Malaki 2

1 Bɔ nɛ Yawɛ Tabohiatsɛ ɔ ngɛ nyɛ osɔfo ɔmɛ dee ji nɛ ɔ nɛ: “Mlaa nɛ i ngɛ nyɛ woe ji kaa

2 nyɛɛ pee nɔ́ nɛ da nɛ nyɛ kɛ wo ye hɛ mi nyami. Ke nyɛ bui nɔ́ nɛ i ngɛ nyɛ dee ɔ tue ɔ, ma gbiɛ nyɛ; nɛ gbaami nɛ i ko gbaa nyɛ ɔ ma plɛ pee tue gblami mohu. Niinɛ, i gbiɛ nyɛ momo, ejakaa nyɛ yi ye mlaa amɛ a nɔ bɔ nɛ sa.

3 Ma gbla nyɛ bimɛ ɔmɛ a tue. Lohwehi nɛ nyɛɛ kɛ ba sãã bɔ ha mi ɔ, ma ngɔ a fĩ kɛ kpa nyɛ hɛ mi. Nɛ a maa ngɔ nyɛ kɛ ya pue kuku nɔ.

4 ⓓ Jamɛ a be ɔ mi ɔ, nyɛ maa na kaa imi lɛ i wo nyɛ mlaa nɛ ɔ, bɔ nɛ pee nɛ somi ɔ nɛ ngɛ i kɛ Levi bi ɔmɛ wa kpɛti ɔ nɛ da si.

5 ⓔ “I wo mɛ si ke ma ha mɛ wami, kɛ tue mi jɔmi, nɛ i pee ja konɛ a bu mi. Niinɛ, jamɛ a be ɔ mi ɔ, a buu mi, nɛ a yeɔ mi gbeye.

6 A tsɔɔ nɔ́ nɛ ji anɔkuale ɔ, se pi nɔ́ nɛ dɛ. A kɛ mi hi si saminya. Pi kaa mɛ nitsɛmɛ a peeɔ nɔ́ nɛ da kɛkɛ, se a ha nɛ nihi babauu hu kpa yayami peemi.

7 E sa kaa osɔfo ɔmɛ nɛ a tsɔɔ ma a ní, nɛ a le Mawu anɔkuale mi. E sa kaa ma a nɛ ya a ngɔ nɛ a ya kase ye suɔmi nya ní. Ejakaa imi Yawɛ Tabohiatsɛ ɔ, ye tsɔli ji osɔfo ɔmɛ ɔ nɛ.

8 “Se, nyɛ osɔfohi! Amlɔ nɛ ɔ, nyɛ gba kɛ je blɔ nɛ da a nɔ. Nyɛ ní tsɔɔmi ɔ ha nɛ nihi fuu a nane kpata. Somi ɔ nɛ i kɛ nyɛ so ɔ, nyɛ yi nɔ.

9 Enɛ ɔ he je ɔ, imi hu ma ha nɛ Israel bi ɔmɛ maa hie nyɛ, ejakaa nyɛ pee we ye suɔmi nya ní; mlaa a hu, nihi a hɛ mi lɛ nyɛ hyɛɛ kɛ tsɔɔ.”

Ma a yi Mawu anɔkuale

10 Anɛ pi tsɛ kake too nɛ wɔ tsuo wa ngɛ lo? Anɛ pi Mawu kake too ɔ nɛ bɔ wɔ tsuo lo? Mɛni he je mɔ nɛ wa yi wa nyɛmimɛ anɔkuale ɔ? Somi ɔ nɛ Mawu kɛ wa nɛmɛ ɔmɛ so ɔ, mɛni he je wa yi nɔ ɔ?

11 Si nɛ Yuda bi ɔmɛ wo Mawu ɔ, a yi nɔ; mohu ɔ, a tsu musu ní ngɛ Yerusalem, kɛ zugba a tsuo nɔ. A ble Yawɛ we ɔ nɛ e suɔ saminya a. Nyumu ɔmɛ ngɔ yihi nɛ jaa ma se mawuhi.

12 Nɔ tsuaa nɔ nɛ tsuɔ kikɛmɛ a ní nɛ ɔ, Yawɛ nɛ je lɛ kɛ je Israel bi ɔmɛ a kpɛti. A ko ngmɛ lɛ blɔ nɛ e ngɔ nike ní kɛ ba Yawɛ Tabohiatsɛ ɔ hɛ mi hu gblegbleegble.

13 Nɔ́ kake hu nɛ nyɛ peeɔ ji kaa nyɛ nyaa awe, nyɛ woɔ yana, nɛ nyɛ foɔ vo nyu kɛ pueɔ Yawɛ bɔ sami la tɛ ɔ nɔ; ejakaa nike ní nɛ nyɛ kɛ baa Yawɛ hɛ mi ɔ, e he we hu.

14 Nyɛ biɔ ke, “Mɛni he je Yawɛ he we wa nike ní ɔmɛ ngɛ wa dɛ hu?” Ɛ̃ɛ̃, ma tsɔɔ mo nɔ́ nɛ he je! Yawɛ le kaa si ko nɛ o wo o nihe mi yo kpeekpee ɔ, o yi nɔ hu. Yo nɛ o wo si ngɛ Mawu hɛ mi ke o kɛ lɛ maa hi si saminya a, o yi lɛ anɔkuale.

15 O kɛ o yo ɔ, anɛ Mawu pee we nyɛ ni enyɔ ɔmɛ kake lo? Mɛni he je lɛ Mawu pee ja a? Mawu pee nɔ́ nɛ ɔ, bɔ nɛ pee nɛ nyɛ fɔ bimɛ nɛ ma ba pee lɛ nitsɛ e ma. Lɔ ɔ he ɔ, si nɛ nyɛ wo nyɛ nihe mi yi kpeekpee ɔmɛ ɔ, nyɛɛ hyɛ saminya nɛ nyɛ ti nɔ ko kó je se kɛ ya pee nɔ́ kpa.

16 Yawɛ, Israel Mawu ɔ ke, “I sume nɛ nɔ fieɔ e yo. Ke nɔ ko pee e yo yi wu tso nɔ́ ko kaa kikɛ nɛ ɔ, i sume. Enɛ ɔ he je ɔ, nyɛɛ hyɛ nyɛ he nɔ saminya, konɛ si ko nɛ nyɛ wo nyɛ yi ɔmɛ kaa nyɛ maa ye mɛ anɔkuale ɔ, nyɛ ko je se.”

Kojomi ligbi ɔ su ta

17 Nyɛɛ kɛ nyɛ munyu babauu ɔ woɔ Yawɛ pɔtɔ. Se nyɛ biɔ ke, “Kɛ wa peeɔ kɛ woɔ lɛ pɔtɔ kɛɛ?” Ɛ̃ɛ̃, bɔ nɛ nyɛ peeɔ ji kaa nyɛ deɔ ke, “Nɔ tsuaa nɔ nɛ peeɔ yayami ɔ, e hi, nɛ Yawɛ suɔ lɛ.” Jehanɛ hu, nyɛ biɔ ke, “Jije Mawu nɛ yeɔ dami sane ɔ ngɛ?”