Mose IV, - Introduction

NYA TSƆƆMI

Womi nɛ ɔ gbaa wɔ bɔ nɛ Israel bi ɔmɛ hia blɔ kɛ je Sinai yo ɔ he, kɛ nyɛɛ nga kplanaa a nɔ maa pee jeha nyingmi eywiɛ, kɛ ya su zugba nɛ Mawu wo si ke e ma ha mɛ ɔ huzu ɔ nɛ ngɛ beleku je ɔ nya. Sane titli nɛ ngɛ womi nɛ ɔ mi ji bɔ nɛ Mose kane Israel bi ɔmɛ ngɛ Sinai yo ɔ he loko a je lejɛ ɔ, kɛ bɔ nɛ e kane mɛ ekohu pee se ngɛ Moab, ngɛ Yordan pa a beleku je. Israel bi ɔmɛ a kanemi ɔ nɔ a da kɛ ha womi nɛ ɔ biɛ Numeri ɔ nɛ. Jamɛ a be ɔ mi ɔ, Israel bi ɔmɛ ya su Kadesh Barnea ngɛ Kanaan zugba a leneyi je huzu ɔ nya; se a nyɛ we nɛ a gu lejɛ ɔ kɛ ya zugba a nɛ a wo mɛ si ke a ma ha mɛ ɔ nɔ. A hi lejɛ ɔ jeha babauu loko a hia kɛ ho zugba nɛ ngɛ Yordan pa a beleku je ɔ nɔ ya. Benɛ a ya su lejɛ ɔ, a ti ni komɛ mia, nɛ a po pa a kɛ ho Kanaan zugba a nɔ ya; se ni komɛ hu tlɔ lejɛ ɔ.

Mose Womi Eywiɛne ɔ gbaa wɔ bɔ nɛ ke haomi ba Israel bi ɔmɛ a nɔ kɛkɛ nɛ sawale nuɔ mɛ nɛ a kɔni mi jeɔ wu, bɔ nɛ a tsɔɔ atuã kɛ woɔ Mawu, kɛ Mose, nɔmlɔ nɛ Mawu hla ke e nyɛɛ a hɛ mi ɔ. Sane nɛ ɔ tsɔɔ wɔ bɔ nɛ Mawu hyɛ e ma Israel ɔ nɔ saminya, be mi nɛ mɛɛ a bui lɛ tue fɛɛ, nɛ a peeɔ yayami slɔɔtoslɔɔtohi mohu kɛ siɔ lɛ. Nyagbe ɔ, wa naa ngɛ womi nɛ ɔ mi kaa be komɛ Mose tsui fiaa lɛɛ, se kɛ̃ ɔ, e fi si kɛ sɔmɔ Mawu, kɛ e ma Israel ɔ anɔkuale mi.

Bɔ nɛ a dla womi ɔ mi ha

• Israel bi ɔmɛ mia nɛ a maa hia kɛ je Sinai yo ɔ he 1.1—9.23
  a. A kane ma a kekleekle nɔ́ 1.1—4.49
  b. Mlaa slɔɔtoslɔɔtohi 5.1—8.26
  d. Hetsɔmi enyɔne ɔ 9.1-23
• Kɛ je Sinai yo ɔ he kɛ ya Moab 10.1—21.35
• Sanehi nɛ ba ngɛ Moab 22.1—32.42
• Kɛ je Egipt kɛ ya Moab 33.1-49
• Mlaahi nɛ a wo loko a po Yordan pa a 33.50—36.13