Hagai 1

Yawɛ fa ke a ma Mawu we ɔ ekohu

1 ⓐ Persia matsɛ, Darius yi nɔ, jeha enyɔne ɔ mi, nyɔhiɔ ekpane ɔ we kekleekle ligbi ɔ, Yawɛ ngɔ sɛ gbi kɛ gu gbalɔ Hagai nɔ kɛ ha nimli nɛ ɔmɛ: Sheatiel bi Zerubabel, Yuda amlaalo ɔ, kɛ Yehozadak bi Yoshua, osɔfo nɔkɔtɔma pe kulaa a.

2 Yawɛ Tabohiatsɛ ɔ de Hagai ke, “Ma a ngɛ dee ke, be nɛ sa kaa a ma Mawu we ɔ sui lolo.”

3 Kɛkɛ nɛ Yawɛ ngɔ sɛ gbi nɛ ɔ kɛ mane ma a kɛ gu Hagai nɔ ke,

4 “Ye ma, anɛ e sa kaa nyɛɛ hi wehi nɛ a ma saminyawiiwi a mi, be mi nɛ imi nitsɛ ye we ɔ ku kɛ pueɔ si lo?

5 Anɛ nɔ́ nɛ nyɛ ngɛ nae nɛ ɔ, nyɛ kpa we si lolo?

6 Nyɛ du ní gidiglɛmɛɛ, se nyɛ kpa bɔbɔyoo pɛ. Nyɛ yeɔ ni, se nyɛ tɔɛ gblee. Nyɛ nuɔ dã, se e sui nyɛ nya. Nyɛ ngɛ heha ní, se e ha we nɛ nyɛ he mi nɛ pee kulɔɔ. Nyɛ yeɔ apaa, nɛ a woɔ nyɛ hiɔ, se nyɛ kɛ woɔ kotoku nɛ sisi gu mi. Yawɛ Tabohiatsɛ ɔ ke, ‘Nyɛ na bɔ nɛ níhi ngɛ yae ha.’

7 Anɛ nyɛ li nɔ́ nɛ kɛ ní nɛ ɔmɛ ba lo?

8 Nyɛ ya kuɔ yoku ɔmɛ; nyɛɛ poo tso kɛ ba nɛ nyɛ ba ma Mawu we ɔ ekohu; kɛkɛ ɔ, ma na bua jɔmi, nɛ nyɛ ma ja mi ngɛ lejɛ ɔ.

9 “Nyɛ hyɛɛ blɔ kaa ke nyɛ kpa ní ɔ, nyɛ ma na babauu, se bɔbɔyoo pɛ nyɛ naa. Jehanɛ, ke nyɛ ngɔ kɛ ba we mi ɔ, kɛkɛ i ha nɛ e pee kɔɔhiɔ. Mɛni he je i ngɛ ja pee ɔ? Nyɛɛ hyɛ, be mi nɛ ye we ɔ ku kɛ pueɔ si ɔ, nyɛɛ lɛɛ nyɛ ti nɔ tsuaa nɔ ngɛ lɛ nitsɛ e we mae.

10 Enɛ ɔ he je nɛ hiɔmi nɛ́ hu, nɛ zugba a hu bɛ ní ɔ nɛ.

11 I ha nɛ sapu ye nibɔ ní ɔmɛ tsuo; zugba a, yoku ɔmɛ, blɛfo ngmɔ ɔmɛ, wai ngmɔ ɔmɛ, oliv abɔɔ ɔmɛ, nimli adesahi, lohwehi, kɛ nɔ́ tsuaa nɔ́ nɛ a gbo he dengme ɔ, sapu ye mɛ tsuo pɛpɛɛpɛ.”

Ma a bu Yawɛ fami ɔ tue

12 Kɛkɛ nɛ Shealtiel Zerubabel, kɛ Yehozadak bi Yoshua, kɛ ma a tsuo nɛ kpale kɛ je ma se ngɛ Babilonia kɛ ba a, pee nɔ́ nɛ Yawɛ, a Mawu ɔ de mɛ ke a pee ɔ, nɛ a bu gbalɔ Hagai, Yawɛ tsɔlɔ ɔ tue, ejakaa Yawɛ nɛ tsɔ lɛ. Ma a tsuo ye gbeye.

13 Jehanɛ Hagai, Yawɛ tsɔlɔ ɔ ngɔ Yawɛ sɛ gbi ɔ ngɔ ha ma a ke, “I kɛ nyɛ ngɛ.” Yawɛ lɛ de.

14 Yawɛ wo nɔ tsuaa nɔ mumi mi he wami kɛ ha ní tsumi ɔ: Sheatiel bi Zerubabel, Yuda ma a we amlaalo ɔ, kɛ Yehozadak bi Yoshua, osɔfo nɔkɔtɔma pe kulaa a, kɛ ni ɔmɛ tsuo nɛ je ma se kɛ ba a. Mɛ tsuo a bɔni Yawɛ Tabohiatsɛ, a Mawu ɔ we ɔ he ní tsumi

15 ngɛ Matsɛ Darius yi nɔ jeha nɛ ji enyɔ ɔ, nyɔhiɔ ekpane ɔ we ligbi nyingmi enyɔ kɛ eywiɛne ɔ.