Mose IV, 6

Mlaahi kɛ ha Nazir no peemi

1 Yawɛ de Mose ke,

2 “Mo de Israel bi ɔmɛ ke, ke nyumu ko, loo yo ko je blɔ ka Nazir no peemi kita, nɛ e wo si kaa e maa ngɔ e he ngɔ ha Yawɛ ɔ,

3 ⓕ e yu e he kɛ je wai, kɛ dã nɛ nya wa a he. E ko nu wai, aloo dã kpa ko nɛ kuã. E ko nu nɔ́ ko nɛ a kɛ wai yiblii pee; wai yiblii mumu, loo gbigbli hu e ko ye.

4 Ligbi abɔ nɛ Nazir no ji lɛ ɔ, e ko ye nɔ́ ko nɛ a kɛ wai tso he nɔ́ ko pee; wai tso yiblii ɔ mi wu ɔ jio, e he toto jio, e ko ye.

5 “Ligbi abɔ nɛ e ngɛ Nazir no si womi nɛ ɔ sisi ɔ, e ko sã e yi nɔ. E ngmɛɛ e yi bwɔmi he nɛ e ka gagaaga; nɛ e pee e he klɔuklɔu.

6 E yi bwɔmi ji okadi nɛ tsɔɔ kaa e ngɔ e he ngɔ ha Yawɛ. Lɔ ɔ he ɔ, ke nɔ ko gbo ɔ, e ko ya nɔ gbogboe ɔ he nɛ e ko ba ble e he, e tsɛ jio, e nyɛ jio, e nyɛminyumu jio, e nyɛmiyo jio.

7

8 Ligbi abɔ nɛ Nazir no ji lɛ ɔ, a tsukɔ e he kɛ ha Yawɛ.

9 “Ke e ba mi kaa nɔ ko gbo tlukaa ngɛ e kasa nya, nɛ lɔ ɔ he ɔ, e ble e yi bwɔmi ɔ nɛ a tsukɔ he kɛ ha Yawɛ ɔ, e sɛ e yi ɔ kpalokpalo ngɛ e he tsukɔmi ligbi ɔ we ligbi kpaago se.

10 Ligbi kpaanyɔne ɔ, e ngɔ lahuɛ enyɔ, aloo beleku lahuɛ tsɔwi enyɔ kɛ ba ha osɔfo ɔ ngɛ kpe he bo tsu ɔ sinya a nya.

11 Osɔfo ɔ maa ngɔ kake kɛ sã yayami pami bɔ, nɛ e maa ngɔ kake hu kɛ sã sami bɔ kɛ tsukɔ nɔ ɔ he; ejakaa e pee yayami kaa e hyɛ nɔ gbogboe hɛ mi. Jamɛ a ligbi ɔ nɔuu ɔ, nyumu nɛ ɔ maa tsukɔ e yi bwɔmi ɔ he ekohu,

12 nɛ e maa kpale je sisi maa ngɔ e he ngɔ ha Yawɛ ekohu kaa Nazir no. Be nɛ be ɔ pee yaka, ejakaa e ble e yi bwɔmi nɛ a tsukɔ he ɔ. E maa ngɔ jijɔ bi kake nɛ ye jeha kake kɛ ba sã bɔ kaa e tɔ.

13 ⓖ “Ke Nazir no ko si womi ligbi ɔmɛ a nya ta a, á ngɔ lɛ kɛ ba kpe he bo tsu ɔ sinya a nya,

14 nɛ e ba sã bɔ ha Yawɛ ngɛ lejɛ ɔ. É ngɔ jijɔ ku kake nɛ ye jeha kake, nɛ kpa ko kpa ko be e he kɛ ba sã sami bɔ. É ngɔ jijɔ yo kake nɛ ye jeha kake, nɛ kpa ko kpa ko be e he kɛ ba sã yayami pami bɔ; nɛ e ngɔ agbosu kake hu nɛ kpa ko kpa ko be e he kɛ ba sã tue mi jɔmi bɔ.

15 Jehanɛ se hu, e ngɔ abolo kplolo kusii kake, kɛ keeki nɛ a kɛ mamu bukɔbukɔ nɛ a futu mi nu pee, kɛ akpɔɔnɔɔ nɛ a wui mi masa, se a ngɔ nu kɛ kpa hɛ mi kɛ piɛ niye ní bɔ ɔ, kɛ dã nɛ a kɛ maa sã bɔ ɔ a he kɛ ba.

16 “Osɔfo ɔ nɛ ngɔ ní nɛ ɔmɛ tsuo kɛ ba Yawɛ hɛ mi, nɛ́ e sã yayami pami bɔ ɔ, kɛ sami bɔ ɔ.

17 Lɔ ɔ se ɔ, e ngɔ agbosu ɔ kɛ sã tue mi jɔmi bɔ ha Yawɛ, nɛ e ngɔ abolo kɛ kusii ɔ ngɔ piɛ he. E ngɔ niye ní bɔ ɔ, kɛ dã nɛ a kɛ maa sã bɔ ɔ hu kɛ ba.

18 Lɔ ɔ se ɔ, Nazir no ɔ nɛ sɛ e yi ɔ kpalokpalo ngɛ kpe he bo tsu ɔ sinya a nya. E muɔ e yi bwɔmi ɔ kɛ wo la a nɛ a kɛ ngɛ tue mi jɔmi bɔ ɔ sãe ɔ mi.

19 “Enɛ ɔ se ɔ, osɔfo ɔ nɛ je keeki nɛ a wui mi masa kake, kɛ akpɔɔnɔɔ nɛ a wui mi masa kake ngɛ kusii ɔ mi kɛ piɛ agbosu ɔ nɛ a hoo ɔ kɔni kake he, nɛ e kɛ ní nɛ ɔmɛ ha Nazir no ɔ.

20 Nyagbe ɔ, osɔfo ɔ nɛ fɔ ní ɔmɛ kɛ ya kɛ ba ngɛ Yawɛ hɛ mi kaa bɔ nɛ a fɔɔ kɛ yaa kɛ baa. Mlaa nya a, ní nɛ ɔmɛ, kɛ agbosu ɔ gugue, kɛ fiɔ ɔ peeɔ osɔfo ɔ nike ní klɔuklɔu. Enɛ ɔ se ɔ, Nazir no ɔ ngɛ he blɔ nɛ e nuɔ dã faa.

21 “Mlaahi nɛ ngɛ kɛ ha Nazir no nɛ wo Yawɛ si ji nɛ ɔmɛ nɛ. Bɔ hu nɛ e maa sã ha Yawɛ ngɛ e Nazir no peemi si womi ɔ nya a ji nɛ ɔ nɛ; slo nɔ́ nɛ e ma nyɛ ha ngɛ enɛ ɔ se. Ke Nazir no ko wo si ɔ, e pee ja pɛpɛɛpɛ ngɛ mlaa a nya, be mi nɛ e ngɔ e he ngɔ ha Yawɛ.”

Osɔfo ɔ nɛ gbaa ma a

22 Yawɛ de Mose ke,

23 “De Aaron kɛ e binyumu ɔmɛ ke, bɔ nɛ nyɛɛ gbaa Israel ma a ji nɛ ɔ nɛ. Nyɛ de ke,

24 Yawɛ nɛ gbaa nyɛ, nɛ e hyɛ nyɛ;

25 Yawɛ nɛ ha e hɛ mi nɛ kpɛ ngɛ nyɛ nɔ, nɛ e dloo nyɛ;

26 Yawɛ nɛ wo e hɛ mi nɔ ngɛ nyɛ nɔ, nɛ e ha nyɛ he jɔmi.

27 “Ke a tsɛ ye biɛ ngɔ pue Israel ma a nɔ kikɛ nɛ ɔ, ma gbaa mɛ.”