Mose V, 8

Zugba kpakpa a

1 “Nyɛɛ ye mlaa amɛ tsuo nɛ i ngɛ nyɛ woe mwɔnɛ ɔ a nɔ pɛpɛɛpɛ, konɛ nyɛ yi nɛ na wami, nɛ nyɛ he nɛ hiɛ, nɛ nyɛ ya ngɔ zugba a nɛ Yawɛ wo nyɛ nɛmɛ ɔmɛ si ke e ma ha mɛ ɔ.

2 Nyɛ kai kaa Yawɛ, nyɛ Mawu ɔ kpaka nyɛ ngɛ blɔ gagaa nɛ ɔ nɔ kɛ gu nga kplanaa a nɔ jeha nyingmi eywiɛ sɔuu. E ha hɛdo níhi kɛ nyɛ kpe kɛ ka nyɛ hyɛ, konɛ e kɛ le nɔ́ nɛ ngɛ nyɛ tsui mi, kaa nyɛ maa ye e mlaa amɛ a nɔ, loo nyɛ be a nɔ yee.

3 ⓧ E ha hwɔ ye nyɛ, nɛ e ha nyɛ abolo nɛ je hiɔwe nɛ nyɛ nɛmɛ nɛ hyɛ ɔ nɛ nyɛ ye. E pee enɛ ɔ, konɛ nyɛ na nɛ nyɛɛ le kaa pi abolo pɛ nɛ haa nɔmlɔ yi naa wami, se mohu munyu tsuaa munyu nɛ jeɔ Yawɛ nya mi ɔ nɛ haa nɔ yi naa wami.

4 Jeha nyingmi eywiɛ nɛ ɔ tsuo mi ɔ, nyɛ tade gba we ngɛ nyɛ he, nɛ nyɛ nanehi hu fuu we.

5 Nyɛ na nɛ nyɛɛ le kaa bɔ nɛ tsɛ tsɔseɔ e bi ɔ, ja Yawɛ, nyɛ Mawu ɔ ngɛ nyɛ tsɔsee ɔ nɛ.

6 Lɔ ɔ he ɔ, nyɛɛ pee bɔ nɛ Yawɛ, nyɛ Mawu ɔ fa nyɛ ɔ; nyɛɛ ye e mlaa amɛ a nɔ, nɛ nyɛɛ ye lɛ gbeye.

7 Yawɛ, nyɛ Mawu ɔ kɛ nyɛ yaa zugba nɛ baa ní saminya ko nɔ. Pahi, kɛ nyu hɛngmɛhi ngɛ nɔ, nɛ jehanɛ nyu pãã si kɛ jee zu mi nɛ e suɔ kɛ pueɔ yoku ɔmɛ a nɔ, kɛ kɔ̃ ɔmɛ a mi.

8 E ji zugba nɛ ngma, blɛfo, wai yiblii, ngmɔkɔ, tso nɛ yiblii ngɔɔ, oliv tso, kɛ hwo ngɛ nɔ.

9 Hwɔ be nyɛ yee, nɛ nɔ́ ko nɔ́ ko be nyɛ hiae. Tɛ nɛ ngɛ zugba a mi ɔ, dade ngɛ mi. Yo ɔmɛ a mi hu akɔblee ngɛ nɛ nyɛ ma nyɛ maa tsua.

10 Nyɛ ma na ní maa ye maa tɔ; nɛ nyɛ maa na Yawɛ, nyɛ Mawu ɔ si ngɛ zugba nɛ baa ní saminya nɛ e ha nyɛ ɔ he.

A bɔ ma a kɔkɔ ke a hɛ ko je Mawu nɔ

11 ⓨ “Nyɛɛ hyɛ nɛ hi nɛ nyɛ hɛ ko je Yawɛ, nyɛ Mawu ɔ nɔ. Nyɛ hɛ nɛ hi mlaa amɛ nɛ i ngɛ nyɛ woe mwɔnɛ ɔ a nɔ, nɛ nyɛɛ ye a nɔ.

12 Ke nyɛ ná ngma nɛ nyɛ ye nɛ nyɛ tɔ, nɛ nyɛ ma tsuhi nɛ ngɛ fɛu nɛ nyɛ ngɛ mi;

13 jehanɛ, ke nyɛ na amɛ kɛ to ɔmɛ, nyɛ sika hiɔ kɛ sika tsu, kɛ ní kpa amɛ tsuo ba hiɛ babauu ɔ,

14 nyɛɛ hyɛ saminya nɛ nyɛ ko wo nyɛ he nɔ, nɛ nyɛ hɛ ba je Yawɛ, nyɛ Mawu ɔ nɔ. Lɛ nɛ je nyɛ kɛ je Egipt, he nɛ a ye nyɛ nyɔguɛ ngɛ ɔ.

15 Lɛ ji nɔ nɛ kpaka nyɛ kɛ gu nga kplanaa gbajaa nɛ nɔ ngɛ gbeye ɔ nɔ ɔ nɛ. Lejɛ ɔ nɛ a naa sinɔhi nɛ a duɔ nya wa, kɛ nyingmogblakotohi ngɛ ɔ nɛ. Jehanɛ, ngɛ nga kplanaa a nɔ he nɛ nyu be ɔ, e je nyu kɛ je tslɛbo tɛ sa mi ha nyɛ.

16 Ngɛ nga a nɔ ɔ, e ha nyɛ mana, niye ní nɛ nyɛ nɛmɛ yi hyɛ, nɛ nyɛ ye. E ha nyɛ na hɛdo ní, nɛ e kɛ ka nyɛ hyɛ, konɛ lɔ ɔ se ɔ, e gbaa nyɛ kɛ ní kpakpahi.

17 E pee ja, konɛ nyɛ ko susu kaa nyɛ nitsɛmɛ nyɛ he wami nya nɛ nyɛ na ní nɛ ɔmɛ tsuo.

18 Nyɛ kai kaa Yawɛ, nyɛ Mawu ɔ ji nɔ nɛ haa nyɛ he wami nɛ nyɛ kɛ naa ní. E ngɛ enɛ ɔmɛ pee, ejakaa e ngɛ anɔkuale yee kɛ mwɔɔ ngɛ somi nɛ e kɛ nyɛ nɛmɛ ɔmɛ so ɔ he.

19 Nyɛ hɛ ko je Yawɛ, nyɛ Mawu ɔ nɔ kɔkɔɔkɔ; nyɛ ko nyɛɛ mawu kpahi a se; nyɛ ko ya ja mɛ, nɛ nyɛ ko sɔmɔ mɛ. Ke nyɛ pee ja a, lɛɛ i ngɛ nyɛ kɔkɔ bɔe mwɔnɛ ɔ kaa a ma kpata nyɛ hɛ mi.

20 Ke nyɛ bui Yawɛ, nyɛ Mawu ɔ tue ɔ, lɛɛ e ma kpata nyɛ hɛ mi kaa bɔ nɛ e ngɛ je ma amɛ a hɛ mi kpatae ngɛ nyɛ blɔ nɔ ɔ.