ɔ, nyɛ he lɛ nyɛɛ ye, konɛ nyɛ plɛ la a bimɛ.” Munyu nɛ ɔ se ɔ, Yesu je a he ngɛ lejɛ ɔ, nɛ e ya laa e he.

Yuda bi ɔmɛ he we yi

37 Yesu pee ní nɛ ɔmɛ tsuo kɛ to okadi ngɛ ni ɔmɛ a hɛ mi paa, se a he we lɛ yi,

38 ⓧ bɔ nɛ pee nɛ gbalɔ Yesaya munyu ɔ nɛ ba mi. Yesaya de ke, “Nyɔmtsɛ, munyu nɛ wa fiɛ ɔ, mɛnɔ lɛ he ye? Mɛnɔ lɛ Nyɔmtsɛ ɔ je e he si tsɔɔ?”

39 Lɔ ɔ he ɔ, a nyɛ we nɛ a he ye, ejakaa Yesaya de hu ke,

40 ⓨ “Mawu ma a hɛngmɛ, nɛ e tsi a juɛmi nya hulɔ, konɛ a hɛngmɛ ko hyɛ nɔ́, nɛ a ko nu nɔ́ sisi. Mawu pee mɛ kikɛ nɛ ɔ, konɛ a ko kpale kɛ ba e ngɔ nɛ a tsa mɛ.”

41 Yesaya de enɛ ɔ, ejakaa e na Yesu hɛ mi nyami ɔ ngɛ e hɛ mi lokoo, nɛ e tu he munyu.

42 Yuda ma nimeli ɔmɛ a ti nihi babauu he Yesu ye, se Farisi bi ɔmɛ a he ɔ, a nyɛ we nɛ a ye odase paa, bɔ nɛ pee nɛ a ko fie mɛ ngɛ kpe he ɔ.

43 A suɔ kaa a sa nimli a hɛ mi pe nɛ a maa pee nɔ nɛ sa Mawu hɛ mi.

Yesu munyu kojoɔ nɔ

44 Yesu de kɛ ngmlaa ke, “Nɔ tsuaa nɔ nɛ heɔ mi yeɔ ɔ, pi imi nɛ e he ye, se mohu nɔ nɛ tsɔ mi ɔ nɛ e he ye ɔ nɛ.

45 Nɔ tsuaa nɔ nɛ na mi ɔ, e na nɔ nɛ tsɔ mi ɔ.

46 Imi lɛɛ i ba je ɔ mi kaa la, konɛ nɔ tsuaa nɔ nɛ heɔ mi yeɔ ɔ, e ko hi diblii ɔ mi.

47 Ke nɔ ko nu ye munyu ɔ, se e yi nɔ ɔ, pi imi nɛ ma kojo lɛ. I bɛ nɛ ma ba kojo je ɔ; se mohu i ba nɛ ma ba he je ɔ yi wami.

48 Nɔ tsuaa nɔ nɛ kua mi, nɛ e ngɔɛ munyu nɛ i fiɛ ɔ hulɔ ɔ, nɔ ko ngɛ nɛ maa kojo lɛ. Nyagbe ligbi ɔ, munyu ɔmɛ nɛ i tu ɔ maa kojo lɛ.

49 Anɔkuale munyu ji nɛ ɔ nɛ, ejakaa níhi tsuo nɛ i de ɔ, pi imi nitsɛ ye yi mi nɛ i to kɛ de ekoeko. Tsɛ ɔ nɛ tsɔ mi ɔ lɛ fa ke ma de.

50 I le kaa nɔ́ nɛ Tsɛ ɔ fa ke e ba mi ɔ haa neneene wami; lɔ ɔ he ɔ, nɔ́ nɛ e de mi ɔ, lɔ ɔ i deɔ.”