Yohane 1

Munyu nɛ haa nɔ wami

1 Loko nɔ́ tsuaa nɔ́ je sisi ɔ, Munyu ɔ ngɛ momo. Munyu ɔ kɛ Mawu nɛ ngɛ, nɛ Munyu ji ɔ Mawu ngɛ.

2 Munyu ɔ kɛ Mawu kɛ je sisije, nɛ

3 Munyu ɔ nɔ Mawu gu kɛ pee nɔ́ tsuaa nɔ́. Níhi tsuo nɛ a pee ɔ, a si we Munyu ɔ se kɛ pee ekoeko.

4 Wami ngɛ Munyu ɔ mi, nɛ wami nɛ ɔ ngɔ la ba ha nimli adesahi.

5 La a ngɛ tsoe ngɛ diblii mi, se diblii ɔ nyɛ we lɛ nɛ e gbe gblegbleegble.

6 ⓐ Mawu tsɔ nɔ ko kɛ ba je ɔ mi. A tsɛɛ lɛ Yohane.

7 E ba nɛ e ba ye la a he odase ha nimli adesahi, konɛ mɛ tsuo a he ye.

8 Yohane ɔ, pi lɛ ji la a; mohu e ba ye la a he odase.

9 La nɛ ɔ ji la nɛ tsoɔ haa nimli adesahi tsuo.

10 Munyu ɔ ngɛ je ɔ mi, nɛ e nɔ Mawu gu kɛ bɔ je ɔ, se mohu je ɔ yo we lɛ.

11 E ba lɛ nitsɛ e ma mi, se e ma mi bi ɔmɛ he we lɛ.

12 Se nihi tsuo nɛ he lɛ atuu, nɛ a he lɛ ye ɔ, e ha mɛ blɔ nya kaa a ba pee Mawu bimɛ.

13 A pee mɛ Mawu bimɛ, pi ngɛ he lo nya kaa nyumu fɔɔ bi aloo nɔmlɔ adesa suɔmi nya; Mawu mi a je kɛ fɔ mɛ.

14 Munyu ɔ ba plɛ adesa, nɛ e kɛ wɔ hi si. Dloomi kɛ anɔkuale hyi lɛ babauu. Wa na lɛ, nɛ a wo e hɛ mi nyami kaa lɛ pɛ ji Tsɛ ɔ Bi.

15 Yohane ye e he odase. E kɛ ngmlaa de ke, “Nɔmlɔ nɛ ɔ he munyu nɛ i tu ke, ‘Nɔ ko ma ngɛ ye se; se e pã mi, ejakaa e ngɛ loko i ngɛ’ ɔ nɛ.”

16 E mi mi hi kɛ be nɔ, lɔ ɔ he ɔ, e ha wa ti nɔ tsuaa nɔ dloomi nɔtonɔto.

17 Mawu ha wɔ mlaa kɛ gu Mose nɔ, se dloomi kɛ anɔkuale gu Yesu Kristo nɔ kɛ ba.

18 Mawu ɔ, nɔ ko nɛ lɛ hyɛ. E bi kake too ɔ nɛ hii si ngɛ Tsɛ ɔ hiɔ nɔ ɔ, lɛ nɛ e tsɔɔ wɔ bɔ nɛ Tsɛ ɔ ngɛ ha.

Yohane nɔ sɔlelɔ ɔ fiɛ

(<x>470 3:1-12</x>; <x>480 1:1-8</x>; <x>490 3:1-18</x>)

19 Yuda ma nimeli ɔmɛ nɛ ngɛ Yerusalem ɔ tsɔ osɔfo komɛ, kɛ Levi bi komɛ Yohane ngɔ. A ba bi lɛ ke, “Mɛnɔ ji mo?”

20 Yohane laa we nɔ́ ko nɔ, se e gba mi paa ke, “Tsa pi imi ji Kristo ɔ.”

21 ⓑ A bi lɛ ke, “Mɛnɔ ji mo mɔ? Eliya lo?” Yohane he nɔ ke, “Tsa pi imi ji Eliya.” A bi lɛ ekohu ke, “Mo ji gbalɔ ɔ lo?” Yohane he nɔ ke, “Dɛbi!”

22 Jehanɛ ɔ, a kpale bi lɛ ke, “Lɛɛ mɛnɔ ji mo mɔ? Tsɔɔ wɔ koo! Ejakaa nihi nɛ tsɔ wɔ ɔ, e hia kaa wa ya ha mɛ heto. Kɛ o deɔ ngɛ mo nitsɛ o he kɛɛ?”

23 ⓒ Yohane he nɔ ke, “Imi ji nɔ nɛ ngɛ fiɛe ngɛ nga a nɔ ke, ‘Nyɛ dla blɔ ngɔ to Nyɔmtsɛ ɔ,’ kaa bɔ nɛ gbalɔ Yesaya de ɔ nɛ.”

24 Nihi nɛ Farisi bi ɔmɛ tsɔ kɛ ba a

25 kpale bi lɛ ke, “Ke pi mo ji Kristo ɔ, pi Eliya ji mo, nɛ pi mo ji gbalɔ ɔ hulɔ ɔ, lɛɛ mɛni he nɛ o ngɛ nihi sɔlee mɔ?”

26 Yohane he nɔ ke, “Imi lɛɛ nyu i kɛ ngɛ nyɛ sɔlee; se nɔ ko daa si ngɛ nyɛ kpɛti ngɛ hiɛmɛ nɛ ɔ nɛ nyɛ li lɛ.

27 I sɛ e hlami kɛ ba mohu, se i sɛ nɔ nɛ pɛneɔ e tokota nya kpa tete po.”

28 A pee ní nɛ ɔmɛ tsuo ngɛ Betania, ngɛ Yordan pa a beleku je, he nɛ Yohane ngɛ nihi sɔlee ngɛ ɔ.

Mawu To Bi ɔ

29 E nɔ jena a, Yohane na Yesu nɛ ma e ngɔ. Kɛkɛ nɛ e de ke, “Hyɛ, Mawu To Bi ɔ nɛ woɔ je ɔ he yayami kɛ yaa a, lɛ ji nɛ ɔ nɛ.

30 Nɔmlɔ nɛ ɔ he nɛ i de ngɛ ke, ‘Nɔ ko ma ngɛ ye se, se e pe mi, ejakaa e ngɛ loko i ngɛ’ ɔ nɛ.

31 Imi nitsɛ i li lɛ, se i kɛ nyu ba ngɛ nihi sɔlee, bɔ nɛ pee nɛ Israel ma a nɛ le lɛ.”

32 Jehanɛ ɔ, Yohane tu munyu kɛ ye Yesu he odase ke, “I na Mumi ɔ nɛ kple si kɛ je hiɔwe kaa lahuɛ ba ma e nɔ.

33 Imi hu jinɛ i li lɛ, se Mawu, nɔ nɛ tsɔ mi ke ma ba sɔle nihi ngɛ nyu mi ɔ lɛ de mi ke, ‘Nɔ nɛ nɔ nɛ Mumi ɔ ma ba ma a, lɛ ji nɔ nɛ maa ngɔ Mumi Klɔuklɔu ɔ kɛ sɔle nihi.’

34 Nɔ́ nɛ ɔ ba mi jã pɛpɛɛpɛ nɛ i na, lɔ ɔ he nɛ i ngɛ odase yee ke Yesu ji Mawu Bi ɔ nɛ.”

Yesu tsɛ kekleekle kaseli

35 E nɔ jena benɛ Yohane kɛ e kaseli ɔmɛ a ti ni enyɔ daa si ekohu ɔ,

36 e na Yesu nɛ bee. Kɛkɛ nɛ Yohane de ke, “Ne Mawu To Bi ɔ!”

37 Amlɔ nɔuu nɛ kaseli enyɔ ɔmɛ nu munyu nɛ ɔ, a ya nyɛɛ Yesu se kɛ yaa.

38 Benɛ Yesu plɛ e he, nɛ e na kaa kaseli ɔmɛ nyɛɛ e se ɔ, e bi mɛ ke, “Mɛni nyɛ ngɛ hlae?” A he nɔ ke, “Tsɔɔlɔ, jije o hii?”

39 Yesu he nɔ ke, “Nyɛɛ ba nɛ nyɛ ba hyɛ.” (Jamɛ a be ɔ, a fia gbɔkuɛ ngmlɛ eywiɛ). Kɛkɛ nɛ a kɛ lɛ pue nɔ kɛ ho, nɛ a ya na e hi he ɔ; nɛ a kɛ lɛ hi si kɛ ya si du bu.

40 Kaseli enyɔ ɔmɛ a ti nɔ kake biɛ ji Andrea, Simon Petro nyɛmi ɔ.

41 E kɛ we kulaa nɛ Andrea kɛ e nyɛmi Simon ba kpe. Andrea de Simon ke, “Wa na Mesia a.” (Mesia sisi ji Kristo).

42 Kɛkɛ nɛ e ngɔ Simon kɛ ya Yesu ngɔ. Yesu hyɛ Simon too, nɛ e de lɛ ke, “Tse mo ji Yohane bi Simon ɔ. Jehanɛ lɛɛ a ma tsɛ mo Kefa.” (E sisi ji Petro, loo tɛ sa.)

Yesu tsɛ Filipo kɛ Natanael

43 E nɔ jena a, Yesu to e yi mi kaa e maa ya Galilea. Kɛkɛ nɛ e kɛ Filipo kpe, nɛ e de lɛ ke, “Filipo, nyɛɛ ye se.”

44 Filipo je Betsaida, ma mi he nɛ Andrea kɛ Petro hu je ɔ.

45 Benɛ Filipo hu kɛ Natanael ya kpe ɔ, Filipo de lɛ ke, “Natanael, hyɛ, nɔmlɔ ɔ nɛ Mose ngma e he sane ngɛ mlaa womi ɔ mi, nɛ gbali ɔmɛ hu tu e he munyu ɔ, wa na lɛ. Lɛ ji Yosef bi Yesu nɛ je Nazaret ɔ.”

46 Se Natanael bi Filipo ke, “Anɛ nɔ́ kpakpa ko maa je Nazaret lo?” Filipo he nɔ ke, “Ba nɛ o ba hyɛ!”

47 Benɛ Yesu na Natanael nɛ ma e ngɔ ɔ, e de ke, “Israel no ngmingmiingmi ji nɛ ɔ nɛ; sé ko be e he.”

48 Natanael bi Yesu ke, “Jije o le mi ngɛ?” Yesu he nɔ ke, “I na mo pi mwɔnɛ; i na mo ngɛ ngmɔkɔ tso ɔ sisi tɔɔ loko Filipo tsɛ mo.”

49 Natanael kpale he nɔ ke, “Tsɔɔlɔ, niinɛ, mo ji Mawu Bi ɔ! Mo ji Israel matsɛ ɔ nɛ!”

50 Jehanɛ ɔ, Yesu bi Natanael ke, “Akɛnɛ i de mo ke i na mo ngɛ ngmɔkɔ tso ɔ sisi ɔ, lɔ ɔ he nɛ o he ye ɔ? O maa na ní nguahi nɛ pe enɛ ɔ.”

51 ⓓ Nyagbe ɔ, e de mɛ ke, “I ngɛ nyɛ dee anɔkuale mi ke hiɔwe nya ma bli, nɛ nyɛ maa na Mawu bɔfo ɔmɛ nɛ a ngɛ kuɔe kɛ ngɛ imi Nɔmlɔ Bi ɔ ye ngɔ bae, nɛ a ngɛ kpalee kɛ ngɛ yae.”