Mateo 14

Yohane nɔ sɔlelɔ ɔ gbenɔ

(<x>480 6:14-29</x>; <x>490 9:7-9</x>)

1 Jamɛ a be ɔ mi ɔ, amlaalo ɔ nɛ ngɛ Galilea nɛ a tsɛɛ lɛ Herode ɔ nu Yesu he,

2 nɛ e de e tsɔli ɔmɛ ke, “Yohane nɔ sɔlelɔ ɔ ji nɛ ɔ nɛ. A tle lɛ si kɛ je gbeje; lɔ ɔ he nɛ e ngɛ he wami nɛ e kɛ ngɛ nyakpɛ ní tsue ɔ nɛ.”

3 ⓞ Herode ha a nu Yohane, nɛ a fi lɛ, nɛ a wo lɛ tsu ngɛ e nyɛminyumu Filipo yo Herodia he.

4 ⓟ Be ko ɔ, Yohane de Herode ke, “E dɛ kaa o ngɔɔ Herodia!”

5 Jinɛ Herode hla kaa e gbe Yohane, se e ya ye Yuda bi ɔmɛ gbeye; ejakaa a buɔ Yohane gbalɔ.

6 Se benɛ Herode ngɛ e fɔmi ligbi yee ɔ, Herodia biyo ɔ ba do ngɛ ni ɔmɛ a hɛ mi. Nɔ́ nɛ ɔ pee Herode fɛu,

7 nɛ e ka kita kɛ wo lɛ si ke, “Bi mi nɔ́ tsuaa nɔ́ nɛ o suɔ, nɛ ma ha mo!”

8 Akɛnɛ e nyɛ tsɔɔ lɛ nɔ́ nɛ e bi he je ɔ, yiheyo ɔ de ke, “Ngɔɔ Yohane nɔ sɔlelɔ ɔ yi ngɔ fɔ sowe nɔ ba ha mi ngɛ hiɛmɛ nɛ ɔ!”

9 Nɔ́ nɛ ɔ wa ha matsɛ ɔ, se kitahi nɛ e ka, kɛ nibwɔhi nɛ pueɔ si ngɛ e hɛ mi ɔ a he je ɔ, e fa ke a pee jokuɛ yo ɔ suɔmi nya ní ɔ ha lɛ.

10 E tsɔ nɛ a ya po Yohane yi ngɛ tsu ɔ mi.

11 A ngɔ yi ɔ ngɔ fɔ sowe nɔ kɛ ba ha yiheyo ɔ, nɛ lɛ hu e kɛ ya ha e nyɛ.

12 Yohane kaseli ɔmɛ ba, nɛ a ba ngɔ gbogboe ɔ ya pu. Nɛ a ho nɛ a ya de Yesu.

Yesu ha nyumuhi akpe enuɔ niye ní

(<x>480 6:30-44</x>; <x>490 9:10-17</x>; <x>500 6:1-14</x>)

13 Benɛ Yesu nu kaa a gbe Yohane ɔ, e ya sɛ lɛ mi, nɛ e je lejɛ ɔ kɛ ho he ko banee ya. Nihi babauu nu he, nɛ a je a ma amɛ a mi, nɛ a gu zugba blɔ kɛ nyɛɛ e se.

14 Yesu je kpo ngɛ lɛ ɔ mi, nɛ benɛ e na ni ɔmɛ ɔ, e mi mi sã lɛ ngɛ a he, nɛ e tsa a kpɛti hiɔtsɛmɛ ɔmɛ.

15 Benɛ je jɔ ɔ, Yesu kaseli ɔmɛ ba e ngɔ, nɛ a ba de lɛ ke, “ngapa ji hiɛ ɔ, nɛ du bu. Wó ni ɔmɛ blɔ kɛ ho kɔpe ɔmɛ a mi ya, nɛ a ya he ní nɛ a ye.”

16 Yesu de mɛ ke, “E hia we kaa a ya; nyɛ nitsɛmɛ nyɛ hla nɔ́ ko ha mɛ nɛ a ye.”

17 Se a de lɛ ke, “Abolo enuɔ, kɛ lo enyɔ pɛ wa ngɛ ngɛ hiɛ ɔ.”

18 E de mɛ ke, “Nyɛɛ ngɔ ba ha mi ngɛ hiɛ ɔ!”

19 Yesu fa ma kpekpemi ɔ ke a hi si ngɛ nga a nɔ. Jehanɛ, e kukuɔ abolo enuɔ ɔ, kɛ lo enyɔ ɔ, nɛ e hyɛ hiɔwe nɛ e na Mawu si. E ku abolo ɔ mi, nɛ e ngɔ ha e kaseli ɔmɛ, nɛ e kaseli ɔmɛ hu dla ngɔ ha ma a.

20 Mɛ tsuo a ye nɛ a tɔ. Lɔ ɔ se ɔ, a bua bibliwi nɛ piɛ ɔ nya ngɔ wo kusii nyɔngma kɛ enyɔ mi, nɛ a hyi tɔtɔɔtɔ.

21 Nyumuhi nɛ ye ní ɔ maa su akpe enuɔ, slo yihi, kɛ jokuɛwi.

Yesu nyɛɛ wo hɛ mi

(<x>480 6:45-52</x>; <x>500 6:15-21</x>)

22 Enɛ ɔ se ɔ, Yesu ha e kaseli ɔmɛ sɛ lɛ ɔ mi, nɛ e de mɛ ke a sɛ hlami kɛ ya wo ɔ se je. Kɛkɛ nɛ e wo ma kpekpemi ɔ hu blɔ.

23 Benɛ e wo ni ɔmɛ blɔ se ɔ, lɛ nɔ kake e kuɔ yoku ɔ, nɛ e ya sɔle. Benɛ je jɔ ɔ, Yesu nɔ kake too nɛ ngɛ lejɛ ɔ.

24 Jamɛ a be ɔ mi ɔ, lɛ ɔ su wo ɔ kpɛti momo. Oslɔke ngɛ kue kɛ ngɛ lɛ ɔ mi woe, ejakaa a ngɛ kɔɔhiɔ kpee.

25 Makɛ maa pee ngmlɛ eywiɛ mi ɔ, Yesu ji nɛ ɔ nɛ nyɛɛ wo ɔ hɛ mi kɛ ma kaseli ɔmɛ a ngɔ.

26 Benɛ a na lɛ nɛ e nyɛɛ wo ɔ hɛ mi kɛ ma a, a tsui po, nɛ a de ke, “Kpade lɛ ma a nɛ!” Gbeye nu mɛ, nɛ a kpa ngmlaa.

27 Se amlɔ ɔ, Yesu wo e nya nɔ, nɛ e de mɛ ke, “Nyɛ na tsui, imi! Nyɛ ko ye gbeye!”

28 Petro he nɔ ke, “Nyɔmtsɛ, ke mo ɔ, lɛɛ ha nɛ ma nyɛɛ nyu ɔ hɛ mi kɛ ba o ngɔ.”

29 Yesu de lɛ ke, “Ba!” Kɛkɛ nɛ Petro je lɛ ɔ mi, nɛ e nyɛɛ nyu ɔ hɛ mi kɛ yaa Yesu ngɔ.

30 Se benɛ e na kaa kɔɔhiɔ ɔ ngɛ fiae huu ɔ, e ye gbeye, nɛ e bɔni mumi kɛ yaa nyu ɔ sisi. Kɛkɛ nɛ e kpa ngmlaa ke, “Nyɔmtsɛ, he mi!”

31 Amlɔ ɔ, Yesu kpã e nine mi, nɛ e pɛtɛ e he, nɛ e de lɛ ke, “Mo nɛ o hemi kɛ yemi pi! Mɛni he je nɛ o je nɔ́?”

32 Kɛkɛ nɛ a sɛ lɛ ɔ mi, nɛ kɔɔhiɔ ɔ kpa fiami.

33 Jehanɛ, kaseli ɔmɛ nɛ ngɛ lɛ ɔ mi ɔ ja Yesu, nɛ a de ke, “Niinɛ, Mawu Bi ji mo!”

Yesu tsa hiɔtsɛmɛ ngɛ Genesaret

(<x>480 6:53-56</x>)

34 A po wo ɔ, nɛ a ba Genesaret zugba a nɔ,

35 nɛ ni ɔmɛ nɛ ngɛ lejɛ ɔ yo Yesu. Lɔ ɔ he ɔ, a tsɔ kɛ ya kpa lejɛ ɔ ní ɔmɛ a mi tsuo, nɛ a ya ngɔ hiɔtsɛmɛ tsuo kɛ ba e ngɔ.

36 A kpa lɛ pɛɛ wawɛɛ ke e ha nɛ hiɔtsɛmɛ ɔmɛ nɛ a ta e tade ɔ nya a he kɛkɛ. Nɛ nihi tsuo nɛ ta he ɔ na he wami.