Luka 21

Yalɔyo ko ya tsu tó

(<x>480 12:41-44</x>)

1 Ligbi ko benɛ Yesu ya sɔlemi we ɔ mi ɔ, e na niatsɛmɛ nɛ ngɔ a nike ní kɛ ngɛ tó tsumi daka a mi woe.

2 E na yalɔyo ohiatsɛ ko hu nɛ kɛ kaplɛ enyɔ ba wo daka a mi.

3 Kɛkɛ nɛ e de ke, “I ngɛ nyɛ dee anɔkuale mi ke, nɔ́ nɛ kikɛmɛ a yalɔyo ohiatsɛ nɛ ɔ kɛ ba wo daka a mi ɔ hiɛ kulaa pe ni ɔmɛ tsuo a nɔ́ ɔ.

4 Niatsɛmɛ ɔmɛ lɛɛ a ní babauu ɔ mi bɔbɔyoo kɛkɛ nɛ a kɛ ba ke Mawu; se yo ohiatsɛ nɛ ɔ lɛɛ bɔɔ nɛ ngɛ e dɛ nɛ e kɛ maa hyɛ e he nɔ ɔ, lɔ ɔ tsuo nɛ e kɛ ba wo daka a mi ɔ nɛ.”

Yesu de ke a ma kpata sɔlemi we ɔ hɛ mi

(<x>470 24:1-2</x>; <x>480 13:1-2</x>)

5 Ni komɛ bɔni ní sɛɛmi ngɛ sɔlemi we ɔ he, bɔ nɛ a dla lɛ saminyayoo kɛ tɛ kpakpa, kɛ nike níhi nɛ a kɛ ba ha Mawu. Kɛkɛ nɛ Yesu de mɛ ke,

6 “Enɛ ɔmɛ tsuo nɛ nyɛ ngɛ hyɛe nɛ ɔ, be ma nɛ a maa tsɛ̃ ngɔ fia si bum! A be tɛ ngmelu kake po sie ngɛ e blɔ he.”

Amanehlu kɛ yi mi wami

(<x>470 24:3-14</x>; <x>480 13:3-13</x>)

7 Ni ɔmɛ bi lɛ ke, “Tsɔɔlɔ, mɛni be nɔ́ nɛ ɔ maa ba mi? Loko nɔ́ nɛ ɔ maa ba mi ɔ, mɛni okadi maa je kpo?”

8 Yesu de mɛ ke, “Nyɛɛ hyɛ saminya nɛ a ko mlɔɔ nyɛ, ejakaa nihi fuu maa ba, nɛ a kɛ ye biɛ maa tu munyu ke, ‘Imi ji Kristo ɔ nɛ!’ A ma de hu ke, ‘Be ɔ su ta!’ Se nyɛ ko ya nyɛɛ a se.

9 Ke nyɛ nu nɛ a ngɛ ta hwue, aloo a tsɔ atuã ngɛ he ko ɔ, nyɛ ko ye gbeye; ja kikɛmɛ a ní nɛ ɔmɛ ba mi lolo. Se kɛ̃ ɔ, nyagbe ɔ sui lolo.”

10 E ya nɔ de ke, “Ma maa te si ngɔ wo ma, nɛ matsɛ yemi maa te si ngɔ wo matsɛ yemi.

11 Zugba ma mimiɛ; hwɔ, kɛ gbenɔ hiɔ maa ba ngɛ he tsuaa he; nɛ gbeye níhi, kɛ nyakpɛ ní nguahi maa ba hiɔwe.

12 Se loko ní nɛ ɔmɛ tsuo maa ba a, a maa nuu nyɛ, nɛ a maa wa nyɛ yi mi. A maa ngɔ nyɛ kɛ ha nɛ a kojo nyɛ ngɛ kpe he ɔmɛ, nɛ a maa wo nyɛ tsu. Ye he ɔ, a maa ngɔ nyɛ kɛ ba matsɛmɛ, kɛ ganɔhi a hɛ mi.

13 Nɛ nɔ́ nɛ ɔ ma ha nyɛ he blɔ nɛ nyɛɛ kɛ maa ye odase.

14 ⓤ Lɔ ɔ he ɔ, nyɛɛ le ngɔ to, konɛ nyɛ ko hao nyɛ he ngɛ nɔ́ nɛ nyɛɛ kɛ ma fa nyɛ he ɔ he.

15 Ejakaa munyu nɛ maa je nyɛ nya, kɛ juɛmi nɛ nyɛɛ kɛ ma fa nyɛ he ɔ, ma ha nyɛ. Nyɛ he nyɛli ɔmɛ a ti nɔ ko nɔ ko be nyɛ nyɛe, loo a maa je nɔ́ nɛ nyɛ ngɛ dee ɔ he nɔ́.

16 Nyɛ fɔli, nyɛ nyɛmimɛ, kɛ nyɛ weku li, nyɛ huɛmɛ tete maa ngɔ nyɛ kɛ ha, nɛ a maa gbe nyɛ ti ni komɛ.

17 Ye he ɔ, nihi tsuo maa nyɛ nyɛ,

18 se nyɛ yi bwɔmi kake ngmelu tete be laae.

19 Nyɛɛ hɛɛ nyɛ hemi kɛ yemi ɔ mi kpɛii, nɛ nyɛ ma na neneene wami.

Yesu de ke a ma kpata Yerusalem hɛ mi

(<x>470 24:15-21</x>; <x>480 13:14-19</x>)

20 “Ke nyɛ na nɛ he nyɛli ba sa Yerusalem ma a yi ɔ, kɛkɛ nyɛ maa le kaa ma a hɛ mi kpatami be ɔ su ta.

21 Jamɛ a be ɔ, nihi nɛ ngɛ Yudea a, a tu fo kɛ ya yo ɔmɛ a nɔ; nihi nɛ ngɛ ma a mi ɔ, a je, nɛ nihi nɛ ngɛ ngmɔ si ɔ, a ko ba ma a mi.

22 ⓥ Ejakaa lue yemi ligbi ɔmɛ ji nɛ ɔmɛ nɛ; konɛ níhi tsuo nɛ ngmami ɔmɛ de ɔ nɛ ba mi.

23 Yihi nɛ maa hɛɛ mi, kɛ ni nɛmɛ nɛ maa hi nyɔ hae jamɛ a be ɔ, kusiɛ ha mɛ! Fimi nɛ nya wa maa ba zugba a nɔ, nɛ Mawu mi mi ma fu kikɛmɛ a ma a.

24 A kɛ klaate maa gbe ni komɛ. A maa nuu ni komɛ hu nyɔguɛ kɛ ya je ma amɛ tsuo a mi, nɛ ma je li ɔmɛ maa ngɔ Yerusalem, nɛ a maa ye ma a nɔ hluu kɛ yaa si mɛ hu a be maa su.

Nɔmlɔ Bi ɔ ma

(<x>470 24:29-31</x>; <x>480 13:24-27</x>)

25 ⓦ “Nyakpɛ níhi maa ba pu, nyɔhiɔ, kɛ dodoehi a hɛ mi. Nihi babauu ngɛ je ɔ mi a kɔni mi ma jɔ̃; ke wo gli nɛ oslɔke pɛ kɛkɛ gbeye nu mɛ.

26 Níhi nɛ ma je ɔ mi ɔ maa wo nihi a he gbeye, nɛ a maa hɛli, ejakaa he wamihi nɛ ngɛ hiɔwe ɔ, a maa fie mɛ kɛ je a blɔ hehi.

27 ⓧ Kɛkɛ ɔ, a maa na Nɔmlɔ Bi ɔ nɛ ma ngɛ bɔku mi, kɛ he wami, kɛ hɛ mi nyami babauu.

28 Lɔ ɔ he ɔ, ke ní nɛ ɔmɛ bɔni mi bami ɔ, nyɛɛ te si, nɛ nyɛ wo nyɛ yi nɔ; ejakaa e be kɛe nɛ Mawu ma he nyɛ yi wami.”

Ngmɔkɔ tso ɔ he ní kasemi

(<x>470 24:32-35</x>; <x>480 13:28-31</x>)

29 Jehanɛ ɔ, Yesu tu mɛ munyu ngɛ abɛ gbi mi. E de mɛ ke, “Nyɛ susu ngmɔkɔ tso, kɛ tso kpahi tsuo a he.

30 Ke a tsɛ̃ ba pɛ kɛkɛ nyɛ nitsɛmɛ nyɛ le kaa latsa be su si ta.

31 Jã kɛ̃, ke nyɛ na kaa ní nɛ ɔmɛ ngɛ mi bae ɔ, nyɛ maa le kaa Mawu matsɛ yemi ɔ su ta.

32 “Niinɛ, i ngɛ nyɛ dee ke, yi nɔ bi nɛ ɔmɛ tsuo be gboe ta nɛ ní nɛ ɔmɛ maa ba mi.

33 Hiɔwe kɛ zugba maa be kɛ ho, se ye munyu ɔmɛ lɛɛ a maa hi si daa.

Nyagbe ɔ maa ba tlukaa

34 “Nyɛɛ hyɛ nɛ hi nɛ nyɛ ko ya di ní yemi, kɛ ní numi, kɛ je nɛ ɔ mi níhi nɛ ngɔɔ nɔ nya a a se tsɔ. Ke pi ja a, jamɛ a ligbi ɔ ma ba ti nyɛ si tlukaa

35 kaa klama; ejakaa e maa ba nihi tsuo a nɔ ngɛ je nɛ ɔ mi he tsuaa he.

36 Nyɛɛ hyɛ nyɛ he nɔ saminya, nɛ nyɛɛ sɔle daa, konɛ Mawu nɛ ha nyɛ he wami nɛ nyɛ kɛ gblee ní nɛ ɔmɛ tsuo nɛ maa ba a a mi slɔkee, nɛ nyɛ nyɛ nɛ nyɛɛ da Nɔmlɔ Bi ɔ hɛ mi.”

37 ⓨ Daa ligbi ɔ, Yesu ya tsɔɔ ní ngɛ sɔlemi we ɔ, nɛ ke je jɔ ɔ, e ya hwɔɔ Oliv yo ɔ nɔ.

38 Mɔtu mla a, ma a tsuo baa e ngɔ ngɛ sɔlemi we ɔ ba buɔ lɛ tue.