Mateo 6

Nike ní hami

1 ⓧ “Ní tsumi kpakpa nɛ sa tsumi ngɛ nyɛ Mawu jami mi ɔ, nyɛɛ hyɛ saminya nɛ nyɛ kó tsu ngɛ ma hɛ mi nɛ nihi ba na nyɛ. Ke nyɛ pee ɔ, lɔ ɔ lɛɛ nyɛ be hiɔwo ko ngɛ nyɛ Tsɛ nɛ ngɛ hiɔwe ɔ ngɔ hu.

2 “Lɔ ɔ he ɔ, ke o maa ke nɔ́ ɔ, koo pee lɛ hoo kaa bɔ nɛ osatotsɛmɛ ɔmɛ peeɔ ngɛ kpe hehi, kɛ gbɛjegbɛ ɔmɛ a nɔ ɔ. A peeɔ jã, konɛ nihi nɛ je a yi. I ngɛ nyɛ dee anɔkuale mi ke a nine su a hiɔwo nɔ momo.

3 Se moo lɛɛ ke o maa ke nɔ́ ɔ, ko ha nɛ o huɛ nitsɛnitsɛ tete po nɛ le;

4 moo ke nɔ́ ngɛ laami mi. Kɛkɛ ɔ, o Tsɛ ɔ nɛ lɛɛ e naa níhi nɛ a peeɔ ngɛ laami mi ɔ maa wo mo hiɔ.

Ní tsɔɔmi nɛ kɔɔ sɔlemi he

(<x>490 11:2-4</x>)

5 ⓨ “Ke nyɛ ngɛ sɔlee ɔ, nyɛ ko pee nyɛ ní kaa osatotsɛmɛ ɔmɛ! A suɔ kaa a da kpe he ɔmɛ, kɛ gbɛjegbɛ ɔmɛ a kɔ nya kɛ sɔle, konɛ nihi nɛ na mɛ. Niinɛ, i ngɛ nyɛ dee ke a nine su a hiɔwo nɔ momo.

6 Se moo lɛɛ ke o maa sɔle ɔ, yaa sɛ o tsu mi, nɛ o nga sinya a, nɛ o sɔle ngɔ ha o Tsɛ nɛ a nɛ lɛ ɔ. Nɛ o Tsɛ nɛ naa níhi nɛ a peeɔ ngɛ laami mi ɔ maa wo mo hiɔ.

7 “Ke nyɛ ngɛ sɔlee ɔ, nyɛ ko tu munyu putɛputɛɛ kaa bɔ nɛ wɔ jali peeɔ ɔ. Mɛɛ lɛɛ a susuu kaa ke a tu munyu fuu loko Mawu maa bu mɛ tue.

8 Dɛbi, nyɛ ko pee nyɛ ní kaa mɛ! Loko nyɛ ma de ke nyɛ ngɛ nyɛ Tsɛ ɔ nɔ́ ko bie ɔ, lɛɛ e le níhi nɛ hia nyɛ ɔ momo.

9 Lɔ ɔ he ɔ, nyɛɛ sɔle kaa kikɛ nɛ ɔ: ‘Wa Tsɛ nɛ ngɛ hiɔwe; O biɛ ɔ he nɛ tsɔ.

10 O Matsɛ yemi ɔ nɛ ba; a pee nɔ́ nɛ o suɔ ngɛ zugba a nɔ kaa bɔ nɛ a peeɔ ngɛ hiɔwe ɔ.

11 Ha wɔ mwɔnɛ ɔ wa daa nya ngma;

12 Ngɔɔ wa tɔmi ɔmɛ kɛ pa wɔ kaa bɔ nɛ wɔ hu waa kɛ paa nihi nɛ tɔɔ wa nɔ ɔ.

13 Nɛ o kɛ wɔ ko ya ka mi; se mohu, je wɔ kɛ je nɔ yayami ɔ dɛ mi.’

14 ⓩ “Ke nyɛɛ kɛ nihi a tɔmihi pa mɛ ɔ, nyɛ Tsɛ nɛ ngɛ hiɔwe ɔ kɛ nyɛ hu nyɛ tɔmihi maa pa nyɛ.

15 Se ke nyɛɛ kɛ nihi a tɔmihi pɛ mɛ ɔ, nyɛ Tsɛ ɔ hu kɛ nyɛ tɔmihi be nyɛ pae.

Ní tsɔɔmi nɛ kɔɔ hwɔ hami he

16 “Jehanɛ ɔ, ke nyɛ ngɛ hwɔ hae ɔ, nyɛ ko pee nyɛ hɛ mi mɔbɔmɔbɔ kaa bɔ nɛ osatotsɛmɛ ɔmɛ peeɔ ɔ. A peeɔ a hɛ mi nyanyaanya, konɛ nihi nɛ a na kaa a ngɛ hwɔ hae. Niinɛ, i ngɛ nyɛ dee ke a nine su a hiɔwo nɔ momo.

17 Se nyɛɛ lɛɛ ke nyɛ ngɛ hwɔ hae ɔ, nyɛ dla nyɛ yi bwɔmi, nɛ nyɛ fɔ nyɛ hɛ mi.

18 Ni kpahi nɛ a ko na kaa nyɛ ngɛ hwɔ hae, ja nyɛ Tsɛ nɛ a nɛ lɛ ɔ pɛ. Kɛkɛ ɔ, nyɛ Tsɛ ɔ nɛ naa nɔ́ nɛ a peeɔ ngɛ laami mi ɔ ma ha nyɛ nɔ́ nɛ ngɛ nyɛ hiae ɔ.

Hiɔwe juetli

(<x>490 12:33-34</x>)

19 ⓐ “Nyɛ ko to juetli ha nyɛ he ngɛ je ɔ mi he nɛ wɔyewɔye, kɛ kana puɛɔ ní, nɛ juli juɔ ngɛ ɔ.

20 Se mohu nyɛɛ to juetli ha nyɛ he ngɛ hiɔwe, he nɛ wɔyewɔye, kɛ kana puɛ we ní ngɛ, nɛ juli hu ju we ɔ.

21 Ejakaa he nɛ o juetli ngɛ ɔ, lejɛ ɔ o tsui hu maa hi.

Nɔmlɔ tso ɔ la

(<x>490 11:34-36</x>)

22 “Hɛngmɛ ji nɔmlɔ tso ɔ kane. Ke o hɛngmɛ nɔ tsɔ ɔ, o nɔmlɔ tso ɔ tsuo ma hyi kɛ la.

23 Se ke o hɛngmɛ nɔ tsɔ we ɔ, lɛɛ o nɔmlɔ tso ɔ tsuo maa wo diblii. Lɔ ɔ he ɔ, ke la nɛ ngɛ o mi ji diblii ɔ, lɛɛ jamɛ a diblii ɔ mi ma ti wawɛɛ nitsɛ.

Mawu kɛ je nɛ ɔ mi ní

(<x>490 16:13</x>; <x>490 12:22-31</x>)

24 “Nɔ ko be nyɛe ma sɔmɔ nyɔmtsɛmɛ enyɔ; eko ɔ, e maa nyɛ nɔ kake, nɛ e maa suɔ nɔ kake; aloo e maa pee nɔ kake suɔmi nya ní, nɛ nɔ kake ɔ lɛɛ e be lɛ bue fɛɛ. O be nyɛe ma sɔmɔ Mawu kɛ sika tsuo.

25 “Lɔ ɔ he ɔ, i ngɛ nyɛ dee ke nyɛ ko hao ngɛ nyɛ wami he, nɔ́ nɛ nyɛ maa ye, kɛ nɔ́ nɛ nyɛ maa nu, aloo nɔmlɔ tso ɔ he, bo nɛ nyɛ ma bu, loo tade nɛ nyɛ maa wo. Anɛ wami pã we ngma lo? Anɛ nɔmlɔ tso ɔ pã we heha nɔ́ lo?

26 Nyɛɛ hyɛ lohwe pɛlitsɛmɛ ha; a du we ní, nɛ a kpa we ní; jehanɛ hu, a bua we ní nya kɛ wui ngma gba mi. Se nyɛ Tsɛ nɛ ngɛ hiɔwe ɔ lɛɔ mɛ. Anɛ nyɛ he jua wɛ hluu pi mɛ lo?

27 Nyɛ ti mɛnɔ kɛ yeyeeye peemi ma nyɛ tsɔ e kami nya nine kpɔ mi kami kake?

28 “Lɛɛ mɛni he je nyɛ peeɔ yeyeeye ngɛ heha nɔ́ he? Nyɛɛ hyɛ mɔmɔhi nɛ ngɛ puɛe ngɛ nga nɔ; a tsu we ní, nɛ a tsɛ̃ we kpa.

29 ⓑ Se i ngɛ nyɛ dee ke, Matsɛ Salomo kɛ e hɛ mi nyami ɔ tsuo tete sui enɛ ɔmɛ a kpɛti kake he fɛu.

30 Nga, nɛ mwɔnɛ ɔ e bɔ, nɛ hwɔɔ kɛkɛ a sake kɛ fɔ la mi ɔ, hyɛ bɔ nɛ Mawu mia lɛ saminyayoo ha! Anɛ Mawu be nyɛe nɛ e pee enɛ ɔ kɛ be nɔ ha nyɛ lo! Oo, nyɛ hemi kɛ yemi pi saasaa!

31 “Lɔ ɔ he ɔ, nyɛ ko hao nyɛ he nɛ nyɛ bi ke, ‘Mɛni wa maa ye? Aloo mɛni wa maa nu? Aloo mɛni wa maa ngɔ kɛ ha wa he?’

32 Níhi nɛ ma je li dii se ji enɛ ɔmɛ nɛ. Nyɛ Tsɛ nɛ ngɛ hiɔwe ɔ le kaa ní nɛ ɔmɛ tsuo a he hia nyɛ.

33 Se nyɛ hla Mawu matsɛ yemi ɔ, kɛ níhi nɛ da ngɛ e hɛ mi ɔ kekle, nɛ a kɛ ní nɛ ɔmɛ tsuo maa piɛ he ngɔ ha nyɛ.

34 Lɔ ɔ he ɔ, nyɛ ko hao nyɛ he ha hwɔɔ; ejakaa hwɔɔ hu ma kɛ lɛ nitsɛ e haomihi babauu. Haomihi nɛ baa daa ligbi ɔ, e hia we kaa waa ngɔ ekpa ko kɛ ba piɛ ligbi ko nɔ́ he hu.