Mateo 10

Bɔfohi nyɔngma kɛ enyɔ ɔmɛ

(<x>480 3:13-19</x>; <x>490 6:12-16</x>)

1 Yesu tsɛ e kaseli nyɔngma kɛ enyɔ ɔmɛ kɛ ba e ngɔ, nɛ e ha mɛ he wami nɛ a kɛ hia mumi yayamihi, nɛ a kɛ tsa hiɔ tsuaa hiɔ hulɔ.

2 Bɔfohi nyɔngma kɛ enyɔ ɔmɛ a biɛhi ji nɛ ɔmɛ nɛ. Kekleekle nɔ ji Simon (nɛ a tsɛɛ lɛ Petro hulɔ ɔ), kɛ e nyɛmi Andrea, Yakobo, kɛ e nyɛmi Yohane, Zebedeo bimɛ ɔmɛ,

3 Filipo kɛ Bartolomeo, Toma, kɛ Mateo tó tsulɔ ɔ Alfeo bi Yakobo, kɛ Tadeo,

4 Simon (ma he doolɔ ɔ), kɛ Yuda Iskariot, nɔ nɛ ba tsɔɔ Yesu se blɔ ɔ.

A tsɔ ni nyɔngma kɛ enyɔ ɔmɛ

(<x>480 6:7-13</x>; <x>490 9:1-6</x>)

5 Yesu tsɔ ni nyɔngma kɛ enyɔ nɛ ɔmɛ, nɛ e fa mɛ ke, “Nyɛ ko ya ma je li a zugba ko nɔ, nɛ nyɛ ko sɛ Samaria ma ko mi hulɔ.

6 Mohu ɔ, nyɛɛ ya Israel bi nɛ a ngɛ kaa tohi nɛ laa a a ngɔ.

7 ⓢ Nyɛ ya fiɛ ke, ‘Hiɔwe matsɛ yemi ɔ su si ta!’

8 Nyɛ tsa hiɔtsɛmɛ; nyɛ tle ni gbogboehi si; nyɛ tsa nihi nɛ ngɛ he womi nɔ hiɔ yaya nue, nɛ nyɛɛ hia mumi yayamihi. Nyɛ ná lɛ yaka gu nɛ nyɛ wui he hiɔ; nyɛ hu nyɛ ngɔ ha nɛ nyɛ ko he hiɔwo.

9 Nyɛ ko fi sika tsu, loo sika hiɔ, loo akɔblee sika kɛ wo nyɛ mlɛ mi.

10 ⓣ Jehanɛ hu, nyɛ ko hɛɛ ní balɔ kotoku, loo hiɔwe tade enyɔ, loo tokota, loo dɛma tso tete; apaatsɛ ɔ, e nya ngma sa lɛ.

11 “Ma tsuaa ma, aloo kɔpe tsuaa kɔpe nɛ nyɛ maa sɛ mi ɔ, nyɛ bi si kaa nɔ ko ngɛ lejɛ ɔ nɛ maa suɔ kaa e he nyɛ atuu lo. Nyɛ ya to lɛ kɛ yaa su be nɛ nyɛ maa je.

12 Ke nyɛ sɛ we ko mi ɔ, nyɛ nga ni ɔmɛ!

13 Ke nihi nɛ ngɛ jamɛ a we ɔ mi he nyɛ atuu ɔ, nyɛɛ ba Mawu gbaami ha mɛ. Se ke a ha we nyɛ hɛ mi ɔ, lɛɛ nyɛɛ kpale nyɛ nya se.

14 ⓤ Ke we, loo ma ko mi bi he we nyɛ atuu, nɛ nyɛ sɛ gbi ɔ hu, a bui tue ɔ, nyɛ blɛ nyɛ nane si zu ngɔ pue lejɛ ɔ, nɛ nyɛɛ je.

15 ⓥ Niinɛ, i ngɛ nyɛ dee ke, kojomi ligbi ɔ, Mawu maa gbla jamɛ a ma a tue kulaa pe Sodom kɛ Gomora tete.

A maa wa nihi yi mi

(<x>480 13:9-13</x>; <x>490 21:12-17</x>)

16 ⓦ “Hyɛ, i ngɛ nyɛ tsɔe kaa jijɔhi kɛ yaa ogbeteehi a kpɛti. Nyɛ hɛ mi nɛ tɛ̃ kaa sinɔ, nɛ nyɛɛ pee kpoo kaa okpo.

17 ⓧ Nyɛ hɛ nɛ hi nyɛ he nɔ; ejakaa nihi maa nuu nyɛ, nɛ a maa kojo nyɛ, nɛ a maa fia nyɛ kpa ngɛ kpe he ɔmɛ.

18 Ye he ɔ, a maa ngɔ nyɛ kɛ ya ganɔhi, kɛ matsɛmɛ a hɛ mi. A ma ha nɛ nyɛɛ ye sane kpakpa a he odase ngɔ tsɔɔ mɛ, kɛ ma je li tsuo.

19 Ke a ngɔ nyɛ kɛ ho ɔ, nyɛ ko hao nyɛ he ngɛ nɔ́ nɛ nyɛ ma de, kɛ bɔ nɛ nyɛ ma plɛ kɛ de lɛ ha a he. Ke be ɔ su ɔ, a maa tsɔɔ nyɛ nɔ́ nɛ nyɛ ma de.

20 Ejakaa pi nyɛ nitsɛmɛ nɛ nyɛ maa tu munyu ɔ, se mohu nyɛ Tsɛ ɔ Mumi ɔ nɛ maa tu munyu kɛ gu nyɛ nɔ.

21 ⓨ “Nyɛmi maa ngɔ e nyɛmi ngɔ ha nɛ a ya gbe lɛ, nɛ tsɛmɛ hu maa ngɔ a bimɛ ngɔ ha ja nɔuu. Bimɛ maa te si ngɔ wo a fɔli, nɛ a ma ha nɛ a gbe mɛ.

22 ⓩ Ye he ɔ, nihi tsuo maa nyɛ nyɛ. Se nɔ nɛ ma wlua lɛ kɛ yaa si nyagbe ɔ, a ma he e yi wami.

23 Ke a ngɛ nyɛ yi mi wae ngɛ ma ko mi ɔ, nyɛɛ tu fo kɛ ya ma kpa mi. Niinɛ, i ngɛ nyɛ dee ke nyɛ be nyɛ ní tsumi ɔ nya gbee ngɛ Israel ma amɛ tsuo a mi, loko Nɔmlɔ Bi ɔ maa ba.

24 ⓐ “Kaselɔ pã we e tsɔɔlɔ, nɛ nyɔguɛ hu pã we e nyɔmtsɛ.

25 ⓑ Lɔ ɔ he ɔ, ke kaselɔ, kɛ e tsɔɔlɔ ba sɔ ɔ, lɔ ɔ kɛkɛ hiɛ ha lɛ. Nyɔguɛ hu, ke e kɛ e nyɔmtsɛ ba sɔ ɔ, lɛ hu lɔ ɔ kɛkɛ hiɛ ha lɛ. Ke a tsɛ wetsɛ ɔ Beelzebul ɔ, e we mi bi ɔmɛ lɛɛ a ma tsɛ mɛ biɛ yaya pe jã po!

Nɔ nɛ sa nɛ a ye lɛ gbeye

(<x>490 12:2-7</x>)

26 ⓒ “Lɔ ɔ he ɔ, nyɛ ko ye mɛ gbeye. Nɔ́ tsuaa nɔ́ nɛ a bu nɔ ɔ, a ma ba je kpo; nɔ́ ko be nɛ a ngɔ kɛ laa nɛ a be lee.

27 Nɔ́ nɛ i ngɛ nyɛ dee ngɛ diblii mi ɔ, nyɛɛ sɛɛ piani katakata; nɔ́ nɛ i ngɛ nyɛ tue mi woe nɛ i ngɛ nyɛ dee ɔ, nyɛɛ fiɛ ngɛ ma nɔ.

28 Nihi nɛ gbeɔ nɔmlɔ tso ɔ, se klaa a lɛɛ a nyɛ we lɛ gbemi ɔ, nyɛ ko ye mɛ gbeye. Mawu nɛ nyɛɔ kpataa nɔmlɔ tso ɔ, kɛ klaa a tsuo a hɛ mi ngɛ Abosiami a je la a mi ɔ, lɛ mohu nyɛɛ ye gbeye.

29 Otoklii enyɔ ɔ, anɛ pi sika nɛ a yeɔ ɔ mi nyafii pe kulaa kake pɛ nɛ a juaa mɛ lo? Se a ti nɔ kake nɔɛ zugba nɛ pi nyɛ Tsɛ ɔ suɔmi nya.

30 Se nyɛɛ lɛɛ nyɛ yi bwɔmi tete po a kane lɛ tsuo.

31 Lɔ ɔ he ɔ, nyɛ ko ye gbeye; nyɛ he jua wa hluu pe otokliihi babauu.

Kristo biɛ ta womi ngɛ nimli a hɛ mi

(<x>490 12:8-9</x>)

32 “Lɔ ɔ he ɔ, nɔ tsuaa nɔ nɛ maa wo ye ta ngɛ nimli a hɛ mi ɔ, imi hu ma wo e ta ngɛ Tsaatsɛ nɛ ngɛ hiɔwe ɔ hɛ mi.

33 ⓓ Se nɔ tsuaa nɔ nɛ ma kua mi ngɛ nimli a hɛ mi ɔ, imi hu ma kua lɛ ngɛ Tsaatsɛ nɛ ngɛ hiɔwe ɔ hɛ mi.

Pi he jɔmi se klaate

(<x>490 12:51-53</x>; <x>490 14:26-27</x>)

34 “Nyɛ ko susu kaa i ba, konɛ ma ha nɛ he jɔmi nɛ ba je ɔ mi. Dɛbi, pi he jɔmi hami nɛ i ba; se klaate mohu i kɛ ba.

35 ⓔ I ba nɛ ma ba ha nɛ binyumuhi nɛ a te si kɛ wo a tsɛmɛ, biyihi nɛ a te si kɛ wo a nyɛmɛ, nɛ nganyɛmɛ nɛ a te si kɛ wo nganyɛmɛ.

36 Nɔ nitsɛ e we mi bimɛ ma plɛ e he nyɛli.

37 “Nɔ nɛ suɔ e tsɛ, loo e nyɛ pe imi ɔ, e sɛ kaa e ba peeɔ ye kaselɔ. Nɔ nɛ suɔ e binyumu, loo e biyo pe imi ɔ, e sɛ kaa e ba peeɔ ye kaselɔ.

38 ⓕ Nɔ tsuaa nɔ nɛ wo we e sɛumi tso kɛ nyɛɛ we ye se ɔ, e sɛ kaa e ba peeɔ ye kaselɔ.

39 ⓖ Nɔ tsuaa nɔ nɛ baa e klaa yi ɔ, e maa laa lɛ; se nɔ nɛ laa e klaa ngɛ ye he ɔ, e nine maa su nɔ.

Hiɔwo kpakpa

(<x>480 9:41</x>)

40 ⓗ “Nɔ tsuaa nɔ nɛ heɔ nyɛ ɔ, imi e ngɛ hee ɔ nɛ; nɛ nɔ nɛ heɔ mi ɔ, nɔ nɛ tsɔ mi ɔ lɛ e ngɛ hee ɔ nɛ.

41 Nɔ tsuaa nɔ nɛ heɔ gbalɔ akɛnɛ gbalɔ ji lɛ he je ɔ, gbalɔ hiɔwo lɛ e ma na. Nɔ nɛ heɔ dalɔ akɛnɛ dalɔ ji lɛ he je ɔ, dalɔ hiɔwo lɛ e ma na.

42 Niinɛ, i ngɛ nyɛ dee ke, nɔ tsuaa nɔ nɛ ma ha ni tsɔwi nɛ ɔmɛ a ti nɔ kake nyu nɛ mi jɔ nɛ e nu akɛnɛ ye kaselɔ ji lɛ he je ɔ, e hiɔwo be lɛ bɔe gblegbleegble.”