Mateo 12

Hejɔɔmi ligbi ɔ he sane

(<x>480 2:23-28</x>; <x>490 6:1-5</x>)

1 ⓡ Pee se ɔ, Yesu ya gu blɛfo ngmɔ komɛ a mi Hejɔɔmi ligbi ɔ. Hwɔ ngɛ e kaseli ɔmɛ yee; lɔ ɔ he ɔ, a kpɔ blɛfo, nɛ a bɔni kpemi.

2 Benɛ Farisi bi ɔmɛ na a, a de Yesu ke, “Hyɛ, nɔ́ nɛ o kaseli ɔmɛ ngɛ pee nɛ ɔ, mlaa a ngmɛ́ blɔ kaa a peeɔ Hejɔɔmi ligbi ɔ.”

3 ⓢ Yesu he nɔ ke, “Nɔ́ nɛ David pee ligbi ko, benɛ hwɔ ngɛ e kɛ e we bi ɔmɛ yee ɔ, anɛ nyɛ kane we lo?

4 ⓣ David ya sɛ Mawu we ɔ, nɛ e kɛ e we bi ɔmɛ ye abolo ɔ nɛ a kɛ maa Mawu hɛ mi ɔ. Mlaa a ngmɛ́ blɔ kaa a peeɔ ja; osɔfo ɔmɛ pɛ lɛ a ngɛ he blɔ nɛ a yeɔ jamɛ a abolo ɔ.

5 ⓤ Aloo nyɛ kane we ngɛ Mose mlaa a mi kaa daa Hejɔɔmi ligbi ɔ, osɔfohi nɛ ngɛ sɔlemi we ɔ bleɔ Hejɔɔmi ligbi ɔ, se kɛ̃ a yi fɔ lo?

6 I ngɛ nyɛ dee ke, nɔ́ ko ngɛ hiɛ ɔ nɛ pe sɔlemi we ɔ.

7 ⓥ Ngmami ɔ ke, ‘Mɔbɔ nami i ngɛ hlae, se pi bɔ.’ Nyɛ le nɔ́ nɛ ɔ sisi jinɛ nihi nɛ yi fɔ ɔ, nyɛ ko bui mɛ fɔ.

8 Ejakaa Mawu Bi ɔ, Hejɔɔmi ligbi ɔ tete nyɔmtsɛ ji lɛ.”

Nyumu ɔ nɛ nine kake gbo ɔ

(<x>480 3:1-6</x>; <x>490 6:6-11</x>)

9 Benɛ Yesu je lejɛ ɔ, e ya sɛ a kpe he ɔ,

10 nɛ e na nyumu ko nɛ e nine kake gbo. Ni komɛ ngɛ lejɛ ɔ nɛ a ngɛ hlae nɛ a po Yesu nya kaa e ngɛ nɔ́ nɛ dɛ blɔ pee. Lɔ ɔ he ɔ, a bi lɛ ke, “Ke a tsa nɔ Hejɔɔmi ligbi ɔ, anɛ a tɔ mlaa a lo?”

11 ⓦ Yesu he nɔ ke, “Waa ngɔ lɛ kaa nyɛ ti nɔ ko ngɛ to kake pɛ, nɛ to ɔ ya nɔ muɔ mi Hejɔɔmi ligbi ɔ. Anɛ e be to ɔ he pɛtɛe nɛ e je lɛ lo?

12 Anɛ nɔmlɔ he jua wɛ kulaa pi to lo? Lɔ ɔ he ɔ, wa mlaa a ngmɛɔ blɔ kaa a pee kpakpa Hejɔɔmi ligbi ɔ.”

13 Kɛkɛ nɛ e de nyumu ɔ nɛ nine kake gbo ɔ ke, “Kpã o nine ɔ mi!” Nyumu ɔ kpã e nine ɔ mi. Kɛkɛ nɛ nine ɔ tsa, nɛ e kɛ kake ɔ sɔ.

14 Enɛ ɔ he ɔ, Farisi bi ɔmɛ je kpo, nɛ a ya so Yesu yi nɔ, bɔ nɛ a maa pee nɛ a kpata e hɛ mi.

Mawu tsɔlɔ nɛ e hla

15 Benɛ Yesu nu kaa a so e yi nɔ ɔ, e sã e he si kɛ je lejɛ ɔ, se nihi babauu nyɛɛ e se. E tsa nihi tsuo nɛ be he wami ɔ,

16 nɛ e bɔ mɛ kɔkɔ ke a ko tu e he munyu nɛ nihi ba nu e he.

17 E pee nɔ́ nɛ ɔ, bɔ nɛ pee nɛ nɔ́ nɛ Mawu de kɛ gu gbalɔ Yesaya nɔ ɔ nɛ ba mi ke,

18 ⓧ “Hyɛ, ye tsɔlɔ nɛ i hla a ji nɛ ɔ nɛ; i suɔ lɛ, nɛ i naa e he tsui. Ma ngɔ ye mumi ɔ kɛ wo e mi, nɛ tue gblami nɛ i to ha ma je li ɔmɛ ɔ, e maa fiɛ kɛ tsɔɔ mɛ.

19 E be pɛe; e be ngmlaa kpae, nɛ nɔ ko be e gbi nue ngɛ magbɛ nɔ hulɔ.

20 E kɛ nihi nɛ gbɔjɔ ɔ maa hi si ngɛ he jɔmi mi. E maa na dɛgutsɛmɛ mɔbɔ. E ma tsu ní nɛ ɔ hluu kɛ yaa si e ma ha nɛ dami sane yemi ma he si.

21 Nɛ ma je li tsuo maa ngɔ a hɛ kɛ fɔ e nɔ.”

Yesu kɛ Beelzebul

(<x>480 3:20-30</x>; <x>490 11:14-23</x>)

22 Jehanɛ, ni komɛ ngɔ nyumu ko nɛ hɛ yu, nɛ e tu we munyu hulɔ kɛ ba Yesu ngɔ; nyumu nɛ ɔ, mumi yayami ngɛ e mi. Yesu tsa lɛ, nɛ e tu munyu, nɛ e hyɛ nɔ́ ekohu.

23 Nimli kpekpemi ɔ a nya kpɛ a he, nɛ a bi ke, “David Bi ɔ ji nɛ ɔ?”

24 ⓨ Benɛ Farisi bi ɔmɛ nu he ɔ, a de ke, “Mumi yayamihi a tsɛ Beelzebul ɔ biɛ mi pɛ nyumu nɛ ɔ ngɛ mumi yayami ɔmɛ hiae ngɛ ɔ nɛ.”

25 Yesu le nɔ́ nɛ a ngɛ susue ɔ, lɔ ɔ he ɔ, e de mɛ ke, “Matsɛ yemi tsuaa matsɛ yemi nɛ mi ma gba, nɛ a kɛ a he maa hi ta hwue ɔ, e se kɛ we. Jã kɛ̃, ma tsuaa ma, aloo we tsuaa we nɛ e mi ma gba, nɛ a kɛ a he maa hi ta hwue ɔ, e dɛ si.

26 Lɔ ɔ he ɔ, ke Satan hia Satan ɔ, e tsɔɔ kaa e mi gba, nɛ e kɛ lɛ nitsɛ e he ngɛ ta hwue. Lɛɛ kɛ e matsɛ yemi ɔ maa pee kɛ da si kɛɛ!

27 Yoo, ke Beelzebul he wami lɛ i kɛ ngɛ mumi yayami ɔmɛ hiae ɔ, nyɛ se nyɛɛli ɔmɛ lɛɛ mɛnɔ he wami nya nɛ mɛɛ a ngɛ mɛ hiae ngɛ mɔ? Nɔ́ nɛ nyɛ nitsɛmɛ nyɛ se nyɛɛli ɔmɛ ngɛ pee ɔ tsɔɔ kaa nyɛ yeɔ fɔ!

28 Se imi lɛɛ ke Mawu Mumi ɔ lɛ haa mi he wami nɛ i kɛ hiaa mumi yayami ɔmɛ ɔ, e tsɔɔ kaa Mawu matsɛ yemi ɔ ba na nyɛ momo.

29 “Kɛ nɔ ko ma plɛ kɛ sɛ nɔ nɛ he wa we mi nɛ e ya ju kɛɛ? Ja e fi nɔmlɔ nɛ he wa nɛ ɔ kekle, loko e ma nyɛ ya ju ngɛ e we ɔ mi.

30 ⓩ “Nɔ nɛ be ye blɔ fa mi ɔ, e te si ngɔ wo mi, ne nɔ nɛ kɛ mi bua we nɔ́ nya a, e ngɛ gbɛe kɛ ngɛ fĩae.

31 Lɔ ɔ he ɔ, i ngɛ nyɛ dee ke, yayamihi nɛ nihi pee, kɛ musuhi nɛ a bɔ ɔ, a kɛ lɛ tsuo maa pa mɛ. Se nɔ nɛ maa bɔ musu kɛ si Mumi Klɔuklɔu ɔ, a kɛ be lɛ pae.

32 ⓐ Nɔ tsuaa nɔ nɛ maa tu munyu kɛ si Nɔmlɔ Bi ɔ, a kɛ maa pa lɛ. Se nɔ nɛ maa tu munyu kɛ si Mumi Klɔuklɔu ɔ, a kɛ be lɛ pae ngɛ yi nɔ nɛ ɔ, aloo yi nɔ nɛ maa ba a mi.

Tso kɛ e yiblii

(<x>490 6:43-45</x>)

33 ⓑ “Ke o du tso kpakpa a, e maa wo yiblii kpakpa; ke tso ɔ hí ɔ, e maa wo yiblii yaya. Tso yiblii nɛ a kɛ leɔ tso.

34 ⓒ Nyɛ sinɔhi a nina! Nyɛ nimli yayamihi! Kɛ nyɛ maa pee kɛ tu munyu kpakpa kɛɛ? Ejakaa nɔ́ nɛ hyi tsui mi tɔ ɔ, lɔ ɔ nya deɔ.

35 Nɔmlɔ kpakpa jeɔ ní kpakpahi kɛ jeɔ e juetli kpakpahi a mi; nɔmlɔ yayami hu jeɔ ní yayahi kɛ jeɔ e juetli yayahi a mi.

36 “I ngɛ nyɛ dee ke kojomi ligbi ɔ, nyɛ ti nɔ tsuaa nɔ maa bu akɔtaa ngɛ yaka munyu tsuaa yaka munyu nɛ e tu hyɛ he.

37 Munyuhi nɛ nyɛ tu ɔ, lɔ ɔmɛ a nɔ a maa da kɛ wo nyɛ nguɔ, nɛ lɔ ɔmɛ nɔuu a nɔ a maa da kɛ bu nyɛ fɔ.”

Farisi bi ɔmɛ ngɛ okadi hlae

(<x>480 8:11-12</x>; <x>490 11:29-32</x>)

38 ⓓ Kɛkɛ nɛ mlaa tsɔɔli ɔmɛ, kɛ Farisi bi ɔmɛ a ti ni komɛ de ke, “Tsɔɔlɔ, wa ngɛ o nine nya okadi ko hlae nɛ waa hyɛ.”

39 ⓔ Yesu he nɔ nɛ e de ke, “Nyɛ yi nɔ yaya bi nɛ nyɛ li Mawu! Nyɛ ke nyɛ ngɛ ye nine nya okadi hlae, pi ja? Dɛbi! Okadi pɛ nɛ a ma ha nyɛ ji gbalɔ Yona nɔ́ ɔ.

40 ⓕ Bɔ nɛ Yona ye nyɔ kɛ pia ligbi etɛ ngɛ wo mi lo nguaa a muklii mi ɔ, jã Nɔmlɔ Bi ɔ maa ye nyɔ kɛ pia ligbi etɛ ngɛ zu mi.

41 ⓖ Kojomi ligbi ɔ, Nineve bi ɔmɛ maa te si nɛ a maa po nyɛ nya; ejakaa benɛ a nu nɛ Yona ngɛ fiɛe ɔ, a tsake a tsui. Se i ngɛ nyɛ dee ke nɔ́ ko ngɛ hiɛ ɔ nɛ pe Yona.

42 ⓗ Kojomi ligbi ɔ, Sheba manyɛ ɔ maa te si nɛ e maa po nyɛ nya; ejakaa e hia blɔ kɛ je e ma mi tɔɔ kɛ ba bu Matsɛ Salomo nile munyuhi tue. Se i ngɛ nyɛ dee ke nɔ́ ko ngɛ hiɛ ɔ nɛ pe Salomo!

Mumi yayami ɔ maa kpale kɛ ba

(<x>490 11:24-26</x>)

43 “Ke mumi yayami je nɔ ko mi ɔ, e ya kpaa si ngɛ nga kplanaa nɔ nɛ e hlaa he nɛ e maa jɔɔ e he ngɛ. Ke e nɛ́ he ko ɔ,

44 e deɔ e he ke, ‘Ma kpale ye se kɛ ya ye we ɔ mi he nɛ i je ɔ.’ Ke e ba a, e naa kaa we ɔ fɔɔ si gu, nɛ a bɛɛ mi, nɛ a dla mi.

45 Kɛkɛ ɔ, e yaa nɛ e ya ngɔɔ mumi kpa kpaago kɛ baa, nɛ e kɛ mɛ ba hii lejɛ ɔ. Mumi yayamihi nɛ pe lɛ nitsɛ po ji mumi nɛ ɔmɛ. Nɔmlɔ nɛ ɔ nyagbe si himi ɔ ba peeɔ haomi kulaa pe sisije ɔ po. Yi nɔ nɛ ɔ bi yayami peeli nɛ ɔmɛ ɔ, nɔ́ nɛ maa ba mɛ hu a nɔ ji nɛ ɔ nɛ.”

Yesu nyɛ kɛ e nyɛminyumu ɔmɛ

(<x>480 3:31-35</x>; <x>490 8:19-21</x>)

46 Benɛ Yesu kɛ ni ɔmɛ ngɛ munyu tue kɛ mwɔɔ ɔ, e nyɛ, kɛ e nyɛminyumu ɔmɛ ba da agbo ɔ nya, nɛ a ngɛ hlae nɛ a kɛ lɛ nɛ tu munyu. [

47 Kɛkɛ nɛ nɔ ko de Yesu ke, “Hyɛ, o nyɛ, kɛ o nyɛmimɛ ɔmɛ daa si ngɛ agbo ɔ nya, nɛ a suɔ kaa a kɛ mo nɛ tu munyu.”]

48 Se Yesu bi nɔ nɛ ba tsɛ lɛ ɔ ke, “Mɛnɔ ji maa, nɛ mɛnɔmɛ ji ye nyɛmimɛ?”

49 Jehanɛ, e je e nine ngɔ tsɔɔ e kaseli ɔmɛ, nɛ e de ke, “Hyɛ, maa, kɛ ye nyɛmimɛ ɔmɛ ji nɛ ɔmɛ ɔ nɛ.

50 Nɔ tsuaa nɔ nɛ peeɔ Tsaatsɛ nɛ ngɛ hiɔwe ɔ suɔmi nya ní ɔ, lɛ ji ye nyɛminyumu, ye nyɛmiyo, loo maa.”