Yohane 10

Abɛ nɛ kɔɔ to hyɛlɔ ɔ he

1 Yesu de ke, “I ngɛ nyɛ dee anɔkuale mi ke, ke to tsu ngɛ, nɛ nɔ ko ya kuɔ kɛ gu he kpa kɛ sɛ mi, se e gui to tsu ɔ nya a, jamɛatsɛ ɔ, julɔ kɛ ojo fialɔ ji lɛ.

2 To hyɛlɔ ɔ, to tsu ɔ nya e guu kɛ sɛɛ mi;

3 nɛ agbo ɔ nya bulɔ ɔ bliɔ haa lɛ. To ɔmɛ le e gbi, ejakaa e kɛ a biɛ tsɛɔ mɛ, nɛ e tsɔ́ɔ́ mɛ kɛ jeɔ kpo.

4 Ke e je to ɔmɛ kpo ɔ, lɛ nitsɛ e nyɛɛɔ hɛ mi, nɛ to ɔmɛ nyɛɛɔ e se, ejakaa a le e gbi.

5 Ke nɔ kpa ko tsɛ to ɔmɛ ɔ, a nyɛɛ we e se, se a tuu fo kɛ jeɔ e he, ejakaa a li nɔ kpa gbi.”

6 Yesu tu mɛ munyu nɛ ɔ ngɛ abɛ gbi mi, se a nui sisi.

Yesu ji agbo ɔ

7 Lɔ ɔ he ɔ, Yesu kpale de ekohu ke, “I ngɛ nyɛ dee anɔkuale mi ke imi ji to tsu ɔ nya agbo ɔ nɛ.

8 Nihi tsuo nɛ sɛ ye hlami kɛ ba a, juli, kɛ ojo fiali ji mɛ; nɛ to ɔmɛ bui mɛ tue.

9 Imi ji agbo ɔ nɛ; nɔ tsuaa nɔ nɛ ba guu agbo ɔ mi kɛ sɛɔ mi ɔ, e yi ma na wami. E maa sɛ mi, nɛ e maa kpale je kpo ya na niye ní.

10 Se julɔ ɔ lɛɛ ke e ba a, e ba juɔ; e gbeɔ to ɔmɛ, nɛ e kpataa a hɛ mi. Imi lɛɛ i ba, konɛ nyɛ na wami, nɛ nyɛ na kɛ be nɔ.

Yesu, to hyɛlɔ kpakpa a

11 “Imi ji to hyɛlɔ kpakpa a nɛ. I suɔ kaa ma gbo ngɛ to ɔmɛ a he.

12 Apaa yelɔ ɔ, pi to hyɛlɔ ji lɛ, ejakaa to ɔmɛ pi e níhi. Lɔ ɔ he ɔ, ke e na ogbetee nɛ ma a, e siɔ to ɔmɛ, nɛ e tuu fo kɛ jeɔ. Kɛkɛ ɔ, ogbetee ɔ ba nuɔ to ɔmɛ, nɛ a gbɛɛ fĩaa.

13 Apaa yelɔ ɔ tuɔ fo, ejakaa apaa yelɔ kɛkɛ ji lɛ, nɛ to ɔmɛ a he nɔ dɔɛ lɛ.

14 ⓛ Imi ji to hyɛlɔ kpakpa a nɛ. Tsɛ ɔ le mi, nɛ imi hu i le lɛ; nɛ jã nɔuu i le ye to ɔmɛ, nɛ ye to ɔmɛ hu le mi. Nɛ i suɔ hu kaa ma gbo ngɛ a he.

15

16 I ngɛ to kpa komɛ hulɔ, se mɛɛ a piɛ we kuu nɛ ɔ he. Ma ngɔ mɛ hu kɛ ba; a maa nu ye gbi, nɛ a maa pee to kuu kake, kɛ hyɛlɔ kake.

17 “Tsɛ ɔ suɔ mi, ejakaa i suɔ kaa ma ngɔ ye wami kɛ fɔ si, konɛ ma kpale ngɔ.

18 Nɔ ko be nyɛe ma kpɔ ye wami ɔ ngɛ ye dɛ. Imi nitsɛ ye tsui mi faa nɛ ma ngɔ kɛ ha. I ngɛ he wami nɛ ma nyɛ ma ngɔ ye wami ɔ ngɔ ha, nɛ ma nyɛ ma kpale ngɔ lɛ ekohu. Kikɛ nɛ ɔ Tsaatsɛ ke ma pee.”

19 Munyu nɛ ɔmɛ hu ha nɛ Yuda bi ɔmɛ a mi gba ekohu.

20 A ti nihi fuu de ke, “Mumi yayami ngɛ e mi. Nɔmlɔ nɛ ngɛ godo nue ɔ, mɛni he je nyɛ ngɛ lɛ tue bue ɔ?”

21 Se ni komɛ hu de ke, “Nɔmlɔ nɛ mumi yayami ngɛ e mi be nyɛe maa tu munyu kikɛ nɛ ɔ. Kɛ mumi yayami ma nyɛ bli hɛ yuyuili a hɛngmɛ kɛɛ?”

Yuda bi ɔmɛ kua Yesu

22 Be nɛ e su fĩɛ be, nɛ a ngɛ sɔlemi we ɔ he tsukɔmi kaimi yee ngɛ Yerusalem ɔ, Yesu slaa si kɛ ya be ngɛ Salomo ablanaa a mi ngɛ sɔlemi we ɔ.

23

24 Kɛkɛ nɛ Yuda bi ɔmɛ ba bu e nɔ, nɛ a bi lɛ ke, “Kɛ yaa su mɛni be nɛ o ma ha wa yi mi maa pee wɔ sikɔsikɔ ngɛ o he? Anɛ mo ji Kristo ɔ? De wɔ anɔkuale ɔ koo!”

25 Yesu he nɔ ke, “Tse i de nyɛ momo nɛ nyɛ he we yi! Tsaatsɛ he wami nya nɛ i tsuɔ ní nɛ ɔmɛ, nɛ níhi nɛ i tsuɔ ɔ yeɔ ye he odase.

26 Se nyɛɛ lɛɛ nyɛ he we yi, ejakaa pi ye tohi ji nyɛ.

27 Ye to ɔmɛ buɔ mi tue; i le mɛ, nɛ a nyɛɛɔ ye se.

28 I haa mɛ neneene wami, nɛ a be gboe gblegbleegble. Nɔ ko nɔ ko be nyɛe ma kpɔ mɛ ngɛ ye dɛ.

29 Tsaatsɛ ha mi nɔ́ ko nɛ pe níhi tsuo,[3] nɛ nɔ ko nɔ ko be nyɛe ma kpɔ ní nɛ ɔmɛ ngɛ Tsɛ ɔ dɛ.

30 I kɛ Tsɛ ɔ ni kake ji wɔ.”

31 Kɛkɛ nɛ Yuda bi ɔmɛ kukuɔ tɛ ekohu nɛ a maa fia Yesu.

32 Se Yesu de mɛ ke, “I pee ní kpakpahi babauu nɛ nyɛ na. Níhi nɛ i pee ɔ, Tsɛ ɔ nɛ tsɔɔ mi. Te nɔ́ nɛ he nɛ nyɛ ngɛ hlae nɛ nyɛɛ fia mi tɛ ɔ.”

33 ⓜ Yuda bi ɔmɛ he nɔ ke, “Tsa pi kpakpa nɛ o pee ɔ he nɛ wa maa fia mo tɛ ɔ, se mohu musu nɛ o bɔ ɔ he. Nɔmlɔ adesa kɛkɛ ji mo, se o peeɔ o he Mawu.”

34 ⓝ Yesu he nɔ ke, “A ngma ngɛ nyɛ mlaa a mi ke, Mawu de ke, ‘Mawuhi ji nyɛ.’

35 Wa le kaa nɔ nɛ ngmami ɔ deɔ ɔ, anɔkuale sisiisi nɛ́ ngɛ kɛ yaa neneene. Nimli adesahi nɛ Mawu tsɔ nɛ a ngɔ e sɛ gbi ɔ ba ha mɛ ɔ po Mawu tsɛ mɛ ke mawuhi.

36 Lɛɛ imi nɛ Tsɛ ɔ hla mi, nɛ e tsɔ mi je ɔ mi ɔ, kɛ peeɔ kɛɛ nɛ ke i de ke Mawu Bi ji mi nɛ́ nyɛ deɔ ke i bɔ musu ɔ?

37 Ke i tsu we níhi nɛ Tsaatsɛ ke ma tsu ɔ, lɛɛ nyɛ ko he mi nyɛɛ ye.

38 Se ke jamɛ a ní tsumi ɔmɛ i tsuɔ ɔ, lɔ ɔ lɛɛ ke nyɛ he we imi nitsɛ yi po ɔ, níhi nɛ i peeɔ ɔ, nyɛ he nyɛɛ ye mɔ. Kɛkɛ ɔ, nyɛ maa le si kake nyɔngloo kaa Tsɛ ɔ ngɛ ye mi, nɛ imi hu i ngɛ Tsɛ ɔ mi.”

39 A ka ekohu kaa a maa nu Yesu, se a nyɛ we; nɛ e je a dɛ mi slɔkee.

40 ⓞ Jehanɛ ɔ, Yesu kpale e se kɛ ho Yordan pa a se ya ngɛ he nɛ Yohane sɔle nihi ngɛ be ko ɔ, nɛ e ya hi lejɛ ɔ.

41 Nihi babauu ba e ngɔ, nɛ a de ke, “Yohane pee we okadi ko lɛɛ, se níhi tsuo nɛ e de ngɛ nɔmlɔ nɛ ɔ he ɔ, anɔkuale sisiisi.”

42 Nɛ nihi babauu nɛ ngɛ lejɛ ɔ he lɛ ye.