Mose V, 26

Ngmakpami be bɔ sami

1 “Ke e ba mi kaa o ya su zugba nɛ Yawɛ, o Mawu ɔ ngɔ ha mo ɔ nɔ, nɛ e pee o nɔ́ nɛ o ngɛ nɔ ɔ,

2 ⓨ nyɛ ti nɔ tsuaa nɔ nɛ ngɔ kekleekle niba ní nɛ e kpa ngɛ zugba a nɔ ɔ eko kɛ wo kusii mi, nɛ é ngɔ kɛ ya he nɛ Yawɛ, o Mawu ɔ to nɛ a ja lɛ ngɛ ɔ.

3 Ngɔɔ kɛ ya osɔfo nɛ ngɛ sɔmɔe jamɛ a be ɔ ngɔ, nɛ o de lɛ ke, ‘Mwɔnɛ ɔ, i ngɛ odase yee ngɛ Yawɛ, ye Mawu ɔ hɛ mi kaa i ba su zugba a nɛ Yawɛ wo wa nɛmɛ si ke e kɛ ma ha wɔ ɔ nɔ.’

4 “Jehanɛ, osɔfo ɔ nɛ he kusii ɔ ngɛ o dɛ kɛ ma Yawɛ, o Mawu ɔ bɔ sami la tɛ ɔ hɛ mi.

5 Mo de ngɛ Yawɛ hɛ mi ke, ‘Aram no si kpalɔ ji ye nɛ̃. E kɛ nihi bɔɔ pɛ nɛ ho Egipt ya; e ya to nubwɔ ngɛ lejɛ ɔ, se a ba pee ma agbo nɛ he wa saminya.

6 Egipt bi ɔmɛ pee wɔ yayami; a wa wɔ yi mi, nɛ a ye wɔ nyɔguɛ wawɛɛ.

7 Kɛkɛ nɛ wa fa kue kɛ tsɛ Yawɛ, wa nɛmɛ a Mawu ɔ, nɛ e bu wa gbi tue. E na wa haomi kɛ dengme gbomi, kɛ yi mi nɛ a ngɛ wɔ wae ɔ.

8 Yawɛ ngɔ e he wami kɛ kɔni si wami nɛ ngɛ gbeye kɛ je wɔ kɛ je Egipt. E pee okadihi, kɛ nyakpɛ níhi babauu.

9 Jehanɛ, e kɛ wɔ ba su hiɛ ɔ, nɛ e ha wɔ zugba nɛ hi, nɛ baa ní saminya nɛ ɔ.

10 Lɔ ɔ he ɔ, i ngɔ zugba nɛ mo, Yawɛ ngɔ ha mi ɔ mi kekleekle niba ní ɔ eko kɛ ba.’ “Lɔ ɔ se ɔ, ngɔɔ kusii ɔ kɛ ma Yawɛ, o Mawu ɔ hɛ mi, nɛ o ja Yawɛ ngɛ lejɛ ɔ.

11 Mo nya ngɛ ní kpakpahi nɛ Yawɛ ha o kɛ o we ɔ he. Ha nɛ Levi no, kɛ nubwɔ nɛ kɛ mo ngɛ ɔ nɛ a piɛ o he kɛ nya.

12 ⓩ “Jeha etɛ tsuaa jeha etɛ ɔ, ngɔɔ o niba ní mi dlami nyɔngma mi kake kɛ ha Levi bi, nibwɔhi, awusahi, kɛ yalɔyihi, konɛ mɛ tsuo a na niye ní nɛ a ye nɛ a tɔ ngɛ ma a mi he tsuaa he nɛ a ngɛ ɔ. Enɛ ɔ se ɔ,

13 de Yawɛ, o Mawu ɔ ke, ‘I je ní klɔuklɔu ɔmɛ tsuo kɛ je ye we ɔ mi, nɛ i ngɔ ha Levi bi, nibwɔhi, awusahi, kɛ yalɔyihi ngɛ mlaa nɛ o wo mi ɔ nya; i tɔ̃ we ekoeko, nɛ ye hɛ ji eko nɔ hulɔ.

14 Benɛ i ngɛ kɔmɔ yee ɔ, i yi mi dlami nyɔngma mi kake ɔ eko; benɛ ye he tsɔ we ɔ, i ngɔɛ eko kɛ ji ye we ɔ mi; jehanɛ hu, i kɛ eko sɛ̃ bɔ ha gbogboe ko. Niinɛ, Yawɛ, ye Mawu, i bu mo tue. Mlaahi tsuo nɛ o wo mi nɛ kɔɔ mi dlami nyɔngma mi kake ɔ he ɔ, i ye nɔ.

15 Moo je o hi he klɔuklɔu ngɛ hiɔwe ɔ nɛ o hyɛ, nɛ o gbaa o ma Israel. Moo gbaa zugba nɛ hi, nɛ baa ní saminya, nɛ o ngɔ ha wɔ nɛ ɔ nɔ kaa bɔ nɛ o wo wa nɛmɛ ɔmɛ si ɔ.’

Yawɛ nitsɛ e ma

16 “Mwɔnɛ ligbi nɛ ɔ, Yawɛ, o Mawu ɔ ngɛ mo fae ke o ye e mlaa amɛ tsuo a nɔ; lɔ ɔ he ɔ, ye a nɔ pɛpɛɛpɛ kɛ o tsui tsuo.

17 Mwɔnɛ ligbi nɛ ɔ, e je o nya mi nɛ o de ke Yawɛ ji o Mawu. O wo si kaa o maa bu lɛ tue; o wo si kaa o maa ye e mlaa amɛ tsuo a nɔ; nɛ o wo si hu kaa nɔ́ tsuaa nɔ́ nɛ e fa mo ke o pee ɔ, o maa pee.

18 ⓐ Mwɔnɛ ligbi nɛ ɔ, Yawɛ hu he mo atuu kaa lɛ nitsɛ e ma, kaa bɔ nɛ e wo si ɔ. E ngɛ mo fae ke o ye e mlaa amɛ tsuo a nɔ.

19 E ma ha nɛ o pee ma ngua a pe ma amɛ tsuo. O ma je e yi, nɛ o maa wo e hɛ mi nyami. Nɛ o maa pee lɛ Yawɛ, o Mawu klɔuklɔu ɔ nitsɛ, e ma kaa bɔ nɛ e wo si ɔ.”