Mose IV, 3

Aaron binyumu ɔmɛ

1 Be mi nɛ Yawɛ kɛ Mose tu munyu ngɛ Sinai yo ɔ nɔ ɔ, Mose kɛ Aaron powu mi bimɛ ji nɛ ɔmɛ nɛ.

2 ⓑ Aaron ngɛ binyumuhi eywiɛ. Tɛte ɔ biɛ ji Nadab, nɛ e senihi ji Abihu, Eleazar, kɛ Itamar.

3 A pɔ mɛ nu, nɛ Aaron ngɔ mɛ ngɔ wo osɔfo yemi ní tsumi ɔ mi.

4 ⓒ Se Nadab, kɛ Abihu lɛɛ a gbo benɛ a ngɔ la nɛ he tsɔ we kɛ ba Yawɛ hɛ mi ngɛ Sinai nga a nɔ ɔ. Akɛnɛ mɛɛ a be bimɛ he je ɔ, Eleazar kɛ Itamar pɛ lɛ a sɔmɔ kaa osɔfohi ngɛ a tsɛ Aaron wami be mi.

A hla Levi bi ɔmɛ

5 Yawɛ de Mose ke,

6 “Moo kpee Levi bi ɔmɛ kɛ ba, nɛ o ngɔ mɛ ngɔ ha osɔfo Aaron nɛ a piɛ e he kɛ tsu ní.

7 A ma sɔmɔ ngɛ kpe he bo tsu ɔ he, nɛ a ma tsu Aaron, kɛ ma a tsuo a ní tsumi ngɛ lejɛ ɔ.

8 Mɛ lɛ a maa hyɛ níhi nɛ ngɛ kpe he bo tsu ɔ he, kɛ e mi tsuo a nɔ, nɛ mɛ lɛ a ma tsu ní ngɛ lejɛ ɔ ngɛ Israel ma a tsuo a nane mi.

9 A je blɔ hla Levi bi ɔmɛ ngɛ Israel ma a kpɛti, lɔ ɔ he ɔ, ngɔɔ mɛ kɛ ha Aaron nɛ a sɔmɔ lɛ, kɛ e binyumu ɔmɛ.

10 Ngɔɔ osɔfo ní tsumi ɔ ngɔ wo Aaron, kɛ e binyumu ɔmɛ pɛ a dɛ mi; nɔ kpa ko nɛ maa hɛ lɛ kɛ su ní tsumi nɛ ɔ he ɔ, a gbe lɛ.”

11 Yawɛ de Mose ke,

12 ⓓ “Jehanɛ, Levi bi ɔmɛ maa pee ye níhi. Benɛ i gbe Egipt bi ɔmɛ a bitɛte ɔmɛ tsuo ɔ, i tsukɔ Israel bi ɔmɛ a bitɛte tsuaa bitɛte, kɛ a lohwehi hu a kekleekle bihi a he kɛ pee ye níhi. Jehanɛ lɛɛ i hla Levi bi ɔmɛ kɛ to Israel bitɛte ɔmɛ a nane mi; a maa pee ye níhi. Imi ji Yawɛ.”

13

Levi bi ɔmɛ a kanemi

14 Yawɛ de Mose ngɛ Sinai nga a nɔ ke,

15 “Moo kane Levi bi ɔmɛ weku nya weku nya, kɛ we puɔ nya we puɔ nya, nɛ o ngma nyumu tsuaa nyumu nɛ ye kɛ je nyɔhiɔ kake kɛ yaa a e biɛ.”

16 Mose pee kaa bɔ nɛ Yawɛ fa lɛ ɔ.

17 Levi ngɛ binyumuhi etɛ: Gershon, Kohat, kɛ Merari. Mɛ ji a we puɔ nyatsɛmɛ. Gershon ngɛ binyumuhi enyɔ: Libni, kɛ Shimei. Kohat ngɛ binyumuhi eywiɛ: Amram, Izhar, Hebron, kɛ Uziel. Merari ngɛ binyumuhi enyɔ: Mahli, kɛ Mushi. Mɛ ji a weku ɔmɛ a nyatsɛmɛ.

18

19

20

21 Wekuhi nɛ peeɔ Gershon we puɔ nya ji Libni kɛ Shimei.

22 Nyumuhi nɛ a ngma a biɛ, kɛ je ni nɛmɛ nɛ ye nyɔhiɔ kake kɛ yaa a, mɛ tsuo pɛpɛɛpɛ a hiɛmi ji nimli akpe kpaago kɛ e nya lafa enuɔ.

23 Gershon we puɔ nya a maa to si ngɛ kpe he ɔ se, kɛ yaa bonyoku je.

24 A nyatsɛ ji Lael bi Eliasaf.

25 Kpe he bo tsu ɔ he níhi nɛ a tu kɛ wo a dɛ mi ji: kpe he ɔ, bo tsu ɔ kɛ e nɔ hami nɔ́ ɔ, bo tsu ɔ sinya a nya bo ɔ,

26 kue ɔ nɛ bɔle kpe he ɔ, kɛ bɔ sami la tɛ ɔ he bo ɔmɛ, kɛ kue ɔ nitsɛ nya bo ɔ kɛ e he tangme kpa amɛ. Ní tsumi tsuaa ní tsumi nɛ kɔɔ ní nɛ ɔmɛ a he ɔ, mɛ lɛ a ma tsu.

27 Wekuhi nɛ peeɔ Kohat we puɔ nya ji Amram, Izhar, kɛ Hebron, kɛ Uziel.

28 Nyumuhi nɛ a ngma a biɛ, kɛ je ni nɛmɛ nɛ ye hlami kake kɛ yaa a, mɛ tsuo pɛpɛɛpɛ a hiɛmi ji nimli akpe kpaanyɔ kɛ e nya lafa ekpa; mɛ ji nimli nɛ tsuɔ ní ngɛ he klɔuklɔu ɔ.

29 Kohat we puɔ nya a maa to si ngɛ kpe he ɔ leneyi je.

30 A nyatsɛ ji Uziel bi Elizafan.

31 Ní tsumi nɛ a tu kɛ wo a dɛ mi ji: ní tsumi tsuaa ní tsumi nɛ kɔɔ somi daka a he, okplɔɔ ɔ, kane tso ɔ, bɔ sami la tɛ ɔmɛ, níhi nɛ osɔfo ɔmɛ kɛ sɔmɔɔ ngɛ he klɔuklɔu ɔ, kɛ tsu mi pomi bo ɔ.

32 Levi bi ɔmɛ a nyatsɛ ji osɔfo Aaron bi Eleazar. Lɛ ji nɔ nɛ hyɛɛ nihi nɛ tsuɔ ní ngɛ he klɔuklɔu ɔ a nɔ.

33 Wekuhi nɛ peeɔ Merari we puɔ nya a ji Mahli, kɛ Mushi.

34 Nyumuhi nɛ a ngma a biɛ, kɛ je ni nɛmɛ nɛ ye nyɔhiɔ kake kɛ yaa a, mɛ tsuo pɛpɛɛpɛ a hiɛmi ji nimli akpe ekpa kɛ e nya lafa enyɔ.

35 A nyatsɛ ji Abihail bi Zuriel. Mɛɛ a maa to si ngɛ kpe he ɔ we omleyi je.

36 Ní tsumi nɛ a tu kɛ wo Merari binyumu ɔmɛ a dɛ mi ji ní tsumi tsuaa ní tsumi nɛ kɔɔ kpe he ɔ he plai ɔmɛ, mani ɔmɛ, titima amɛ kɛ a nɔ dami ní ɔmɛ, kɛ a he ní ɔmɛ tsuo a he.

37 Mɛ kɛ̃ a ní tsumi ji kue ɔ mi tso ɔmɛ, a nɔ dami ní ɔmɛ, plɛɛko ɔmɛ, kɛ tangme kpa amɛ a nɔ hyɛmi.

38 Ni nɛmɛ nɛ maa to si ngɛ kpe he ɔ hɛ mi kɛ yaa beleku je ji Mose, Aaron, kɛ Aaron binyumu ɔmɛ. Mɛ ji nihi nɛ ma tsu kusumi ní tsumihi tsuo ngɛ he klɔuklɔu ɔ kɛ ha Israel ma a nɛ. Nɔ kpa ko nɛ maa hɛ lɛ kɛ su ní tsumi nɛ ɔ he ɔ, a gbe lɛ.

39 Levi bi ɔmɛ a kpɛti nyumuhi tsuo nɛ ye kɛ je hlami kake kɛ yaa, nɛ Mose kɛ Aaron ngma a biɛ we puɔ nya we puɔ nya kaa bɔ nɛ Yawɛ fa mɛ ɔ, mɛ tsuo pɛpɛɛpɛ a hiɛmi ji nimli akpe nyingmi enyɔ kɛ enyɔ.

Levi bi ɔmɛ ba da bitɛte ɔmɛ a nane mi

40 Yawɛ de Mose ke, “Israel bitɛte ɔmɛ ɔ, ye níhi ji mɛ tsuo pɛpɛɛpɛ. Lɔ ɔ he ɔ, moo kane Israel bitɛte tsuaa bitɛte nɛ ye kɛ je nyɔhiɔ kake kɛ yaa a, nɛ o ngma e biɛ. Se i ngɔ Levi bi ɔmɛ tsuo ngɔ to Israel bitɛte ɔmɛ a nane mi. Imi ji Yawɛ! Jehanɛ se, i ngɔ Levi bi ɔmɛ a we mi lohwehi a kekleekle bi ɔmɛ hu ngɔ to Israel bi ɔmɛ a we mi lohwehi a nane mi.”

41

42 Mose kane Israel bi ɔmɛ a bitɛte ɔmɛ tsuo kaa bɔ nɛ Yawɛ fa lɛ ɔ.

43 Benɛ a ngma bitɛtehi nɛ ye kɛ je nyɔhiɔ kake kɛ yaa a a biɛ ɔ, mɛ tsuo pɛpɛɛpɛ a hiɛmi ji nimli akpe nyingmi enyɔ kɛ enyɔ kɛ e nya lafa enyɔ kɛ nyingmi kpaago kɛ etɛ.

44 Yawɛ de Mose ke,

45 “Jehanɛ, moo hla Levi bi ɔmɛ ngɔ to ha mi ngɛ Israel bitɛte ɔmɛ tsuo a nane mi, kɛ a we mi lohwehi hu ngɛ Israel bi ɔmɛ a we mi lohwehi tsuo a kekleekle bi ɔmɛ a nane mi. Imi ji Yawɛ!

46 Akɛnɛ Israel bi ɔmɛ a bitɛte ɔmɛ hiɛ pe Levi bi ɔmɛ kɛ nimli lafa enyɔ kɛ nyingmi kpaago kɛ etɛ he je ɔ, á kpɔ bimɛ nɛ be nɔ ɔ.

47 Bi tsuaa bi ɔ, á ngɔ sika hiɔ yi enuɔ kɛ kpɔ lɛ kaa bɔ nɛ he klɔuklɔu jua nɛ a po ɔ ngɛ ɔ.

48 Ngɔɔ sika nɛ a kɛ ba kpɔ nihi nɛ be nɔ ɔ kɛ ha Aaron, kɛ e bimɛ ɔmɛ.”

49 Mose he kpɔmi sika a nɛ a ha ngɛ Israel bitɛte abɔ nɛ a kɛ hiɛ pe Levi bi ɔmɛ a he ɔ.

50 Sika nɛ a ha ngɛ Israel bitɛte ɔmɛ a he, nɛ e nine su nɔ ji sika hiɔ yi akpe, kɛ e nya lafa etɛ kɛ nyingmi ekpa kɛ enuɔ kaa bɔ nɛ he klɔuklɔu ɔ jua nɛ a po ɔ ngɛ ɔ.

51 Mose ngɔ kpɔmi sika a kɛ ha Aaron, kɛ e bimɛ ɔmɛ kaa bɔ nɛ Yawɛ fa lɛ ɔ.