Mose V, 11

Yawɛ ji ngua

1 “Nyɛɛ suɔ Yawɛ, nyɛ Mawu ɔ, nɛ nyɛɛ ye e mlaa amɛ tsuo a nɔ daa.

2 Nyɛ kai mwɔnɛ ɔ, níhi nɛ nyɛ kase ngɛ Yawɛ he, bɔ nɛ nyɛ nitsɛmɛ nyɛ kpa lɛ si ha. Tsa pi nyɛ bimɛ, se nyɛ nitsɛmɛ nɛ nyɛ kpa ní nɛ ɔmɛ a si ɔ lɛ e ngɛ dee ɔ nɛ. Nyɛ na kaa Yawɛ kle, e kɔni si wa; e nyɛɔ peeɔ nɔ́ tsuaa nɔ́,

3 ⓘ kɛ nyakpɛ níhi hulɔ. Nyɛ na nɔ́ nɛ e pee Egipt matsɛ ɔ, kɛ e zugba a tsuo kulaa a.

4 ⓙ Nyɛ na bɔ nɛ Yawɛ kpata Egipt ta a, kɛ a okpɔngɔ ɔmɛ, kɛ a ta zugba lɛ ɔmɛ a hɛ mi pɛsɛpɛsɛ ɔ. E ha Wo Tsu ɔ mi nyu ɔ mii Egipt ta a tsuo, benɛ a nyɛɛ nyɛ se ɔ.

5 Nyɛ le níhi nɛ e pee ha nyɛ ngɛ nga kplanaa a nɔ kɛ ba su hiɛmɛ nɛ ɔ.

6 ⓚ Nyɛ kai nɔ́ nɛ e pee Ruben wɛtso ɔ mi no Eliab binyumu ɔmɛ nɛ a tsɛɛ mɛ Datan kɛ Abiram ɔ. Nyɛ tsuo pɛpɛɛpɛ nyɛ hɛ mi nɛ zugba a mi gba nɛ e mii mɛ kɛ a weku li, kɛ a lohwehi tsuo.

7 Niinɛ, nyɛ nitsɛmɛ nyɛ na ní nguanguahi tsuo nɛ Yawɛ tsu ɔ kɛ nyɛ hɛngmɛ.

Gbaamihi nɛ ngɛ zugba nɛ a wo he si ɔ nɔ

8 “Nyɛɛ ye mlaa amɛ tsuo nɛ i ngɛ nyɛ woe mwɔnɛ nɛ ɔ a nɔ. Lɔ ɔ loko nyɛ ma nyɛ maa po pa a kɛ ya ngɔ zugba a nɛ nyɛ yaa sɛ mi ɔ.

9 Ke nyɛ pee ja a, nyɛ se maa kɛ ngɛ zugba kpakpa nɛ baa ní saminya nɛ Yawɛ wo si ke e ma ngɔ ha nyɛ nɛmɛ ɔmɛ kɛ a nina a nɔ.

10 Zugba nɛ nyɛ yaa nɛ nyɛ ya ngɔ ɔ be kaa Egipt zugba a, he nɛ nyɛ je ɔ. Lejɛ ɔ, ke o du ní ɔ, ja o gbo dengme kɛ pue ní ɔmɛ a nɔ nyu ngɛ ngmɔ ɔ mi;

11 se zugba nɛ nyɛ yaa ngɔ nɛ ɔ, e ji yo nɔ zugba kɛ e mi kɔ̃hi. Hiɔmi nɛɛ saminya ngɛ lejɛ ɔ.

12 Yawɛ, nyɛ Mawu ɔ baa zugba nɛ ɔ yi, nɛ e buu he jeha a mi tsuo.

13 ⓛ “Lɔ ɔ he ɔ, nyɛɛ ye mlaa amɛ nɛ i ngɛ nyɛ woe mwɔnɛ ɔ a nɔ; nyɛɛ suɔ Yawɛ, nyɛ Mawu ɔ, nɛ nyɛ ja lɛ kɛ nyɛ tsui tsuo.

14 Ke nyɛ pee ja a, e ma ha hiɔmi maa nɛ ngɛ e be mi gbo kɛ gbiɛ tsuo, nɛ nyɛ ma na blɛfo, wai, kɛ nu.

15 Nyɛ ma na nga hu kɛ ha nyɛ na amɛ, nɛ nyɛ maa ye ní nɛ nyɛ maa tɔ.

16 Nyɛɛ hyɛ nɛ hi kɛkɛ, konɛ a ko mlɔɔ nyɛ kɛ je Yawɛ he kɛ ya ja mawu kpahi, nɛ nyɛ sɔmɔ mɛ.

17 Ke nyɛ pee ja a, Yawɛ mi mi ma fu nyɛ. E be hae nɛ hiɔmi maa nɛ hu, nɛ zugba a ma gbli, nɛ e be ní bae hu. Kɛkɛ ɔ, e be kɛe nɛ hwɔ ma kpata nyɛ hɛ mi ngɛ zugba kpakpa nɛ Yawɛ kɛ ngɛ nyɛ hae nɛ ɔ nɔ.

18 “Nyɛ hɛ nɛ hi mlaa nɛ ɔmɛ a nɔ, nɛ nyɛ susu a he saminya. Nyɛɛ fi kɛ wo nyɛ kɔni si, kɛ nyɛ hɛ nya kaa kaimi nɔ́.

19 Nyɛɛ tsɔɔ nyɛ bimɛ. Nyɛɛ sɛɛ he ní be nɛ nyɛ ngɛ we mi, be nɛ nyɛ hia blɔ, be nɛ nyɛ hwɔɔ si, kɛ be nɛ nyɛ te si.

20 ⓜ Nyɛɛ ngma ngɔ wo nyɛ sinya tso ɔmɛ a he, kɛ nyɛ agbo ɔmɛ a nya.

21 Lɔ ɔ loko nyɛɛ kɛ nyɛ bimɛ ɔmɛ nyɛ se maa kɛ ngɛ zugba kpakpa nɛ Yawɛ wo si ke e ma ngɔ ha nyɛ nɛmɛ ɔmɛ ɔ nɔ. Nyɛ maa hi lejɛ ɔ daa kɛ yaa si je mi nyagbe.

22 “Nyɛɛ hyɛ nɛ nyɛɛ ye mlaa amɛ nɛ i ngɛ nyɛ woe nɛ ɔ a nɔ pɛpɛɛpɛ. Nyɛɛ suɔ Yawɛ, nyɛ Mawu ɔ, nɛ nyɛɛ pee nɔ́ tsuaa nɔ́ nɛ i fa nyɛ ke nyɛɛ pee ɔ, nɛ nyɛɛ ye lɛ anɔkuale.

23 Kɛkɛ ɔ, Yawɛ maa fie jamɛ a je ma amɛ tsuo nɛ a he wa pe nyɛ ɔ kɛ je zugba amɛ a nɔ ha nyɛ.

24 ⓝ Zugba a he nɛ nyɛ maa nyɛɛ kɛ gu ɔ tsuo maa pee nyɛ nɔ́. Nyɛ huzu maa je nga kplanaa a nɔ ngɛ leneyi je kɛ yaa su Lebanon yo ɔmɛ a nɔ ngɛ omleyi je; jehanɛ e maa je Yufrate a pa nya ngɛ beleku je kɛ yaa su Mediterenia wo ɔ nya ngɛ bonyoku je.

25 He tsuaa he nɛ nyɛ maa ya ngɛ jamɛ a zugba a nɔ ɔ, Yawɛ ma ha ni ɔmɛ maa ye nyɛ gbeye kaa bɔ nɛ e wo si ɔ, nɛ nɔ ko nɔ ko be nyɛ nyɛe.

26 “Mwɔnɛ ligbi nɛ ɔ, i ngɔ gbaami kɛ gbiɛmi kɛ ngɛ nyɛ hɛ mi fɔe konɛ nyɛɛ hla nɔ́ nɛ nyɛ suɔ.

27 E maa pee gbaami ha nyɛ, ke nyɛ ye Yawɛ, nyɛ Mawu ɔ mlaa amɛ nɛ i ngɛ nyɛ woe mwɔnɛ ɔ a nɔ;

28 se e maa pee gbiɛmi, ke nyɛ yi mlaa nɛ ɔmɛ a nɔ, nɛ nyɛ kpale kɛ ya ja mawu kpahi nɛ nyɛ ja we mɛ hyɛ ɔ.

29 ⓞ Ke Yawɛ, nyɛ Mawu ɔ kɛ nyɛ ya su zugba nɛ nyɛ yaa ngɔ ɔ nɔ ɔ, nyɛ de gbaami munyu ɔmɛ kɛ je Gerizim yo ɔ nɔ, kɛ gbiɛmi munyu ɔmɛ hu kɛ je Ebal yo ɔ nɔ.

30 (Yo enyɔ nɛ ɔmɛ ngɛ Yordan pa a bonyoku je ngɛ Kanaan bi ɔmɛ a zugba a nɔ, ngɛ Yordan kɔ̃ ɔ mi. A ngɛ bonyoku je, nɛ a kɛ tso ngua amɛ nɛ ngɛ More kɛ Gilgal ɔ a he kɛ we kulaa.)

31 E su be nɛ nyɛ maa po Yordan pa a, nɛ nyɛ ma ya ngɔ zugba a nɛ Yawɛ, nyɛ Mawu ɔ kɛ ngɛ nyɛ hae ɔ nɛ nyɛɛ hi nɔ. Ke nyɛ ya ngɔ zugba a, nɛ nyɛ ngɛ nɔ ɔ,

32 nyɛɛ hyɛ saminya konɛ mlaa amɛ nɛ i ngɛ nyɛ woe mwɔnɛ ɔ, nyɛɛ ye mɛ tsuo a nɔ pɛpɛɛpɛ.