Luka 3

Yohane nɔ sɔlelɔ ɔ fiɛ

(<x>470 3:1-12</x>; <x>480 1:1-8</x>; <x>500 1:19-28</x>)

1 Roma matsɛ Tiberio yi nɔ jeha nyɔngma kɛ enuɔne ɔ, Pontio Pilato ngɛ amlaalo yee ngɛ Yudea, nɛ Herode ngɛ amlaalo nɔkɔtɔma yee ngɛ Galilea. Herode nyɛmi Filipo ngɛ amlaalo nɔkɔtɔma yee ngɛ Iturea, kɛ Trakoniti zugba a nɔ, nɛ Lisania ngɛ amlaalo nɔkɔtɔma yee ngɛ Abileene.

2 Ana kɛ Kayafa hu ngɛ osɔfo nikɔtɔma pe kulaa yee. Jamɛ a be ɔ mi ɔ, Mawu kɛ sɛ gbi ha Zakaria bi Yohane ngɛ nga a nɔ.

3 Lɔ ɔ he ɔ, Yohane kpa Yordan kpokpa a nɔ tsuo, nɛ e fiɛ ke, “Nyɛ tsake nyɛ tsui, nɛ a sɔle nyɛ, konɛ Mawu nɛ ngɔ nyɛ he yayami ɔmɛ kɛ pa nyɛ.”

4 ⓦ Bɔ nɛ a ngma ngɛ gbalɔ Yesaya womi ɔ mi ji nɛ ɔ nɛ. “Nɔ ko ngɛ ngmlaa kpae ngɛ nga a nɔ ke, ‘Nyɛ dla blɔ ngɔ to Nyɔmtsɛ ɔ; nyɛɛ je blɔ tlɔmɔɔ ha lɛ, nɛ e nyɛɛ nɔ!

5 Á tsi kɔ̃ tsuaa kɔ̃; á ba kpo tsuaa kpo, kɛ yo tsuaa yo si. Á pee blɔhi nɛ kpɛ̃ ɔ tlɔmɔɔ, nɛ ní nɛmɛ nɛ ngɛ googagooga a, a nɔ nɛ sɔ.

6 Kɛkɛ ɔ, nihi tsuo maa na Mawu yi wami hemi ɔ!’ ”

7 ⓧ Nihi babauu ba Yohane ngɔ, konɛ e sɔle mɛ. Nɛ e de mɛ ke, “Nyɛ sinɔhi a nina, mɛnɔ wo nyɛ ga ke nyɛɛ tu tue gblami nɛ Mawu kɛ ma nyɛ nɔ ɔ nya fo?

8 ⓨ Ke nyɛ tsake nyɛ tsui niinɛ ɔ, lɛɛ nyɛɛ pee níhi nɛ tsɔɔ kaa nyɛ tsake nyɛ tsui. Nyɛ ko susu kaa ke nyɛ de ke nyɛ nɛ̃ ji Abraham ɔ kɛkɛ tue gblami ko be nyɛ nɔ bae. I ngɛ nyɛ dee ke Mawu ma nyɛ ngɔ tɛ nɛ ɔmɛ kɛ pee Abraham nina!

9 ⓩ Amlɔ nɛ ɔ, gbiɛ ɔ fɔɔ si ngɛ tso si poku ɔmɛ a nɔ momo; tso tsuaa tso nɛ wui yiblii kpakpa a, a maa po, nɛ a ma sake ngɔ fɔ la mi.”

10 Ni ɔmɛ bi lɛ ke, “Lɛɛ kɛ wa maa pee kɛɛ?”

11 E he nɔ ke, “Nɔ nɛ ngɛ hiɔwe tade enyɔ ɔ, e ke nɔ nɛ be eko ɔ nɛ dla; nɛ nɔ nɛ ngɛ niye ní ɔ, lɛ hu e kɛ nihi nɛ dla ja nɔuu.”

12 ⓐ Tó tsuli komɛ hu ba nɛ e sɔle mɛ. A bi lɛ ke, “Tsɔɔlɔ, mɛni sa wɔ peemi?”

13 E de mɛ ke, “Nyɛ ko tsu tó nɛ hiɛ pe bɔ nɛ a tsɔɔ nyɛ ɔ.”

14 Ta buli komɛ hu ba bi lɛ ke, “Wɔ hu mɛni sa wɔ peemi?” E de mɛ ke, “Nyɛ ko fia ojo! Nyɛ ko po sane ngɔ fɔ nɔ ko nɔ yaka gu nɛ nyɛ kpɔ sika ngɛ e dɛ! Nyɛ hiɔwo nɛ sa nyɛ hɛ mi!”

15 Jehanɛ ɔ, ni ɔmɛ a nɔ gbagba te, nɛ a bɔni susumi ngɛ Yohane he kaa eko ɔ, lɛ ji Kristo ɔ.

16 Lɔ ɔ he ɔ, Yohane de mɛ ke, “Imi lɛɛ nyu nɛ i kɛ ngɛ nyɛ sɔlee, se nɔ ko ma ngɛ ye se nɛ pe mi, nɛ i sɛ kaa i pɛneɔ e tokota nya kpa po. Lɛɛ Mumi Klɔuklɔu, kɛ la nɛ e kɛ maa sɔle nyɛ.

17 E hɛɛ e ngma mi sami tsimi ngɛ e dɛ, nɛ e kɛ maa sa e ngma a tsuo mi. E ma bua e ngma a nya kɛ wo gba mi, se tsakati ɔ lɛɛ e maa sã ngɛ la nɛ gbo we gblegbleegble.”

18 Yohane gu blɔ slɔɔtohi a nɔ nɛ e kɛ wo ni ɔmɛ he wami benɛ e ngɛ sane kpakpa a fiɛe ɔ.

19 ⓑ Se Yohane kã amlaalo nɔkɔtɔma Herode hɛ mi, ejakaa Herode ya ngɔ lɛ nitsɛ e nyɛmi Filipo e yo Herodia; Herode pee yayami kpahi fuu hu ngɔ piɛ he.

20 Se nɔ́ nɛ pe lɛ tsuo ji kaa e nu Yohane ngɔ wo tsu mi.

A sɔle Yesu

(<x>470 3:13-17</x>; <x>480 1:9-11</x>)

21 Benɛ a sɔle ni ɔmɛ tsuo se ɔ, a sɔle Yesu hulɔ; nɛ benɛ e ngɛ sɔlee ɔ, hiɔwe nya bli,

22 ⓒ nɛ Mumi Klɔuklɔu ɔ kple si kɛ ba e nɔ kɛ su nɛ ngɛ kaa lahuɛ. Nɛ gbi ko je hiɔwe de ke, “Mo ji ye bi nɛ i suɔ; i naa o he bua jɔmi saminya.”

Yesu weku kpa

(<x>470 1:1-17</x>)

23 Benɛ Yesu je e ní tsumi sisi ɔ, e ye maa pee jeha nyingmi etɛ, nɛ bɔ nɛ nihi susuɔ ji e tsɛ ji Yosef, Heli bi ɔ,

24 Matat bi ɔ, Levi bi ɔ, Melki bi ɔ, Yanai bi ɔ, Yosef bi ɔ,

25 Matatia bi ɔ, Amos bi ɔ, Nahum bi ɔ, Esli bi ɔ, Nagai bi ɔ,

26 Maat bi ɔ, Matatia bi ɔ, Semein bi ɔ, Yosek bi ɔ, Yoda bi ɔ.

27 Yoanan bi ɔ, Resa bi ɔ, Zerubabel bi ɔ, Shealtiel bi ɔ, Neri bi ɔ,

28 Melki bi ɔ, Adi bi ɔ, Kosam bi ɔ, Elmadam bi ɔ, Er bi ɔ,

29 Yoshua bi ɔ, Eliezer bi ɔ, Yorim bi ɔ, Matat bi ɔ, Levi bi ɔ,

30 Simeon bi ɔ, Yuda bi ɔ, Yosef bi ɔ, Yonam bi ɔ, Eliakim bi ɔ,

31 Melea bi ɔ, Mena bi ɔ, Matata bi ɔ, Natan bi ɔ, David bi ɔ,

32 Ishai bi ɔ, Obed bi ɔ, Boaz bi ɔ, Salmon bi ɔ, Nashon bi ɔ,

33 Aminadab bi ɔ, Admin bi ɔ, Arni bi ɔ, Hezron bi ɔ, Perez bi ɔ, Yuda bi ɔ,

34 Yakob bi ɔ, Isak bi ɔ, Abraham bi ɔ, Tera bi ɔ, Nahor bi ɔ,

35 Serug bi ɔ, Reu bi ɔ, Peleg bi ɔ, Eber bi ɔ. Shela bi ɔ,

36 Kainan bi ɔ, Arpakshad bi ɔ, Shem bi ɔ, Noa bi ɔ, Lamek bi ɔ,

37 Metusela bi ɔ, Enok bi ɔ, Yared bi ɔ, Mahalalel bi ɔ, Kenan bi ɔ,

38 Enosh bi ɔ, Set bi ɔ, Adam bi ɔ, Mawu bi ɔ.