Luka 1

1 Ye suɔlɔ Teofilo: Nihi babauu bɔ mɔde kaa a maa ngma níhi nɛ ba mi ngɛ wa kpɛti ɔ he sane

2 pɛpɛɛpɛ kaa bɔ nɛ nihi nɛ na ní nɛ ɔmɛ kɛ je sisije ɔ de wɔ, nɛ a fiɛ ngɔ tsɔɔ ɔ.

3 Lɔ ɔ he ɔ, ye nɔkɔtɔma, akɛnɛ imi hu i hla ní nɛ ɔmɛ a mi fitsofitso kɛ je sisije ɔ, i susu kaa e hi kaa ma ngma sisiisi ha mo.

4 I pee enɛ ɔ, konɛ níhi nɛ a de mo ɔ, o na anɔkuale ɔ paa.

A wo si kaa a ma fɔ Yohane nɔ sɔlelɔ ɔ

5 ⓐ Benɛ Herode ngɛ matsɛ yee ngɛ Yudea a, osɔfo ko hi si nɛ e biɛ ji Zakaria. Osɔfohi a kuu nɛ a tsɛɛ Abiya a mi no ji lɛ. E yo biɛ ji Elizabet, nɛ lɛ hu Aaron nina ji lɛ.

6 Mɛ ni enyɔ ɔmɛ tsuo a peeɔ nɔ́ nɛ da ngɛ Mawu hɛ mi, nɛ a yeɔ e mlaa amɛ, kɛ e fami ɔmɛ a nɔ́ sisiisi.

7 Se a be bi; ejakaa Elizabet ɔ yosa ji lɛ, nɛ mɛ ni enyɔ ɔmɛ tsuo a bwɔ.

8 Ligbi ko ɔ, Zakaria ya ngɛ osɔfo ní tsumi tsue ngɛ sɔlemi we ɔ. Jamɛ a be ɔ, e su a we osɔfo kuu ɔ nɔ kaa mɛ lɛ a ma sɔmɔ.

9 Osɔfo ɔmɛ peeɔ kusumi kɛ fɔɔ sɔ, nɛ a kɛ hlaa a ti nɔ nɛ maa sã tsopa kɛ e he via ngɛ bɔ sami la tɛ ɔ nɔ. Sɔ ɔ ya nɔ Zakaria nɔ, nɛ lɔ ɔ he e ho Nyɔmtsɛ ɔ sɔlemi we ɔ ya a nɛ.

10 Be mi nɛ a ngɛ tsopa kɛ e he via a sãe ɔ, ma kpekpemi ɔ ngɛ sɔlee ngɛ ablanaa a mi.

11 Tlukaa a, Nyɔmtsɛ ɔ bɔfo ko ba da si ngɛ tsopa kɛ e he via bɔ sami la tɛ ɔ hiɔ nɔ, nɛ e je e he kpo ngɔ tsɔɔ Zakaria.

12 Benɛ Zakaria na bɔfo ɔ, e tsui po, nɛ e ye gbeye.

13 Se bɔfo ɔ de lɛ ke, “Zakaria, koo ye gbeye! Mawu nu o kue fami ɔ. O yo Elizabet ma fɔ binyumu ha mo, nɛ o maa wo lɛ biɛ ke Yohane.

14 Ke a fɔ lɛ ɔ, o ma nya, nɛ o ma na bua jɔmi, nɛ nihi babauu ma nya ja nɔuu.

15 ⓑ E ma ba pee nɔmlɔ nguaa ngɛ Nyɔmtsɛ ɔ hɛ mi. E be wai, loo dã nɛ nya wa nue. Ke a fɔ lɛ pɛ Mumi Klɔuklɔu ɔ maa ba e nɔ,

16 nɛ e ma ha nɛ Israel bi babauu maa kpale kɛ ba Nyɔmtsɛ, a Mawu ɔ ngɔ.

17 ⓒ E maa sɛ Nyɔmtsɛ ɔ hlami kɛ he wami, kɛ kã kaa gbalɔ Eliya. E maa pee tsɛmɛ kɛ a bimɛ kake ekohu. E ma ha nihi nɛ bui Mawu tue ɔ maa kpale ba nyɛɛ ni nɛmɛ nɛ buɔ lɛ tue ɔ a blɔ ɔmɛ a nɔ. Nɛ nihi nɛ Mawu nitsɛ hla a, e ma dla mɛ ngɔ to lɛ.”

18 Zakaria bi bɔfo ɔ ke, “Kɛ ma pee kɛ le enɛ ɔ kɛɛ? Hyɛ, nɔmoyo ji mi, nɛ ye yo hu bwɔ!”

19 ⓓ Bɔfo ɔ he nɔ ke, “Imi ji Gabriel, nɛ i daa si ngɛ Mawu hɛ mi. A tsɔ mi ke i kɛ mo ba sɛɛ ní, nɛ́ ma ngɔ manye munyu nɛ ɔ ba ha mo.

20 O he we ye sɛ gbi ɔ yi; se kɛ̃ e maa ba mi ngɛ be nɛ sa mi. Akɛnɛ o he we yi he je ɔ, o nya ma ma, nɛ o be nyɛe maa tu munyu hu kɛ yaa su ligbi ɔ nɛ si nɛ i wo mo ɔ maa ba mi.”

21 Be nɛ ɔ mi tsuo ɔ, ma a ngɛ Zakaria blɔe, nɛ a hɛ mi pee mɛ yaa kaa e ya kɛ ngɛ sɔlemi we ɔ.

22 Benɛ e je kpo ɔ, e nyɛ we nɛ e kɛ mɛ nɛ tu munyu; lɔ ɔ he ɔ, a kɔ se kaa Mawu ya je e he kpo ngɔ tsɔɔ lɛ ngɛ sɔlemi we ɔ. Akɛnɛ e nyɛ we nɛ e tu munyu he je ɔ, e kɛ e nine pee okadi kɛ tsɔɔ mɛ.

23 Be nɛ Zakaria sɔmɔmi be ngɛ sɔlemi we ɔ nya ta a, e kpale kɛ ho we mi ya.

24 Be bɔɔ se ɔ, e yo Elizabet ba ngɔ hɔ, nɛ e laa e he nyɔhiɔ enuɔ.

25 E de ke, “Jehanɛ ɔ lɛɛ Nyɔmtsɛ ɔ piɛ ye he! Ye hɛ mi nɛ pue si ngɛ ma hɛ mi ɔ, e ha nɛ e se po.”

A gba kaa a ma fɔ Yesu

26 Benɛ Elizabet hɔ ɔ ye nyɔhiɔ ekpa a, Mawu tsɔ bɔfo Gabriel ɔ kɛ ya Galilea ma ko nɛ a tsɛɛ Nazaret ɔ.

27 ⓔ Gabriel hɛɛ sɛ gbi kɛ ha yiheyo ko nɛ a bi e si ha Yosef, Matsɛ David nina a kake. Yiheyo ɔ biɛ ji Maria.

28 Bɔfo ɔ ba e ngɔ, nɛ e ba de lɛ ke, “Mo he manye! Nyɔmtsɛ ɔ kɛ mo ngɛ, nɛ e gbaa mo babauu!”

29 Maria hao ngɛ ngami nɛ bɔfo ɔ nga lɛ ɔ he, nɛ e ná nɛ e nu sisi.

30 Se bɔfo ɔ de lɛ ke, “Maria, koo ye gbeye; Mawu na o he bua jɔmi.

31 ⓕ Hyɛ, o ma na mi, nɛ o ma fɔ binyumu, nɛ o maa wo lɛ biɛ ke Yesu.

32 ⓖ E ma ba pee nɔmlɔ nguaa, nɛ a ma tsɛ lɛ ke Hiɔwe No ɔ Bi. Nyɔmtsɛ Mawu maa pee lɛ matsɛ kaa bɔ nɛ e pee e nɛ̃ David ɔ.

33 E maa ye matsɛ ngɛ Israel ma a nɔ kɛ maa ya neneene; e matsɛ yemi ɔ se be poe gblegbleegble!”

34 Maria de bɔfo ɔ ke, “I li nyumu. Lɛ kɛ maa pee kɛɛ nɛ enɛ ɔ maa ba mi?”

35 Bɔfo ɔ de lɛ ke, “Mumi Klɔuklɔu ɔ maa ba o nɔ; Hiɔwe No ɔ he wami ɔ maa ba o nɔ. Enɛ ɔ he je ɔ, bi klɔuklɔu ɔ nɛ o ma fɔ ɔ, a ma tsɛ lɛ Mawu Bi.

36 Na nɛ o le kaa o weku no Elizabet, nɛ bwɔ ɔ hu hɛɛ hɔ. Sa a, a le lɛ kaa yosa; se amlɔ nɛ ɔ, e hɛɛ mi nyɔhiɔ ekpa.

37 ⓗ Ejakaa Mawu lɛɛ nɔ́ ko nɔ́ ko be nɛ e be nyɛe maa pee.”

38 Maria de ke, “Nyɔmtsɛ ɔ mawayo ji mi; bɔ nɛ o de ɔ, e ba mi ja.” Kɛkɛ nɛ bɔfo ɔ si lɛ.

Maria ya slaa Elizabet

39 E kɛ we nɛ Maria dla e he, nɛ e pue nɔ esɔ kɛ ho ma ko mi ya ngɛ Yudea yo nɔ zugba a mi.

40 E ya sɛ Zakaria we ɔ mi, nɛ e nga Elizabet.

41 Benɛ Elizabet nu nɛ Maria nga lɛ ɔ, bimwɔyo ɔ hua ngɛ e mi mi. Mumi Klɔuklɔu ɔ ba Elizabet nɔ,

42 nɛ e de kɛ ngmlaa ke, “Mawu gbaa mo kulaa pe bɔ nɛ e gbaa yihi tsuo! Bi nɛ ngɛ o mi mi ɔ hu e gbaa lɛ!

43 Kɛ ba lɛ kɛɛ nɛ a ha mi he blɔ nguaa nɛ ɔ, kaa ye Nyɔmtsɛ ɔ nyɛ ma ba slaa mi?

44 Benɛ i nu o ngami ɔ pɛ bimwɔyo ɔ hua ngɛ ye mi mi kɛ bua jɔmi.

45 A gbaa mo kaa o he ye kaa Nyɔmtsɛ ɔ sɛ gbi nɛ a de mo ɔ maa ba mi!”

Maria la kɛ je Mawu yi

46 ⓘ Maria ke, “I ngɔ ye tsui tsuo kɛ ngɛ Nyɔmtsɛ ɔ yi jee.

47 Ye bua jɔ, kaa Mawu ji ye yi wami helɔ,

48 ⓙ ejakaa e kai imi, e mawayo humi ɔ! Kɛ je mwɔnɛ ɔ kɛ yaa a, nihi tsuo ma tsɛ mi yo nɛ a gbaa lɛ,

49 ejakaa Mawu Ope ɔ pee ní nguanguahi ha mi. E biɛ ngɛ klɔuklɔu.

50 E naa nihi nɛ buɔ lɛ ɔ mɔbɔ yi nɔhi tsuo.

51 E kɛ e he wami kpetekpleenyɛ ɔ gbɛ he nɔ woli, kɛ a juɛmi yaya a tsuo ngɔ fĩa.

52 ⓚ E kpa matsɛmɛ nguanguahi kɛ je a sɛhi a nɔ, nɛ e wó humihi a nɔ.

53 E ha hwɔ hwɔli ní kpakpahi nɛ a ye, nɛ a tɔ; se niatsɛmɛ lɛɛ e fie mɛ kɛ ho kɛ a dɛ gu.

54 Si nɛ e wo wa nɛmɛ ɔmɛ ɔ, e ye nɔ; nɛ e ba piɛ e tsɔlɔ Israel he.

55 ⓛ E kai Abraham, nɛ e na lɛ, kɛ e nina tsuo mɔbɔ kɛ yaa neneene!”

56 Maria hi Elizabet ngɔ maa pee nyɔhiɔ etɛ loko e kpale kɛ ho e ma mi ya.

A fɔ Yohane nɔ sɔlelɔ ɔ

57 Jehanɛ ɔ, Elizabet fɔmi be su, nɛ e fɔ binyumu.

58 E paka bi, kɛ e weku li nu kaa Nyɔmtsɛ ɔ gbaa lɛ babauu, nɛ a ba nɛ a kɛ lɛ ba nya.

59 ⓜ Benɛ bimwɔyo ɔ na otsi ɔ, a ba, konɛ a ba po lɛ, nɛ jinɛ a hla kaa a kɛ e tsɛ Zakaria biɛ maa wo lɛ.

60 Se e nyɛ de ke, “Dɛbi! A ma tsɛ lɛ Yohane.”

61 A de lɛ ke, “Nɔ ko tsa be o weku ɔ mi nɛ a tsɛɛ lɛ ja!”

62 Lɔ ɔ he ɔ, a pee okadi kɛ bi bimwɔyo ɔ tsɛ ɔ biɛ nɛ e suɔ nɛ a tsɛ lɛ.

63 Zakaria bi ke a ha lɛ tso sleeti, nɛ e ngma ngɛ nɔ ke, “E biɛ ji Yohane.” Enɛ ɔ pee ni ɔmɛ tsuo nyakpɛ.

64 Amlɔ nɔuu ɔ, Mawu ha nɛ Zakaria nya bli, nɛ e tu munyu ekohu, nɛ e je Mawu yi.

65 Gbeye nu e paka bi ɔmɛ tsuo, nɛ sane nɛ ba nɛ ɔ gbɛ fĩa Yudea yoku zugba a tsuo.

66 Nihi tsuo nɛ nu ɔ susu he saminya, nɛ a bi ke, “Mɛni nɔmlɔ po jokuɛ nɛ ɔ ma ba pee?” Ejakaa e fɔɔ si paa kaa Nyɔmtsɛ ɔ he wami ɔ ngɛ e nɔ.

Zakaria gbami

67 Mumi Klɔuklɔu ɔ ba Yohane tsɛ Zakaria nɔ, nɛ e gba ke,

68 “Nyɛ ha wa je Nyɔmtsɛ, Israel Mawu ɔ yi. Ejakaa e ba piɛ e ma a he, nɛ e ha nɛ a ye a he.

69 E je kpɔlɔ kpanaa nɛ ji e tsɔlɔ David nina ha wɔ.

70 E wo si blema lokoo kɛ gu e gbali klɔuklɔu ɔmɛ a nɔ

71 ke e ma kpɔ wɔ kɛ je wa he nyɛli, kɛ nihi nɛ nyɛɛ wɔ ɔ a dɛ mi.

72 E de ke e maa na wa nɛmɛ ɔmɛ mɔbɔ, nɛ e maa ye e somi klɔuklɔu ɔ nɔ.

73 E ka wa nɛ̃ Abraham kita, nɛ e wo si ke e ma kpɔ wɔ kɛ je wa he nyɛli ɔmɛ a dɛ mi, konɛ wa sɔmɔ lɛ ngɛ he jɔmi mi,

74

75 nɛ waa hi klɔuklɔu, nɛ waa pee nɔ́ nɛ da ngɛ e hɛ mi wa wami be ɔ tsuo.

76 ⓝ “Nɛ mo, ye bi, a ma tsɛ mo Hiɔwe No ɔ gbalɔ. O maa sɛ Nyɔmtsɛ ɔ hlami, nɛ o ma dla e blɔ ɔ kɛ to lɛ.

77 O ma de e ma a ke Mawu maa ngɔ a he yayami kɛ pa mɛ, nɛ e ma he a yi wami.

78 Wa Mawu ɔ mi mi jɔ, nɛ e naa mɔbɔ. E ma kpɔ wɔ kaa bɔ nɛ mɔtu pu la fieɔ diblii kɛ yaa se ɔ.

79 ⓞ E ma kpɛ kɛ je hiɔwe ha nihi tsuo nɛ hii si ngɛ gbenɔ hɔ̃ diblii mi, nɛ e maa tsɔɔ wɔ blɔ kɛ ba he jɔmi blɔ ɔ nɔ.”

80 Jokuɛ ɔ ba wa ngɛ nɔmlɔ tso, kɛ mumi mi tsuo, nɛ e hi nga a nɔ kɛ ya su ligbi nɛ e je e he kpo ngɔ tsɔɔ Israel.