Mika 1

1 ⓐ Yuda matsɛmɛ, Yotam, Ahaz, kɛ Hezekia a yi nɔ ɔ, Yawɛ kɛ sɛ gbi nɛ ɔ ha Mika nɛ je Moreshet ɔ. Yawɛ je ní nɛ ɔmɛ nɛ kɔɔ Samaria kɛ Yerusalem ma amɛ a he ɔ ngɔ tsɔɔ Mika.

Kɔmɔ yemi la ngɛ Samaria kɛ Yerusalem a he

2 Nyɛ je mahi tsuo, nyɛɛ bu tue; nyɛ nihi tsuo nɛ ngɛ je ɔ mi, nyɛɛ bu tue! Nyɔmtsɛ Mawu po nyɛ nya. Nyɛɛ bu tue! E ngɛ munyu tue kɛ je e we klɔuklɔu ɔ.

3 Yawɛ kple si kɛ je e hi he klɔuklɔu ɔ kɛ ma. E ma ba nyɛɛ yo ɔmɛ a yi mi ngɛ je ɔ mi.

4 Yo ɔmɛ maa sile ngɛ e nane sisi kaa hwo gbaku ngɛ la mi; nɔ́ nɛ sile ɔ ma kpa ngɔ pue kɔ̃ ɔmɛ a mi kaa pa nɛ hia kɛ bee ngɛ yoku he kɛ yaa kɔ̃ mi.

5 Ní nɛ ɔmɛ tsuo maa ba mi, ejakaa Israel ma a pee yayami kɛ si Mawu, nɛ a tsɔ e hɛ mi atuã. Israel atuã tsɔmi ɔ, mɛnɔ kɛ ba? Ma nguaa a nɛ a tsɛɛ Samaria a, lɛ! Mɛnɔ yeɔ fɔ kaa e kɛ amaga jami ba Yuda? Yerusalem nitsɛ!

6 Lɔ ɔ he ɔ Yawɛ ke, “Ma ha nɛ Samaria maa pee kaa kuku ngɛ nga nɔ, he nɛ a ma du wai tsohi ngɛ. Ma kpɛne tɛhi ngɛ ma a mi kɛ wo kɔ̃ ɔ mi, nɛ ma a sisi tomi ɔ maa je kpo.

7 A maa ku Samaria amaga amɛ tsuo dukuduku. A kɛ la maa sã ní tsuo nɛ e na kɛ je yahomi mi ɔ. Ma kpata e wɔ ɔmɛ tsuo a hɛ mi. Ní nɛ e na a yahomi mi e na kɛ je, lɔ ɔ he ɔ, e ní ɔ tsuo maa ya pee yahomi mi ní kɛ ha ni kpahi.”

8 Kɛkɛ nɛ Mika de ke, “Nɔ́ nɛ ɔ he je ɔ, ma nya awe, nɛ ma ye kɔmɔ. Ma hɛɛ ye he gu, nɛ ma nyɛɛ nane gu. Ma huã kaa nga mi gbe, nɛ ma nya awe kaa afukpɔngɔ.

9 Samaria ma mi bi ɔmɛ a he pa a be tsa ba; Yuda hu miɔ nɛ e maa sɛ jamɛ a haomi ɔ nɔuu mi. Lɔ ɔ ji kaa hɛ mi kpatami su ye ma, Yerusalem agbo ɔ nya.”

He nyɛli ɔmɛ su Yerusalem ta

10 Nyɛ ko sɛɛ ngɛ Gat nɛ wa he nyɛli ɔmɛ ba nu; nyɛ ko wo yana nɛ a ba na. Bet Leafra bi, nyɛɛ kɛ nyɛ he nɛ wuwlua si!

11 Nyɛ Shafir bi, nyɛ ba be kɛ ho kɛ nyɛ he gu, kɛ nyɛ he zo. Ni nɛmɛ nɛ ngɛ Zaanan ɔ be nyɛe maa je kpo hu. Ke nyɛ nu Betezel bi ɔmɛ a he nɛ a ngɛ kɔmɔ yee ɔ, nyɛ maa na kaa wesa he ko be lejɛ ɔ.

12 Marot bi ɔmɛ ngɛ blɔ hyɛe kaa a ma ba kpɔ mɛ, se Yawɛ ngɔ haomi kɛ ba su Yerusalem agbo ɔ nya haa.

13 Nyɛ Lakish bi, nyɛɛ fi nyɛ okpɔngɔ ɔmɛ kɛ wo ta zugba lɛ ɔmɛ a he esɔesɔ. Nyɛ ji Yuda ma nɛ ya wo Israel nane kɛ pee yayami, nɛ nyɛ ha nɛ Yerusalem ba pee yayami.

14 Lɔ ɔ he ɔ, Yuda bi, nyɛɛ kɛ Moreshet Gat ma a nɛ ye sɛ. Israel matsɛmɛ ɔmɛ be yemi kɛ buami ko nae kɛ je Akzib ma a dɛ mi.

15 Maresha bi, Yawɛ ma je nyɛ kɛ wo he nyɛli komɛ a dɛ mi, nɛ a maa ngɔ nyɛ ma a. Israel ma nimeli kɛ a hɛ mi nyami ɔ ma ya laa a he ngɛ Adulam tɛ puɔ ɔ mi.

16 Yuda bi, nyɛ sã nyɛ yi nɔ, nɛ nyɛɛ ye kɔmɔ ha nyɛ bimɛ nɛ nyɛ suɔ mɛ ɔ. Nyɛ ngmla nyɛ yi kaa okpokuhi, ejakaa a ma ba ngɔ nyɛ bimɛ ɔmɛ nyɔguɛ kɛ je nyɛ he.