Luka 19

Yesu kɛ Zakeo

1 Yesu ya su Yeriko, nɛ e ngɛ mi poe kɛ yaa.

2 Nyumu ko ngɛ ma a mi, nɛ a tsɛɛ lɛ Zakeo. Tó tsulɔ nɔkɔtɔma ji lɛ, nɛ e ngɛ ní.

3 Zakeo bɔ mɔde kaa e maa na Yesu, se e nyɛ we; ejakaa nɔmlɔ kpiti ji lɛ, nɛ nihi nɛ nyɛɛ Yesu se ɔ, a he hiɛ babauu nitsɛ.

4 Lɔ ɔ he ɔ, e sa fo kɛ sɛ hlami, nɛ e ya kuɔ sikamore tso ko konɛ e hyɛ Yesu; ejakaa lejɛ ɔ blɔ nɛ e maa gu.

5 Benɛ Yesu ba su lejɛ ɔ, e wo e yi nɔ nɛ e de Zakeo ke, “Zakeo, o he nɛ sɔ nɛ o kple si, ejakaa o we ɔ mi nɛ ma to mwɔnɛ ɔ.”

6 Zakeo he sɔ kɛ kple si, nɛ e fua Yesu atuu.

7 Nihi tsuo nɛ na nɔ́ nɛ ɔ, tu munyu huitihuiti ke, “Nyumu nɛ ɔ ya to yayami peelɔ we mi.”

8 Zakeo te da si nɛ e de Nyɔmtsɛ ɔ ke, “Nyɔmtsɛ, bu tue! Ma ngɔ ye níhi fa kɛ ha ohiatsɛmɛ. Ke i sisi nɔ ko ɔ, nɔ́ nɛ i kpɔ ngɛ e dɛ yaka a, ma ku ngɔ bɔ he si eywiɛ ha lɛ.”

9 Yesu de lɛ ke, “Yi wami hemi ba we nɛ ɔ mi mwɔnɛ ɔ; ejakaa nyumu nɛ ɔ hu Abraham nina ji lɛ.

10 ⓘ Nɔmlɔ Bi ɔ ba, konɛ e ba hla nihi nɛ laa a, nɛ e he a yi wami.”

Sika tsu kpɔ ɔmɛ a he abɛ

(<x>470 25:14-30</x>)

11 ⓙ Benɛ ni ɔmɛ ngɛ nɔ́ nɛ ɔ tue bue ɔ, Yesu tu mɛ munyu ngɛ abɛ gbi mi, ejakaa e su Yerusalem haa, nɛ ni ɔmɛ susu kaa Mawu matsɛ yemi ɔ maa ba nɔuu.

12 E de mɛ ke, “Be ko ɔ, ablade ko doma kɛ ho lokoo ya, konɛ a ya wo lɛ matsɛ nɛ e kpale kɛ ba.

13 Loko e je ɔ, e tsɛ e tsɔli ɔmɛ a ti ni nyɔngma, nɛ e ha nɔ tsuaa nɔ sika tsu kpɔ kakaaka. E de mɛ ke, ‘Nyɛɛ ngɔ sika nɛ ɔ kɛ tsu ní kɛ yaa su be nɛ ma ba.’

14 Se e ma mi bi ɔmɛ sume lɛ. Lɔ ɔ he ɔ, a tsɔ nihi kɛ fie e se ke a ya de ke, ‘Wa sume nɛ nyumu nɛ ɔ ba ye wa nɔ matsɛ.’

15 “A na ya wo nyumu ɔ matsɛ, nɛ e kpale e se kɛ ba. Amlɔ ɔ nɔuu ɔ, e fa ke a tsɛ e tsɔli ɔmɛ nɛ e ha mɛ sika a kɛ ba, konɛ e hyɛ nɔ́ nɛ a na ngɛ se.

16 Kekle nɔ ɔ ba ba de ke, ‘Sika tsu kpɔ kake ɔ nɛ o ha mi ɔ fɔ sika tsu kpɔ nyɔngma.’

17 E de lɛ ke, Ayekoo! Tsɔlɔ kpakpa ji mo! O ye anɔkuale ngɛ nɔ́ nyafii mi, lɔ ɔ he ɔ, o maa ye ma nyɔngma nɔ́.

18 Nɔ nɛ ji enyɔ ɔ ba ba de lɛ ke, ‘Nyɔmtsɛ, o sika tsu kpɔ kake ɔ fɔ sika tsu kpɔ enuɔ.’

19 Nyɔmtsɛ ɔ de lɛ hu ke, ‘O maa ye ma enuɔ nɔ.’

20 “Tsɔlɔ kpa hu ba ba de ke, ‘Nyɔmtsɛ, o sika tsu ɔ ji nɛ ɔ nɛ i fi ngɔ wo duku mi ngɔ to.

21 I ya ye mo gbeye, ejakaa o yi mi wa. Nɔ́ nɛ pi o nɔ́ kɛkɛ o ngɔ; nɔ́ nɛ o du we kɛkɛ o ya kpa.’

22 Nyɔmtsɛ ɔ de lɛ ke, ‘Tsɔlɔ angmaletsɛ! Mo nitsɛ o nya mi munyu ma kɛ bu mo fɔ! Tse o le kaa ye yi mi wa! Nɔ́ nɛ pi ye nɔ́ kɛkɛ i ya ngɔ; nɔ́ nɛ i du we kɛkɛ i ya kpa.

23 Saminya! Mɛni he je mɔ nɛ o kɛ ye sika a yɛ sika to he, konɛ ke i kpale kɛ ba a, nɛ ma ba he ye ní kɛ hekpa?’

24 “Jehanɛ ɔ, e de nihi nɛ daa si ngɛ e kasa nya a ke, ‘Nyɛ kpɔ sika tsu kpɔ ɔ ngɛ e dɛ nɛ nyɛ ngɔ ha tsɔlɔ ɔ nɛ ngɛ sika tsu nyɔngma a.’

25 Se a de lɛ ke, ‘Nyɔmtsɛ, sika tsu kpɔ nyɔngma ngɛ e dɛ momo!’

26 ⓚ E he nɔ ke, ‘I ngɛ nyɛ dee ke, nɔ tsuaa nɔ nɛ nɔ́ ko ngɛ e dɛ ɔ, Mawu ma ha lɛ fuu kɛ piɛ he. Se nɔ nɛ be nɔ́ ko ɔ, bɔbɔyoo nɛ ngɛ e dɛ ɔ tete po a ma kpɔ ngɛ e dɛ.

27 Se jamɛ a ye he nyɛli ɔmɛ nɛ sume kaa ma ye a nɔ matsɛ ɔ, nyɛɛ ngɔ mɛ kɛ ba hiɛ ɔ nɛ nyɛ ba gbe mɛ ngɛ ye hɛ mi!’ ”

Yesu Yerusalem sɛmi

(<x>470 21:1-11</x>; <x>480 11:1-11</x>; <x>500 12:12-19</x>)

28 Benɛ Yesu de enɛ ɔ, e sɛ ni ɔmɛ a hlami kɛ yaa Yerusalem.

29 Benɛ e miɔ nɛ e maa su Betfage, kɛ Betania, ngɛ Oliv yo ɔ he ɔ, e tsɔ e kaseli ɔmɛ a ti ni enyɔ,

30 nɛ e de mɛ ke, “Nyɛɛ ya kɔpe nɛ ngɛ nyɛ hɛ mi ɔ mi. Ke nyɛ su lejɛ ɔ, nyɛ maa na teji bi nɛ nɔ ko hí e nɔ hyɛ nɛ a muɔ lɛ si. Nyɛɛ pɛne lɛ, nɛ nyɛɛ ngɔ lɛ kɛ ba hiɛ ɔ.

31 Ke nɔ ko bi nyɛ ke mɛni he je nyɛ ngɛ lɛ pɛnee ɔ, nyɛ de lɛ ke e he hia Nyɔmtsɛ ɔ.”

32 Nihi nɛ a tsɔ ɔ pue nɔ kɛ ho, nɛ a ya na nɔ́ tsuaa nɔ́ kaa bɔ nɛ Yesu de mɛ ɔ pɛpɛɛpɛ.

33 Se benɛ a ngɛ teji bi ɔ pɛnee ɔ, nɔtsɛmɛ ɔmɛ bi mɛ ke, “Mɛni he je nyɛ ngɛ teji bi ɔ pɛnee ɔ?”

34 A he nɔ ke, “E he hia Nyɔmtsɛ ɔ.”

35 Nɛ a kɛ teji bi ɔ ba ha Yesu. Jehanɛ ɔ, a kɛ a tadehi pue lohwe ɔ nɔ, nɛ a wo Yesu ngɔ hi nɔ.

36 Benɛ e hi teji ɔ nɔ kɛ yaa a, nihi ngɔ a tadehi kɛ ha blɔ ɔ nɔ.

37 Benɛ e su Yerusalem ta, ngɛ he nɛ a kpleɔ Oliv yo ɔ ngɛ ɔ, nimli kpekpemi ɔ tsuo nɛ nyɛɛ e se ɔ bɔni nyami kɛ ngmlaa boboobo. A na Mawu si, nɛ a je e yi ngɛ nyakpɛ níhi nɛ a na a he.

38 ⓛ A de ke, “Mawu nɛ gbaa matsɛ ɔ nɛ ma ngɛ Nyɔmtsɛ ɔ biɛ mi ɔ! He jɔmi ngɛ hiɔwe, kɛ hɛ mi nyami ha Mawu!”

39 Kɛkɛ nɛ Farisi bi komɛ nɛ ngɛ ni ɔmɛ a kpɛti ɔ de Yesu ke, “Tsɔɔlɔ, ha nɛ o se nyɛɛli ɔmɛ nɛ a pee dii!”

40 Yesu he nɔ ke, “I ngɛ nyɛ dee ke, ke ni nɛ ɔmɛ ma a nya a, tɛhi tete ma hwɔ lele.”

Yesu fo ya pue Yerusalem nɔ

41 Jehanɛ ɔ, Yesu su ma a he haa, nɛ benɛ e na ma a, e fo ya pue e nɔ,

42 nɛ e de ke, “I na nɛ mwɔnɛ ligbi nɛ ɔ, o le níhi nɛ hia mo loko o ma na tue mi jɔmi! Se a ngɔ laa mo!

43 Be ma nɛ o he nyɛli ɔmɛ ma sa o yi kɛ kpe; a maa tsi blɔhi tsuo ngɛ ma a mi, nɛ a ma tua mo kɛ je he slɔɔtohi.

44 A ma kpata o hɛ mi pɛsɛpɛsɛ, nɛ nihi nɛ ngɛ ma a mi hu a maa gbe mɛ tsuo; a be tɛ kake po sie ngɛ e blɔ he. Ní nɛ ɔmɛ tsuo maa ba o nɔ, ejakaa be ɔ nɛ Mawu ba nɛ e ba kpɔ mo ɔ, o kplɛɛ we.”

Yesu ya sɔlemi we ɔ

(<x>470 21:12-17</x>; <x>480 11:15-19</x>; <x>500 2:13-22</x>)

45 Enɛ ɔ se ɔ, Yesu ya sɔlemi we ɔ, nɛ e ya bɔni nihi nɛ ngɛ ní juae ngɛ lejɛ ɔ fiemi.

46 ⓜ E de mɛ ke, “A ngma ke, Mawu ke, ‘A ma tsɛ ye we ɔ ke he nɛ a faa kue ha mi ngɛ!’ Se nyɛɛ lɛɛ nyɛ ngɔ kɛ pee ojo fiali a laami he!”

47 ⓝ Daa ligbi ɔ, Yesu ya tsɔɔ ní ngɛ sɔlemi we ɔ. Osɔfo nikɔtɔma amɛ, kɛ mlaa tsɔɔli ɔmɛ, kɛ ma nimeli ɔmɛ hlaa kaa a maa gbe lɛ.

48 Se a li blɔ nɔ nɛ a maa gu kɛ pee ja; ejakaa ma a tsuo ngɛ e munyu ɔ tue bue kɛ mwɔɔ, nɛ a sume kaa a ma si lɛ.